Locya 18 - Seysyo No Tao

Payyaingen na do meynozi ni Yeso

¹ Ipanci na jira ni Yeso o payyaingen na sya ipait na sira a meynozi.

² Maniring jira am, “Amyan do asa ka ili so mapacicici a tao. Ji na raralayan si Ama ta do to a ji mapanadnad so icyatatao na.

³ Amyan do ili ang so asa ka vao a mavakes a masangib a mapasyasi jya a manci no alalaw na.

⁴ Am to na nazibwan no mapacicici a tao. Meyratateng am manakenakem do onowned na am, ‘Tana ji ko manaralay a ji mapanadnad so icyatatao ko am,

⁵ yako na ikacilo o vao eya. So ikapyapya rana no kato ko na nidongan sya. Ta maraherahet o kagolo na so cicilwan ko.’ ”

⁶ Maniring pa jira si Yeso am, “Amizngen nyo pala o ciriciring na no mapacici a ji manaralay a tao an.

⁷ Manngwa, ji na amiznga ni Ama ta do to o meyhanhan nya mapasyasi jya do araraw a kado ahehep? Manngwa, peypananayan na sira sidongen?

⁸ Ko pa ciring jinyo am makeykai na inyo a sidongen. Am no meysinaoli ko am manngwa, makakala ko so manoyong a meyhanhan nyaken do karawan eya?”

Tao a macyagom do Vadisay a kano mapeyvazay so deyking a tao

⁹ Ipangamaog na sira o mapakazwazway a ji mapanadnad a tao so payyaingen na sya ni Yeso.

¹⁰ Maniring am, “Amyan so rarwa ka tao a mangay meynozi do rako a panaralayan. O asa ka tao am macyagom do Vadisay. O asa am mapeyvazay so deyking a tao.

¹¹ Meytatanek a meynozi o tao a macyagom do Vadisay am ipanci na o, ‘Mo Ama do to, ko isaray imo, ta ko jyakman so karwan no tao a yamangagom, mangzakza so icyatatao na, manlita. Ko jyakman so mapeyvazay so deyking a tao a yameyraraten.

¹² Ko mangday do ikapito no araw a ipidwa jyangan. Yako kapasina so asa ka vovonongan a yako ipeykingking jimo.’

¹³ Am o mapeyvazay so deyking a tao ori am meytatanek do ngoso no rako a panaralayan. Ji nadkeci o katangara na so hanit a mapalogod so moing na a manci no, ‘Mo Ama do to, ikasyasi mo pa yaken a yameyraraten a tao an.’ ”

¹⁴ Maniring pa si Yeso am, “Ko pa ciring jinyo am no si mangay sira o yararwa ka tao ori am o abneken a apya so iyangay a tao do tangain na ni Ama ta do to am o yamapeyvazay so deyking a tao ori an. So ikabeken a tao a macyagom do Vadisay ori. Ta si Ama ta do to am peypavevehen na sira o mapakarakarang so nakem a tao a kapeypakatkat na sira so ji makazyazyak a tao an.”

Ipanlanlag na ni Yeso sira o kanakan

¹⁵ Amyan so tao a mangay no ananak da ji Yeso a kapanci da ni Yeso a amapwapo sira no lima na. Macita da no macinanao jya am ioya da sira.

¹⁶ Am si Yeso am rarahen na o kanakan a mai do tangain na. Maniring am, “Mai sira o kanakan jyaken do jya an. Ji nyo zazaci sira an. Ta o italamozong na rana ni Ama ta do to a tao am akman sira so kanakan eya.

¹⁷ Pakanakmen nyo an. No ji kamo akman so kanakan so onowned a meyhanhan ni Ama ta do to am ji na inyo nalamozongan ni Ama ta do to an.”

Aro so peymeymasaodan a mowva tao

¹⁸ Amyan so asa ka panirsirngen no tao do Yotay a mangay a mapacici si Yeso. Maniring am, “Ko imo katenngan a tey yapya a mangnanao a tao. Manngwa, makongo ko so wanjin a kapakahap ko so to meyyonong a ikavyay no pahad ko.”

¹⁹ Maniring si Yeso jya am, “Ikongo mo pancyan nyaken a tey yapya. Abo ikararwa na ni Ama ta do to a tey yapya an.

