Locya 20 - Seysyo No Tao

Ikazyak da o nikapwan no oyowyat na ni Yeso

¹ Ipisa kapangnanao na ni Yeso no Mapasaray a Ciriciring do rako a panaralayan am amyan so panipanirsirngen no mapatanatanang so nakem da si Ama ta do to a kano mangnanao no iwawalam ni Ama ta do to a kano kamanrarakehan da a mangay tomita sya,

² kapacici da sya. Maniring sira am, “Do wanjin na kapwan no oyowyat mo a yamapeyvazay so yamapeyzokab a vazay ang. Sinosino nitoro jimo a oyowyat ang. Pancyan pala jyamen.”

³ Maniring si Yeso jira am, “Pacicin ko pala inyo an. Pancyan kamo pala jyaken.

⁴ Oyowyat na no nimanaktak a si Yowani am yanimapo ji Ama ta do to an? No yanimapo do tao.”

⁵ Am ori o kazyakan da nya. Maniring sira do kadwan jira am, “Kongwen tamo ori a patovisan. No si ipanci ta o kapo na ji Ama ta do to am ji na panenesha yaten ni Yeso a ji nganoyong ji Yowani a.

⁶ Am no si kwan ta o kapo na do tao am jyabo kaji da ngagsahan jyaten no tao a. Ta da anoyngan si Yowani a panoyonoywan na so ciring ni Ama ta do to.”

⁷ Meyratateng am maniring sira ji Yeso am, “Namen jyatenngi o na nikapwan no oyowyat na.”

⁸ Maniring si Yeso jira am, “No komwan am ji ko mancyan jinyo o na nikapwan no oyowyat ko a yamapeyvazay so aro a vazay.”

Payyaingen na ni Yeso do marahet so nakem a tao a nimvood so nihakawan no tao

⁹ Meyratateng am ipanci na jira ni Yeso o payyaingen na sya. Maniring am, “Amyan so asa ka tao a meycibcib so mowan na so potaw. Am ikongo do mangay meykownayan do matarek a ili, am ori o nitorwan na no nihakawan na do tao a vooden da.

¹⁰ Mazako asi na no nimowa na am manovoy so asa ka lamlamsoy na macipamozas jira so vonong na. O nimvood so nihakawan na tao ori am nipakapya da nisipsipzotan o lamlamsoy na no nang. Ori o to na meysinaoli abo so nyahap.

¹¹ Ipirwa o mapeynihakawan sya manovoy so lamlamsoy na am akman so sang, ta nisipsipzotan da a panyanigen a katovoy da rana sya abwata so paciralayan.

¹² Ipitlo na no mapeynihakawan sya a manovoy so lamlamsoy na mangay am nipakakasi da a kazaza da sya padondonen do zazacit no nihakawan na.

¹³ Maniring rana o mapeynihakawan sya am, ‘Meypanngonngo ko so wanjin eya. Apyapya o kato ko na novoyan so anak ko a mangay, ta ala ikeykanig da pa.’

¹⁴ Am macita da no nimvood so nihakawan na tao o anak na no mapeynihakawan sya am meysirisiring sira. Maniring sira am, ‘Iya ya o yaomamoon so nihakawan na. So wakwakan ta na sya, kamoon tamo so nihakawan na.’

¹⁵ Meyratateng am lolwen da yangay do kwang a kawakwak da rana sya. Manngo kamo. Kongkongwen na paro o nimvood so nihakawan na tao ang no mapeynihakawan sya.

¹⁶ Jyabo kaji na balinasan sira a kapapalit na so tao a amvood so nihakawan na.” Mamizing da no aro a tao o ciriciring na am ipanci da o, “Jyabo kato na akmanan sang no vazay a.”

¹⁷ Citahen na sira ni Yeso am pacicin na sira. Maniring am, “No si ipanci nyo o kabo no akman sang a vazay ni Ama ta do to am ikongo na peypeypangayan no nivatvatkan do Seysyo. Ta maniring am, ‘O Vato a niwalit da no mapatnek so vahay am nimeyvoga a ney makdeng na aslet no ai no vahay.’

¹⁸ O meyhabak rana do Vato ori am to rana zemek o tototowang na. O kakasan no Vato a tao am akman sang, ta meyramis o kataotao na.”

Tomoro so deyking ji Kaysa

¹⁹ O mangnanao no iwawalam ni Ama ta do to a kano panipanirsirngen da no mapatanatanang so nakem da si Ama ta do to am makazazap da o nanao ni Yeso a paingen na jira. Am ori o naknakman da so karakep da sya. Am ikanyahey da o aro a tao.

²⁰ Am ori o to da macyozai jya. So nipantan da no tao so nizpi a to napyapya so nakem a mapacici si Yeso. Ta kalahen da o ciriciring na amraherahet so seyvo.

²¹ Maniring sira ji Yeso am, “Mo Mangnanao, namen katenngan o nanao mo a yatey manoyong. Namen katenngan imo a yamapeyyangangay so tao. Namen katenngan imo a yamanoyong a yamangnanao no ciriciring na ni Ama ta do to.

