Locya 2 - Seysyo No Tao

Cinatazak na tao ni Yeso

¹ No kano nang am amyan so ciring na no panirsirngen da no Loma a meyngaran si Kaysa Awkoseto. Maniring am, “Inyo rana ko italamozong a tao do Loma am mamimin kamo a mangay a mapadket so ngaran nyo.”

² Ori pa so kapadket da so ngaran da no kapeypanirsirngen da si Cidino do Sidiya.

³ So nikamimin da no tao a mangay do ili da mapadket so ngaran da.

⁴ So nikapo na ni Yoseyvo do ili da do Nasale a macinapnap do Cyadidi a mangay do Yotay. So nipakaranes na rana do Podiheng a cinatazakan na tao ni Tawey, ta si Yoseyvo rana am sivovoong na ni Tawey.

⁵ So ipacihza ni Madiya ji Yoseyvo a mangay a mapadket so ngaran da, ta nitoro na rana o tamtamek da jira. Am no kano nang am mamlis so kanen rana si Madiya.

⁶ Amyan sira do Podiheng am vehan na rana ni Madiya.

⁷ So nikatazak na rana no kabnekan na anak a mahakay. Am ori o nivangnan da sya no milakayob a kapangay da sya do pamangamanganan so baka, ta abo rana o yanan da do iseysanan.

Ononongan da no tinsi do mapamangamangan so kagling

⁸ O mapamangamangan so kagling a tao do ahep a amzat do kagling da do masngen do Podiheng am,

⁹ to ngyan so tinsi na ni Ama ta do to a mapacita jira. So nicirayan na sira no oyowyat na ni Ama ta do to. Am ori o nikanyahey da.

¹⁰ Am maniring jira o tinsi am, “Ji kanyo anyaheyan, ta yamyan so apiya ciriciring a ko ipanci jinyo. O ciriciring rana ya am rako a sarasaray no tao do karawan an.

¹¹ Sicyaraw rana ya am yanimatazak a tao o asa ka Panirsirngen nyo do karawan eya do ili ni Tawey. Iya rana am si Kizisto a mapatazadang jinyo do teyngato.

¹² So ipakacita nyo so asa ka minalikey a kanakan a mivangen so milakayob a miray do pamangamanganan so baka. Ori rana o tovilan nyo jya.”

¹³ Meyratateng am amyan so aro a tinsi do hanit a macizanod do tinsi ang a somaray ni Ama ta do to. So peycirngan da so,

¹⁴ “Azwazwain takamo si Ama ta do to. Inaoy si itoro na jira do omraralay nya tao do teyrahem o ikapiya no onowned da.”

¹⁵ Karwan da sira no tinsi a mangay do teyngato am ipeysirsiring da no mapamangamangan so kagling a manci no, “Mangay tamo do Podiheng a tomita so na nipaziman jyaten ni Ama ta do to.”

¹⁶ Ori o nikakeykai da nimangay a komala si Madiya kani Yoseyvo a kano miray do pamangamanganan so baka kanakan.

¹⁷ So nipakacita da rana sya kavahangso da so mina ciring da jira no tinsi.

¹⁸ O makamizing sya tao am abo ji meyzokab no ciring da sira.

¹⁹ Si Madiya rana am to na peyyana do onowned na o aro a vazay na kanakenakem na sya do onowned na.

²⁰ Ikongo do mina to mangononong o mina ciring da sira no tinsi, am ori o nisarayan da rana nya ji Ama ta do to no mapamangamangan so kagling a kangay da rana.

Ngaranan da si Yeso

²¹ Mablit o ikawao na araw no kanakan am yongkadan da a meyngongyod a Isedi a tao a kangaran da rana jya si Yeso. O ngaran na rana am nibnek na rana no tinsi no kaji na pa nganan sospa na ni Madiya.

Yangay da si Yeso do rako a panaralayan da.

²² Marateng rana o araraw na no hapan da so iwawalam na ni Moyse do nimangahanas rana mavakes. Am ori o nyangayan da no anak da ni Yoseyvo a kani Madiya do Yelosaleng a patanangen da ji Ama ta do to a mahap so vazay na, ta ori o nitaid na pa ni Moyse a iwawalam da,

²³ akman so nivatvatkan da iwawalam na ni Ama ta do to, “O kabnekan nyo mahakay anak am akmanen nyo so sang a patanangen nyo ji Ama ta do to,”

²⁴ kapangozay da do ipanci na ni Ama ta do to a iwawalam na a mangap so adwa ka voit. No beken a voit am adwa ka hato.

²⁵ No kano nang do Yelosaleng am amyan so asa ka tao a meyngaran si Simoyang. Iya rana ori am makdeng so nakenakem ji Ama ta do to a oyatan no Seyzi. So to na pananalai so makayokod no Isedi a tao.

