Locya 17 - Seysyo No Tao

Kalittan a meyraraten

¹ Maniring si Yeso do macinanao jya am, “O raraten no tao am kangay na ori. Am o tao a yapwan na am ney rako na o oyaoya na no akman sang a tao ni Ama ta do to.

² Ta o akman rana sang a tao am apyapya rana o kapila jya mangay itbong do awa. Ta maraherahet o kapeypalanginan na no ji makapatak nya a tao do peyraratenan da.

³ Azimanen nyo an. No meyraraten o kakteh nyo am vavagan nyo an. No si mamlis am to nyo peykabobwa o raraten na.

⁴ No ipipito a meyraraten jinyo do kasaraw a kapangday na manci nya jinyo so, ‘Cyaha, ta mamlis ko na,’ am to nyo peykabobwa o raraten na jinyo an.”

Rako a nakenakem da no meyhanhan ni Ama ta do to

⁵ Maniring sira o nipamnekan na ni Yeso a omlivolivon no ciriciring na am, “Ipanta mo yamen so rako a onowned namen ji Ama ta do to an.”

⁶ Maniring si Yeso am, “Tana akman kamo so alikey a vettow no nappa so kakdekdeng no nakem am tana to mo nirsirnga o kayo a manci no, ‘To ka botbot a kangay mo amlida do awa,’ am jyabo kaji na ngonotan jinyo a.

Vazay no lamlamsoy a tao

⁷ “No si myan jinyo so tao a mapeylamlamsoy so meymowamowa kano mapamangamangan so kagling am no nimapo rana do vazay na am manngwa, ipanci nyo jya o, ‘Lisna jito a kakan mo.’

⁸ Jyabo kakman nyo sang a. Ji nyo mancyan jya o, ‘Alici rana o ayob mo a kapanotong mo pa nyaken so yaven ko. Si mabsoy ko rana am ori o yakan mo.’

⁹ No teyka na rana o vazay na no lamlamsoy am manngwa, isaray na no lawpan na jya? Jyabo a.

¹⁰ Akman kamo so sang an. No teyka nyo a peyvazain o vazay na jinyo ni Ama ta do to am ji kanyo mapakazwazway an. Ta adan ori a vazay no omraralay ni Ama ta do to a tao.”

Niwakwakan na ni Yeso o asa ngarnan (10) a omlabyab so kolit a tao

¹¹ Meypangay si Yeso do Yelosaleng am meyhatay do peyyawwan no Samadiya kano Cyadidi.

¹² So nyangay na do asa ka ili do dang. Amyan so asa ngarnan (10) a omlabyab so kolit a tao a mangay sominmo sya. Am ori o nipeytatanek da do marai pa,

¹³ amlololos a manci no, “Mo Yeso, Panirsirngen namen, ikasyasi mo pa yamen eya an.”

¹⁴ Macita na sira ni Yeso am ipanci na jira o, “Angay kamo ipacita o kataotao nyo do mapatanatanang so nakem ji Ama ta do to.” Mangay sira am todapya rana sira.

¹⁵ Maliliw na no asa ka tao jira o kanimapya na rana no kataotao na am meysinaoli pa a somaray nya ji Ama ta do to,

¹⁶ a kapeylilitod na do tangain na ni Yeso a somaray nya jya. O tao rana ori am tao do Samadiya.

¹⁷ Maniring si Yeso do aro a tao am, “Da kasa ngarnan no yanimapya so kataotao ori am wanjin jya sira o yasasyam.

¹⁸ Ikongo na ikaveyvow a yasomaray nya ji Ama ta do to a beken a Isedi a tao.”

¹⁹ Maniring si Yeso jya am, “Tanek rana kangay mo na. Ta yaka manoyong a meyhanhan ni Ama ta do to. So mo ikapya rana no kataotao.”

No mirwa meysinaoli si Yeso

²⁰ Amyan so tao a macyagom do Vadisay a mapacici si Yeso. Naknakmen da o ipakateneng da do ipakasasnad na no talamozongan na no tao ni Ama ta do to. Maniring si Yeso am, “O talamozongan na ninyo ni Ama ta do to am beken a todacita no mata ori an.

²¹ Abwata o tao a manci no, ‘Cita pala, ta yamyan do jya.’ Ta o italamozong na ni Ama ta do to am yamyan do onowned no tao.”

²² Maniring pa do macinanao jya am, “No marateng o araraw na am tana ikeykakza nyo o kapakacita nyo jyaken a mai a omahap jinyo am jyabo kapakacita nyo jyaken a.

²³ Amyan so tao a manci nya jinyo so, ‘Cita pala, ta yamyan do kwang si Yeso.’ ‘Cita pala, ta yamyan do jya.’ Am ji nyo ngonoci sira an.

²⁴ Ta o araraw na no yai ko a Nipamnekan na ni Ama ta do to am abo ji makacita sya tao, akmey meycicilat a maniray.

²⁵ Am manmanma o keyyan no aro a alalaw ko do peymakarwan da jyaken no tao sicyakwaya.

²⁶ No meygegcin o Nipamnekan na ni Ama ta do to a tao am akman so cinasasaodan da da Noya no kakwa.

²⁷ No kaji na pa meykehnepan am to sirangned so ninyakan a kapazagzagpit da mangay do araraw no isdep da rana da Noya do avang da. Am meykehnep rana am nimamimin sira nimabalinas.

²⁸ O araraw na no ipeysinaoli ko am akman no kapeyigegen na pa ni Lote. O tao no kano nang am nikoman sira. Nimanazang sira. Nimhakakaw sira. Nimeypinapinan sira.

²⁹ Marateng o araw no ikaro na ni Lote do Sotoma am pakasen na rana ni Ama ta do to o apoy a kano makwat a vato a kamimin da nimaliman.

³⁰ O araraw no yai ko a Nipamnekan na ni Ama ta do to a tao am akman so sang.

³¹ “O araraw na no nang am jindep do vahay da o myan do atep no vahay a mangap so apzapzatan. Akman sang o myan do nihakawan da, ta ji sira to ngoli.

³² Naknakmen nyo o mavakes na ni Lote a nimapaoli so mata na a kapeyvaliw na a tomigzang a asin.

³³ Omnakenakem so ipeypapya na tao am ji na meypapyan ori. O mawakwak no vazay ko am dompeh jira o ikavyay no pahad da.

³⁴ Ko pa ciring jinyo am do ahep no nang do ipeysinaoli ko am o rarwa ka tao a mitkeh do asa ka ititkehan am o asa jira o ahapen ko. O asa am vezeden ko.

³⁵ O rarwa ka mavakes a manworod so kanen da am asa ahapen ko. O asa am vezeden ko.

³⁶ [O rarwa ka mahakay do nihakawan da am asa o ahapen ko. O asa am vezeden ko.]”

³⁷ Pacicin da no macinanao jya. Maniring sira am, “Mo Panirsirngen, do wanjin mangay na kasasnadan no akman sang a vazay ang.” Maniring si Yeso jira am, “O yanan no nimawakwak a omalalam am ori o pacilolwan da no meyyasasalap.”