Locya 22 - Seysyo No Tao

Apyahen na ni Yota a ipanazang si Yeso

¹ Masngen rana o ngaranan da Iyeci a ipamaring da so kanen am koman rana sira so ji nimimway a pang.

² O panipanirsirngen da no mapatanatanang so nakem da si Ama ta do to a kano mangnanao no iwawalam ni Ama ta do to am naknakmen da o ahahapan da si Yeso do limanan da sya. Am ikanyahey da o aro a tao.

³ No kano nang am nikovotan ni Satan o onowned na no tao do Isecyadi a meyngaran so Yota. Iya rana am ikararwa da so ikakarwan no macinanao ji Yeso.

⁴ Meyratateng am mangay si Yota do panipanirsirngen no mapatanatanang so nakem da si Ama ta do to a kano panipanirsirngen no omzat do rako a panaralayan a macisirsiring no kahap na si Yeso a itoro jira.

⁵ So nisarayan da nya. Meyratateng am ipeysirsiring da o itoro da jya nizpi.

⁶ Apyahen na ni Yota o kapanta da nya so nizpi am sapahen na rana do araraw do ikabo no tao a irakep da si Yeso.

Tomalakanen sira so pamaringan da so kanen

⁷ No mamaring sira so kanen do ngaranan da Iyeci am koman sira so ji nimimway a pang a kapangap da so asa ka kagling.

⁸ Am ori o nitovoyan na ni Yeso si Pite a kani Yowani. Maniring jira am, “Mangay kamo pa manita so pamaringan ta so kanen an.”

⁹ Maniring sira am, “Do wanjin mo pancyan nyamen a tomalakanen so pamaringan ta so kanen.”

¹⁰ Maniring si Yeso am, “Mangay kamo do ili a kapakasinmo nyo so asa ka mahakay a misson so peraranom. Si masinmo nyo ori am to nyo ngonoci ori a kasdep nyo do vahay da.

¹¹ Si maniring kamo do mapeyvahay sya am, ‘Na ipanahes jimo no amnanao jyamen do wanjin o pamaringan namen so kanen a vahay,’ kwan nyo an,

¹² a kangay na ninyo do cinavat no vahay na a kapeysinsinmo nyo do dang so pamaringan ta so kanen.”

¹³ Mangay sira am todey mangononong o ciring ni Yeso. Am ori o niyan da rana do dang a mapeykakasa so yaven da.

Ney manowji rana pamaringan da so kanen ni Yeso a kano macinanao jya

¹⁴ Maseyrem am macihanghang si Yeso do nipamnekan na amlivolivon no ciriciring na.

¹⁵ Maniring jira si Yeso am, “Ko isaray o ko kapacihanghang jinyo do na yanam no alalaw ko.

¹⁶ Ko pa ciring jinyo am jyabo kapacihanghang ko pa jinyo a mamaring so kanen do ji na pa mangononongi no peypeypangayan no tanyo kapamaring so kanen do talamozongan na ninyo ni Ama ta do to a.”

¹⁷ Ahapen na ni Yeso o kopo a yanan no potaw cyo am isaray na ji Ama ta do to. Meyratateng am maniring jira am, “Oya rana ya am ahapen nyo a kavonong nyo sya ayopen.

¹⁸ Ko ipanci jinyo am papwen ko sicyaraw eya o kaji ko na ngyopan so potaw cyo mangay no si papwen na ni Ama ta do to o katalamozong na rana ninyo.”

¹⁹ Meyratateng am ahapen na o pang a kasaray na nya ji Ama ta do to a kakcikcil na sya vonongen jira. Maniring am, “Oya rana am kataotao ko ya a mapatazadang jinyo do teyngato. So to nyo na amwamooni sya a iyapapaw nyo jyaken.”

²⁰ Mateyka sira koman am akman so sang, ta ahapen na ni Yeso o kopo a yanan no potaw cyo. Maniring am, “Oya rana am rala ko a nimvoyog a omaing jinyo a yongkad no vayo a pangozayan a ciring na ni Ama ta do to.

²¹ Am cittey kamo o yamanazang nyaken a tao a yamacihanghang jyaten.

²² Ta to ko mangozai a Nipamnekan na ni Ama ta do to do kawakwak da jyaken. Am o manazang nyaken a tao am to makasi an.”

²³ Am ori o nipeysingsingkad da do keyyan no tao jira a mapeyvazay so akman sang.

Ikazyak da o pakarakehen da jira

²⁴ Meyratateng am ikazyak da no macinanao jya, “Sino paro jyaten o pakarakehen ta.”