²⁶ Nipanta na no Seyzi si Simoyang so ipakateneng na do kapakapis na pa so tovoin na ni Ama ta do to a Kizisto.

²⁷ Ikongo do nioyatan na no Seyzi, am ori o nisdep na do rako a panaralayan. Nimacinao no kano nang o kangay da ni Yeso no inyapwan na mangay a mangozay do iwawalam da.

²⁸ Meyratateng am sapopowen na ni Simoyang o kanakan a kasaray na nya ji Ama ta do to. So nipancyan na no,

²⁹ “Mo Ama do to, manoyong o ciriciring mo an. Tana to ko na ngaroi o karawan am,

³⁰ cyaha, ta ko na nimacita o mapatazadang jyamen do teyngato.

³¹ Ta iya o nitovoy mo a somidong so tao do karawan.

³² Iya rana am akmey araw a tomiray so beken a tao do Yotay. So torwan mo no azwazway mo jyamen a Isedi a tao.”

³³ Am ori o niogtwan da nya no inyapwan na no kanakan so ciring na ni Simoyang.

³⁴ So nitoyotoyonan na sira ni Simoyang a kapanci na nya ji Madiya so, “Manoyong o kanakan eya na nipamnekan ni Ama ta do to. Aro omanoyong jya tao. Aro ji nganoyong jya. So ikaro da no tao a maoya nya.

³⁵ Am ori rana o ipatwaw so aro a marahet a nakenakem no tao. Imo rana am akma dey to patovozey so ipangan o onowned mo.”

³⁶ Amyan so asa ka mavakes a panoyonoywan na so ciring ni Ama ta do to a meyngaran si Anna, anak ni Vanoar a sivovoong ni Asiar. Am rarakeh rana ori. Ikapito na kawan nizagpit na do kahanghangan na am mawakwak o mahakay na.

³⁷ O kakawakawan na rana am apat o ikasyam na ngarnan (84). Iya rana am tey makdeng a omraralay ni Ama ta do to. So ipangday na do maraw a kado mahep a ji na mangakaday a meynozi ji Ama ta do to. So ji na ngaroi do rako a panaralayan da.

³⁸ So nipeypasngen na mangay jira a somaray no kanakan ji Ama ta do to a kapeylimwang na rana nya do omnanala sya tao, do kanimalikey na rana no mapatazadang sira do teyngato.

³⁹ Mateyka da rana da Yoseyvo a kani Madiya tomoyotoyon sya no iwawalam da am meysinaoli rana sira do Cyadidi do ili da do Nasale.

⁴⁰ Meyparako rana o kanakan am meypakatkat rana o teneng na, ta oyatan na ni Ama ta do to.

Teneng na ni Yeso no kakanakan na

⁴¹ Mangday so awawan o kangay da no inyapwan na ni Yeso a mamaring so kanen do Yelosaleng. O ingaran da do araraw ori am Iyeci.

⁴² Marateng rana o ikadwa na so ikarwa (12) no kakawakawan na ni Yeso am macihza do inyapwan na.

⁴³ Teyka sira mamaring so kanen am meysinaoli sira mangay do ili da. Am ji da nikatenngan no inyapwan na o kanimavezed na do Yelosaleng.

⁴⁴ “Ala yamacihza si Yeso do karwan no tao,” kwan da no inyapwan na. Ori ji da ngezsangi nya. Kasaraw rana sira niomalam. Am ori o nikalan da rana sya do zipozipos da kano masingkad da tao.

⁴⁵ Ji da kala am to sira rana meysinaoli do Yelosaleng a mangay komala sya.

⁴⁶ Ikatlo na araw am makala da si Yeso do rako a panaralayan da amlisna do avak da omamizing so mangnanao a kapacici na sira.

⁴⁷ O makamizing so ciring na tao am abo o ji meyzokab no teneng na do tovisan na jira.

⁴⁸ Macita da si Yeso no inyapwan na am ipeyzokab da. Am ori o nipancyan na nya jya no ina na so, “Manganako, yaka nimeypanngonngo ya. Yamo jyacita yamen si ama mo a yato ngala jimo?”

⁴⁹ Maniring si Yeso jira am, “Ikongo nyo kalan jyaken. Yanyo jyatenngi yaken a yameyvazay so vazay ni Ama do vahay na?”

⁵⁰ Am ji da azab o peypeypangayan no mina ciring na sira.

⁵¹ So nipacihza na rana jira mangay do Nasale a omamizing so ipanci da jya. Am to na peyyana no ina na do onowned na o akman so sang a mina vazay na.

⁵² To macihza o nakem na ni Yeso do kataotao na a meycyakatkat. So sarayan na nya ni Ama ta do to a kano tao.