Locya 15 - Seysyo No Tao

Payyaingen na do nimavozaw a kagling

¹ O mapeyvazay so deyking a kano aro a meyraraten a tao am mai sira do tangain ni Yeso a omamizing so ciring na.

² Am ori o nipeyyahhahes da no tao a macyagom do Vadisay a kano mangnanao no iwawalam na ni Ama ta do to. Maniring sira am, “Ikongo yana ipacihanghang do aro a meyraraten a tao.”

³ Meyratateng am ipanci na jira ni Yeso o payyaingen na sya.

⁴ Maniring jira am, “No si myan jinyo so mapalam so asa poo (100) a kagling a kavozaw no asa am makongo so wanjin ori. Jyabo kaji na tongriyan do asyam so ipakapoo (99) a kagling a kangay na komala so nimavozaw a asa ka kagling na.

⁵ No makala na am jyabo kaji na narayan a somabway nya ioli a.

⁶ No ioli na rana am rarahen na o kagagan na kano kataib na kapanci na rana no, ‘Ko masaray, ta ko rana nimakala o yanimavozaw a kagling ko. Sijya kamo, ta isaray tamo pa.’

⁷ Ko pa ciring jinyo am no mamlis o asa ka meyraraten a tao am arakorako pa o sarasaray do teyngato a kano asyam so ipakapoo (99) a tanwasiwasi a tao a jyakza no kapamlis da.

Payyaingen na do nimabo so nizpi a tao

⁸ “No si amyan so asa ka mavakes a meynizpi so asa poo a kabo na no asa ngarnan am makongo so wanjin ori. Jyabo kaji na meyzampwan amviyas do vahay na kalan na sya.

⁹ No makala na am rarahen na o kagagan na kano kataib na kapanci na nya jira so, ‘Ko masaray, ta ko nimakala o yanimabo a nizpi ko. Sijya kamo, ta isaray tamo pa.’

¹⁰ Ko pa ciring jinyo am o tinsi na ni Ama ta do to am akman so sang a somaray no asa ka mamlis a meyraraten a tao.”

Payyaingen na do nimeysinaoli a nimavozaw a kanakan

¹¹ Tongtongan na o ciring na ni Yeso am ipanci na pa o payyaingen na sya. Maniring jira am, “Amyan so asa ka tao a meytaodtod so rarwa ka mahakay.

¹² Maniring o ananak do ama na am, ‘Mo ama, to mo na norwan jyaken o vonong ko do kangangay ta.’ Meyratateng am vonongen na o kangangay na do rarwa ka anak na.

¹³ Makanateng so araraw am nimimin na no ananak o vonong na nipamalit na so nizpi. Mahap na o nizpi am karwan na rana o vahay da kangay na matarek do asa ka ili. Meyratateng am to nazestes do araraw o peyvwakan na so nizpi na do peyyowyawan na.

¹⁴ Magid o nizpi na am nimacinao o kapeykakcin do dang. Am ori o nikatey rahet na abo so ipangakaday.

¹⁵ Am ori o nyangay na macivahay do tao do dang. Meyratateng am tovoin na no pacivahain na mapakapakan so korang,

¹⁶ kaji na rana nganan so yorahen da do kabo no tao a marilaw nya.

¹⁷ Mownay am manakenakem. Am ori o nipancyan na no, ‘Yajyavilangi o lamlamsoy ni ama. Yajyagiji o kanekanen da do vahay namen. Am ikongo yako ipacikekcin do jya.

¹⁸ Apyapya rana o kapeysinaoli ko ji ama kapanci ko nya jya so, Mo ama, ko nyalalasan si Ama ta do do a yako kalalas jimo an.

¹⁹ Ji mo abneka yaken a anak mo. To mo na abneka yaken a lamlamsoy mo.’

²⁰ Meyratateng am meytatanek rana a meysinaoli do ama na. Marai pa do vahay da am to na cita no ama na karilaw na nya. So nipalalayo na amrapong sya kayapet na sya apwapwen.

²¹ Maniring o anak na am, ‘Mo ama, ko nyalalasan si Ama ta do to a yako kalalas do akman jimoo. So ji mo na abneki jyaken a anak mo an.’

²² Maniring o ama na do lamlamsoy na am, ‘Pangapey kamo so ney yapiya na ayob na, kapasaong nyo jya so tamtamek namen, kapantan nyo nya so tokap na,

²³ kangay nyo mangap so singasingeh no vinyay namen a pamaringan ta so kanen.

²⁴ Ta o anak ko rana ya am yakmey nimawakwak a na kavyay rana. Ta yakmey nimabo a apzapzatan a na kapeytotwaw rana.’ Am ori o nipakapya da nisomaray nya.

²⁵ “Omoli rana o rakerakeh a anak na nimapo do hakawan da am mamizing na rana o somaray do vahay da.

²⁶ Am ori o nitawagan na do asa ka lamlamsoy da pacicin.

²⁷ Maniring o lamlamsoy na am, ‘Na nimacita ni ama mo si wari mo a yapya so kataotao a yanimai rana. Am ori o na nipangapan nya so ney yapiya na do vinyay nyo.’

²⁸ Mamizing na no rakerakeh a anak na am to rana meyoyaoya. Am ori o ji na nisomdepi. Mamizing na ni ama na am ipanci na macilimot jira.

²⁹ Maniring do ama na am, ‘To mo na naknakman, ta yako rana jyatenngi o zikzikna ko so vazay ta a yaji mapasobna do ciriciring mo. Am ikongo nakenakem mo jyaken. Yabwata pa o asa ka kagling a mo mina nakem jyaken a ipanaotao ko so kagagan ko.

³⁰ Am si wari rana am yana nipeyvwak o kangangay mo do na peyvozawan. Yameysinaoli am yamo ipangap so ney yapiya na vinyay ta.’

³¹ Maniring o ama na am, ‘Manganako, imo rana am ka macivahay jyaken an. O kangangay ko am miminen mo ori a amoonen an.

³² Am si wari mo rana am yakmey nimawakwak a na kavyay an. Yakmey yanimabo a apzapzatan a na kapeytotwaw rana an. Am ori o ji na alasi no kasaray ta nya an.’ ”