²² Ipanci mo pala jyamen do iwawalam ta. Apya o katoro namen so deyking do panirsirngen no Loma a meyngaran so Kaysa?”

²³ Katenngan na ni Yeso o keyleylamdam da sya. Am ori o nipancyan na no,

²⁴ “Inya kamo pala so asa ka nizpi, ta citahen ko.” Meyratateng am maniring jira am, “Sino ngaran na kano asyasing a yadomket do nizpi ang.” Maniring sira am, “Si Kaysa.”

²⁵ Maniring si Yeso jira am, “O monganay ji Kaysa am itoro nyo ji Kaysa. O monganay ji Ama ta do to am itoro nyo ji Ama ta do to.”

²⁶ So ikabo no makala da do ciriciring ni Yeso a iraherahet da sya do tangain da no tao. Ta nipeyzokab da o nitovis na jira ni Yeso. Am ori o ji da na meyzezyaki.

Nanao na ni Yeso so keypirwa na pa mavyay no nimawakwak rana tao

²⁷ Aro o tao a macyagom do Satokay a mangay a mapacici si Yeso. Sira rana ori am ji nganoyong do keypirwa pa mavyay no nimawakwak rana tao.

²⁸ Maniring sira am, “Mo Mangnanao, o nanao ni Moyse am no mawakwak o tao a kabo no anak na am pasakain no kakteh na o mavakes na a keyyan no komownongan no kakteh na rakeh do karawan.

²⁹ No kakwa pa am amyan so papito a meyketeketeh. Mapapapen o rakeh jira am ji nimeytaodtod a kawakwak na rana.

³⁰ Mawakwak rana am pasakain na o mavakes ang no tomonton jira. Mawakwak ori am abo taodtod na.

³¹ O ikatatlo da am akman sang a kato da twatontonan a meyketeketeh a mahap so mina kahanghangan no mina rakeh jira. Mawakwak sira am abwata o mina taodtod da.

³² Mownay am mawakwak rana o mavakes ang.

³³ Manngwa, no marateng o araraw no keypirwa mavyay no tao am sino jira ang o manoyong a mapeykahanghangan so sang. Ta nimamimin sira o papito a meyketeketeh ori a nimapasakay sya.”

³⁴ Maniring si Yeso jira am, “O tao do karawan sicyakwaya am yamapapapen o mahakay. Sira macivahavahay o mavakes.

³⁵ O tao a peyvangonen ni Ama ta do to no makwa a mangay do teyngato am ji sira meypinazagpit an.

³⁶ Ta akman sira so tinsi do yanan ni Ama ta do to a jyawakwak rana. Anak na sira ni Ama ta do to, ta nipeyvangon na sira.

³⁷ Do nivatvatkan na ni Moyse a ciriciring am katenngan ta o kanoyong da nimavyay rana no nimawakwak a tao. Ta nimamizing na o ciring ni Ama ta do to do amlila tazici a manci no, ‘Yaken rana am Tao do to na yaken ni Apolahan a kani Isa kani Yakebo.’

³⁸ O peypeypangayan no ciriciring eya am si Ama ta do to rana am Tao do to da no mavyay a omanoyong jya tao. Tana nimawakwak rana, avyain na sira. Ta o tao rana do tangain ni Ama ta do to am mamimin a mavyay sira.”

³⁹ Amyan so mangnanao no iwawalam ni Ama ta do to a manci no, “Mo Mangnanao, yatey yapya o ciriciring mo.”

⁴⁰ Nimacipinda no kano nang o kaji da na makadketan ji Yeso a pacicin.

Sivovoong na ni Tawey o Misayya

⁴¹ Maniring si Yeso jira am, “Ikongo da pancyan no Misayya no tao a sivovoong ni Tawey.

⁴² Ta maniring si Tawey do nivatvatkan a anwanood am, ‘Maniring si Ama ta do to do Panirsirngen ko am: Amlisna ka do wanan ko,

⁴³ mangay si balinasen ko sira o macioya jimo a tao.’

⁴⁴ Abneken na ni Tawey a Panirsirngen na o Misayya am ikongo peysivovoongan na syaha.”

Pazimanen na sira o mangnanao no iwawalam ni Ama ta do to

⁴⁵ Amizngen da pa no aro a tao o ciriciring na ni Yeso am amyan pa so ciring na do macinanao jya. Maniring jira am,

⁴⁶ “Azimanen nyo sira o mangnanao no iwawalam ni Ama ta do to an. Ta da ikakza o da kapeyyaywayob so pipya ayob a mangonong do rararahan a komakzeb so tao a omraralay nira. No somdep sira do peyneynozyan am mangay sira amlisna do lilisnan no meynakem a tao. Akman so sang no macyakakan sira, ta amlisna sira do pamanongan na.

⁴⁷ Littan da o vao a mavakes do kahap da so kangangay da, kato da ngidan so inozi da mapakapyapya so nakem. Sira rana ori am mangay o kangay na jira no rako a peyoyaoyyan na ni Ama ta do to.”