Locya 21 - Seysyo No Tao

Kingking no vao a mavakes

¹ Mangay si Yeso do rako a panaralayan am macita na sira aro so nizpi a tao a mapakozong so kingking da.

² Meyratateng am to na cita o asa ka vao a mavakes a meykingking so adwa ka nizpi.

³ Maniring am, “Ko pa ciring jinyo am o kingking na no vao a tao eya am yarwaro pa kano kingking da no karwan no tao.

⁴ Ta o karwan no tao am sira mangap so hepan da, da ipeykingking ji Ama ta do to. Am o vao a mavakes rana ya am kakwakwan na yabo so ipangakaday am yana makto o nizpi na ipeykingking.”

Alalaw no makwa

⁵ Ikazyak da no aro a tao o rako a panaralayan a nyamaog no ney yapiya na vato a kano makakaday a nakem da si Ama ta do to. Maniring si Yeso jira am,

⁶ “O nyo macita rana ya am no marateng o araraw na am jyabo kavezed na no asa ka vato do jya, do kazdazday da sya.”

⁷ Maniring sira am, “Mo Mangnanao, no mango am makaranes o akman so sang a vazay. No masasnad o akman so sang a vazay am ikongo tovilan namen jya.”

⁸ Maniring si Yeso am, “Azimanen nyo an. Ta ji kamo a litai an. Ta mangay o keyyan no aro a tao amvood so ngaran ko a manci no, ‘Yaken am si Kizisto ko,’ a kapanci da pa no, ‘Yamasngen rana o araraw no kavosan no karawan.’ Am ji nyo ngonoci sira an.

⁹ Tana mamizing nyo o meyliliman a meyyarap am ji kanyo anyaheyan, ta manmanma pa o akman sang a alalaw an. Am beken pa ori o ikavos no karawan.”

¹⁰ Maniring pa jira am, “Masyahahap sira o peycyamahamahatawan na.

¹¹ So iyan na no rako a kanini a kano rako abcil a kano ingingnen, kapeytotwaw na pa no ikeykanyahey no tao apo do hanit a keyyan na pa no rako a taztazmamaw.

¹² Am do ji na sasnaji pa no alalaw eya am o mahap so ngaran ko a tao am rakpen da sira no tao a kapakakasi da sira, kangay da nira do peyneynozyan a kaneb da jira a kangay da nira do tangain no panipanirsirngen.

¹³ Am ipeylimwang nyo do dang o Mapasaray a Ciriciring ko.

¹⁴ Ji nyo alawan o kaji nyo makatenngan do itovis nyo jira an.

¹⁵ Ta ipanta ko inyo so teneng nyo, kaji da makatenngan do ciring nyo a tovisan no maoya ninyo a tao.

¹⁶ Am ipanazang da inyo no inyapwan nyo a kano kakakteh nyo a kano zipozipos nyo a kano kagagan nyo. So iyan da jinyo no tatasa wakwaken da.

¹⁷ Mangay o kaoya da ninyo a mahap so vazay ko.

¹⁸ Am cyaha, ta apzatan na inyo ni Ama ta do to.

¹⁹ Ipakowyowyat nyo pa a meyhanhan nyaken. Ta ori o ipakahap nyo so to meyyonong a ikavyay no pahad nyo.

Alalaw no Yelosaleng

²⁰ “No si macita nyo o aro a itaysang amlimot so Yelosaleng am to nyo na tenngi o kasngen na rana no alalaw nyo an.

²¹ No si makaranes ori am o tao do Yotay am somazok sira. O tao do Yelosaleng am meypakokowbot sira. O amyan do takey a tao am ji sira ngoli.

²² Ta ori rana o araraw na no oyaoya na nira ni Ama ta do to, do kapangononong na rana no nivatvatkan a mina ciriciring na.

²³ O mapasoso a kano mangalavat do araraw no nang am to makasi sira an. Ta amyan so rako a alalaw a mangay domna do Isedi a tao.

²⁴ So ikawakwak da do tarem no ipangan a karakep da so tatasa jira yangay do matarek a pongso. So to da makasii no tao na no Yelosaleng a peyyaliliman da no beken a tao do Yotay, mangay no si ipanci na ni Ama ta do to sira omtad no kazapas da so tao do Yelosaleng.

O keypirwa na mai ni Yeso

²⁵ “O araw a kano vehan a kano mata no hanit am macitarek rana. Do teyrahem rana ya am mamimin sira o tao a manyahey no omhakehakeb a rako awa.

²⁶ Am ori o nikahamang da manyahey amnanala so akman sang a meydedna jira alalaw. Ta meygonagonay o masamasaod no hanit.

²⁷ So ipakacita da jyaken a Nipamnekan na ni Ama ta do to a tao do cinalab a meygegcin no azwazway a kano rako a oyowyat ko.

²⁸ No makaranes rana o alalaw am makowyowyat kamo pa so onowned a meyhanhan ni Ama ta do to, ta masngen rana omahap jinyo.”

²⁹ Meyratateng am nanawen na pa sira so payyaingen na so ciring na. Maniring am, “No macita nyo o kayo

³⁰ a tomyok am katenngan nyo rana o kapeypateyteyka na rana.

³¹ Akman sang ta no macita nyo o meykamadadayan a yeyyak nyo no mata am to nyo na tenngi o kakeykai na rana tomalamozong ninyo ni Ama ta do to.

³² Naknakmen nyo an. Amyan so tao a makapis so vazay eya a meygegcin jinyo.

³³ Mabalinas o hanit a kano teyrahem am o ciring ko am jyabalinas.

³⁴ “Am ori o apzatan nyo do onowned nyo an. Ta ji kamo to ngyop so saki a maozoz no meykamadadayan a ikeykakza nyo. Ta ji nyo a tenngi o araraw na no ipeydedna na jinyo.

³⁵ Ta o araraw na no nang am akman so tawaz a tomawaz so tao do karawan.

³⁶ Ori o ikakdekdeng nyo pa meynozi an. Ta ori o ipakahatas nyo so yaomanam a alalaw. So ikabo no ikeykarahet nyo do tangain ko.”

³⁷ No maraw am mangnanao do rako a panaralayan si Yeso. No mahep am mangay do Kanlan a tokon a kaitkeh na do dang.

³⁸ Mayokay o aro a tao am mangay sira do tangain na do rako a panaralayan a omamizing so nanao na.