²⁵ Maniring si Yeso jira am, “O panirsirngen rana do karawan am abo ji ngamizing so akman sang a tao an. So pancyan da no nang makayokod nira tao.

²⁶ Am ji kamo akman so sang an. Ta o pakarakehen nyo am ji na pahama o nakem na. O panirsirngen am inarahen na o kakma ney lamlamsoy a manidong so tao.

²⁷ Omlisna koman a kano peylamlamsoin da tao am sino meyneynakem jira. O amlisna am ori. Am yaken rana am yako akmey kahanhanan nyo a tao.

²⁸ “No myan so alalaw ko am kamo macikaop jyaken.

²⁹ Am ori o torwan ko nya jinyo so na nitoro jyaken ni Ama oyowyat na.

³⁰ So ipacihanghang nyo jyaken do teyngato no makwa a kalisna nyo do lilisnan no pakaizain a tomalamozong no sivosivovoong da no rarwa so ikakarwan a ananak na ni Yakebo.”

Pazimanen na ni Yeso ji Pite o kalalas na jya

³¹ Maniring pa si Yeso am, “Mo Simong, cittey si Satan a nipya ni Ama ta do to a mangay a omlita jinyo.

³² Am ko na nipeynozi imo. So ji na ablisi no nakenakem mo jyaken. No mamlis ka so nakenakem am vavagan mo sira o akma moy kakteh do cinai an.”

³³ Maniring si Pite jya am, “Mo Panirsirngen, ko na ninakenakem o kapacihza ko jimo do pamemtengan, kapeynanod ta mawakwak do dang.”

³⁴ Maniring si Yeso am, “Mo Pite, ko pa ciring jimo am sicyamahep rana do itazokokok no manok am ipitlo ka omalalas jyaken.”

³⁵ Maniring pa si Yeso jira am, “No kakwa pa am nitovoy ko inyo a ji mapalolo so peyninizpyan a kano aywayob nyo a kano tokap nyo. Am ikongo pa yabo jinyo.” Maniring sira am, “Yabo rana o namen kalahen.”

³⁶ Maniring si Yeso am, “Am o na yanan no peyninizpyan na kano ayob sicyaikwaya am palolwen da. O abo so ipangan am ipanazang da o aywayob da kapangap da so ipangan.

³⁷ Ko pa ciring jinyo am o ciriciring rana do Seysyo am, ‘Iya am da nipavilang do meyraraten a tao.’ O ciriciring rana ori am mangay do kataotao ko ori. Ta o nivatvatkan da ciriciring da jyaken am yamasasnad rana jyaken.”

³⁸ Maniring o macinanao jya am, “Mo Panirsirngen, cittey o yadwa ka cinalolot do jya.” Maniring si Yeso am, “Cyana ori.”

Meynozi si Yeso do Kanlan a tokon

³⁹ Makowbot si Yeso do ili am akman sang a mangay do Kanlan a tokon a kapacihza da no macinanao jya.

⁴⁰ Makaranes sira do dang am ipanci na jira ni Yeso. Maniring am, “Meynozi kamo an, ta kalittan kamo an.”

⁴¹ Meyratateng am karwan na sira ni Yeso so kabneng no keytan so karairai a kapeylilitod na meynozi.

⁴² Maniring am, “Mo Ama, no si apyahen mo am pakarwen mo o yamasagpaw a alalaw ko an. Am ji mo mangozai o nakenakem ko, ta kapangozay mo do nakenakem mo.”

⁴³ Amyan so asa ka tinsi a nimapo do teyngato a nimangay a omait do oyowyat na.

⁴⁴ Ta no kapeynozi na am tey meyngen o onowned na. So icyakman na so rala no anngennget na amiteng. Am arakorako pa o pasyasyan na ni Yeso ji Ama ta do to.

⁴⁵ Teyka meynozi am meytatanek si Yeso a mangay do macinanao jya. Makaranes jira am macita na sira meycyaititkeh, ta mapoo sira do kapakanakem da so yaomanam a alalaw ni Yeso.

⁴⁶ Maniring jira am, “Ikongo nyo ipeykaititkeh. Kayokay kamo na kapeynozi nyo, ta kalittan kamo.”

Rakpen da rana si Yeso

⁴⁷ Ji pa nikomavos o ciring ni Yeso am mangay sira o aro a tao a palolwen na no asa ka macinanao jya a meyngaran so Yota. Iya rana am to manmanma a mangay omrapong si Yeso.