²⁰ Mo jyatenngi o iwawalam ni Ama ta do to? ‘Ji ka to mangzakza so tao. Ji ka manwakwak. Ji ka manakaw. Ji ka mangamaog so malas a ciring. Ikaglaw mo a ikanig o inyapwan mo.’ ”

²¹ Maniring o tao ori am, “Nimapo no kalyalikey ko a kangay na sicyaikwaya o ko nipeyvazay so akman sang.”

²² Mamizing na ni Yeso o ciring na am patonggalan na. Maniring am, “Am yasa ka vazay pa o mo jya nimahap. Miminen mo a ipanazang o kangangay mo a itoro do ipangoyongoyod da tao. Ta ori o iyan na no keynakman mo do teyngato, a kapacilolo mo rana jyaken.”

²³ Mamizing na o ciring ni Yeso am marahet o aktokto na, ta tey yaro o kangangay na.

²⁴ Macita na ni Yeso o kamoymoyngan na am ipanci na o, “Tey masalit o meynakem a tao a italamozong na ni Ama ta do to an.

²⁵ Mowwamek pa o meykavokovokoz so likod a baka a lomyos do lala no rayom a kano aro so peymeymasaodan a tao a macikaop do italamozong na ni Ama ta do to.”

²⁶ Mamizing da no tao o ciring na ni Yeso am tonggalan da. Maniring sira am, “No akman so sang am sino o patazadangen na ni Ama ta do to do teyngato.”

²⁷ Maniring jira si Yeso am, “O ji da amaog no tao am mamaog na ni Ama ta do to an.”

²⁸ Maniring si Pite am, “Namen to ngaroi o kavavahay namen a namen kapacilolo jimo.”

²⁹ Maniring si Yeso am, “Ka jyalas. Am ko pa ciring jinyo am o to ngaro do kavavahay da kano kahanghangan na kano kakakteh na kano inyapwan na kano ananak na mahap so vazay ni Ama ta do to am,

³⁰ arwaro pa o padpehen na jya sicyakwaya. No makwa kapeyvangon no tao am mahap na rana o to meyyonong a ikavyay no pahad na an.”

Ipitlo na ni Yeso a mapaziman so kawakwak na

³¹ Lovoten na ni Yeso o macinanao jya a kapanci na nya jira so, “Tanyo meypangay do Yelosaleng. O mina ciring da no panoyonoywan na so ciring ni Ama ta do to a omagaz jyaken a Nipamnekan na ni Ama ta do to a tao am mamimin rana a mangononong an.

³² Ta itoro da yaken do beken a tao do Yotay. So peyyaliliman da jyaken, peymetdehan da jyaken, kacicipa da jyaken,

³³ kasipsipzot da pa jyaken a wakwaken. Am no si ikatlo na araw am mirwa ko pa a mavyay.”

³⁴ Am ji da azab o ciring na ni Yeso no macinanao jya.

Niwakwakan na ni Yeso o mavota a mahakay

³⁵ Meypasngen rana si Yeso do Yedike a ili am amyan so asa ka mavota tao amhezsad do siri no rarahan a macikakanen.

³⁶ Mamizing na o aro a meyhatay a tao am pacicin na sira.

³⁷ Maniring sira o tao jya am, “Yameyhatay do jya o tao do Nasale a meyngaran si Yeso.”

³⁸ Am ori o nilololos na a manci no, “Imo rana mo Yeso a sivovoong ni Tawey am kasyasi mo pa yaken an.”

³⁹ Ori o nioyyan da nya no manma mangonong a tao do kalololos na. Am ikavevevek na amlololos a manci no, “Imo rana sivovoong ni Tawey am kasyasi mo pa yaken an.”

⁴⁰ Am ori o niseyked na ni Yeso a manci no tao a mai no mavota tao do tangain na. Macisngen o tao ori am pacicin na ni Yeso. Maniring am,

⁴¹ “Ikongo mo kakzeben jyaken.” Maniring o tao ori am, “Mo Panirsirngen, ko ikakza o ko kapakacita.”

⁴² Maniring si Yeso jya am, “To ka na makacita an. Ta yaka manoyong a meyhanhan ni Ama ta do to. Ori o mo ikapya rana.”

⁴³ So to na rana makacitai no tao. Meyratateng am macilolo rana ji Yeso, kasaray na nya ji Ama ta do to do pangonongan na. Macita da no aro a tao o vazay ori am abo ji naray nya ji Ama ta do to.