⁴⁸ Maniring si Yeso jya am, “Mo Yota, mo rapongen yaken a mo kapanazang rana nyaken a Nipamnekan na ni Ama ta do to?”

⁴⁹ Macita da no karwan da no macinanao ji Yeso am ipanci da, “Mo Panirsirngen, apya kapanavaz namen no takzes?”

⁵⁰ Patavazen no asa ka tao jira o takzes na do lamlamsoy na no panirsirngen no mapatanatanang so nakem da si Ama ta do to. Am ori o nikakteb no talinga na do wanan na.

⁵¹ Maniring si Yeso am, “Ji mo macilimanan nyaken.” Meyratateng am pinanan na o talinga no tao ori am apya rana.

⁵² Meyratateng am maniring si Yeso do amrakep sya panipanirsirngen no mapatanatanang so nakem da si Ama ta do to a kano panipanirsirngen da no omzat do rako a panaralayan a kano kamanrarakehan da am, “Kamo mapalolo so takzes nyo a kano sisipzot nyo a yamrakep jyaken? Nyo patpehan jyaken do manakaw a tao?

⁵³ Ko mangday so araraw a yamacitovong jinyo do rako a panaralayan am yanyo ji ngapa yaken. Am na karateng rana no araraw a yanyo yahap jyaken do na katalamozong ninyo ni Satan.”

Alalasan ni Pite si Yeso

⁵⁴ No kanang am rakpen da si Yeso a kangay da nya do vahay da no panirsirngen no mapatanatanang so nakem da si Ama ta do to. To na macyazizazawi si Yeso ni Pite.

⁵⁵ Meyratateng am manangdang sira do inaorod no vahay da amlimot so apoy. Si Pite rana am macikaop do aro a tao a manangdang.

⁵⁶ Macita na no asa ka tobang da si Pite a macipanangdang am to na ningkaji. Maniring am, “Kapacihcihza no nya ji Yeso asyo am.”

⁵⁷ Maniring si Pite am, “Ko jyasingkaji ori.”

⁵⁸ Ji pa meyyonownay am to ngyan pa so tao a tomita sya. Maniring am, “Kapacihcihza mo ji Yeso asyo am.” Maniring si Pite am, “Ko jyatenngi mo ipanci ang.”

⁵⁹ Hatasen na o asa ka vatvatek no toki am to ngyan pa so asa ka tao a to rana mapatopos so ciring na a manci no, “Jyabo kalas na. Beken a imo eya o yanimacihza ji Yeso? Ta ka macikeylyan jya.”

⁶⁰ Maniring si Pite am, “Ko jyatenngi o mo ipanci ang.” Ji na pa teyka o ciring na am nitazokokokan na rana no manok.

⁶¹ Meyvazingowngaw si Yeso a tomita si Pite am manakem na o mina ciring na jya ni Yeso a manci no, “Do itazokokok no manok am ipitlo ka omalalas jyaken.”

⁶² Manakem na ori ni Pite am makowbot rana omzezezeng a amlavi.

Peyyaliliman da si Yeso

⁶³ O tomita si Yeso a tao am peyyaliliman da kasipsipzot da jya,

⁶⁴ kabengbeng da so mata na a pacicin. Maniring sira am, “Pancyan pala. Sino jyamen o yambakbak jimo ang.”

⁶⁵ Aro ciring da a ipeyleylak da sya.

Pacicin da si Yeso do tangain no aro a panipanirsirngen

⁶⁶ Madagdag am meysinsinmo rana sira o kamanrarakehan da no tao do Yotay a meysirisiring nya. Sira rana ori am panipanirsirngen no mapatanatanang so nakem da si Ama ta do to a kano mangnanao no iwawalam ni Ama ta do to, kangay da ni Yeso do peykeykaygyan da.

⁶⁷ Maniring sira ji Yeso am, “Pancyan pala jyamen. Manngwa, ka manoyong a si Kizisto an?” Maniring si Yeso jira am, “Tana ipeypanci ko jinyo am jyabo kanoyong nyo jyaken a.

⁶⁸ No si myan so ipacici ko jinyo am jyabo kapasapa nyo jyaken a.

⁶⁹ Am makeykai ko rana amlisna do wanan na ni Ama ta do to a ney mowyat na an.”

⁷⁰ Maniring sira o aro a tao am, “Anak na imo saon ni Ama ta do to?” Maniring si Yeso jira am, “O nipanci nyo rana am yamanoyong.”

⁷¹ Maniring sira am, “Tana ji ta makakala so ciring a iraherahet ta sya am cyaha, ta ta na nimamizing o na iraherahet si Ama ta do to.”