Locya 14 - Seysyo No Tao

Niwakwakan na o meyngen a tao ni Yeso

¹ Ipisa kapeywalam no tao am mangay macyakan si Yeso do asa ka tao a macyagom do Vadisay do vahay da. Am ori o nileylamdaman da sya no maoya nya tao.

² Amyan do tangain na so asa ka tao a meycyalipalipad so limalima a kano aiyai.

³ So nipacicyan na sya ni Yeso so aro a mangnanao no iwawalam ni Ama ta do to a kano tao a macyagom do Vadisay. Maniring am, “Manngwa, iwawalam ta o kapangiwakwak so tao do ipeywalam no tao an.”

⁴ Am ji sira meyzezyak. Am ori o nipinanan na ni Yeso do tao a keywakwak na jya katovoy na sya mangay rana.

⁵ Maniring do aro a tao am, “Sino jinyo o to macipanadeng do nimakas do tovong a minapodpod do kataotao nyo a kano vinyay nyo a ji ngapa do ipeywalam no tao.”

⁶ Mamizing da o ciring ni Yeso am ji da na tenngi a pasapan.

Nanao na so kaji mapakarakarangan so kataotao

⁷ Macita na ni Yeso o macihanghang jya a tao mangay omlisna do apya a lilisnan am nipanci na jira o payyaingen na sya.

⁸ Maniring am, “No nipanoyon da inyo no mamaring so kanen a tao am ji kanyo lisna do pamanongan na an. Ta amyan pa so meyneynakem pa ka ninyo a tao da an.

⁹ Ta maraherahet o kapanci na ninyo no meykanekanen a tao amlisna do lilisnan no ji meynakem a tao. No si akman sang am jyabo kaji nyo meylatlatlatan a komaro do lilisnan nyo.

¹⁰ No ipanoyon da inyo am mangay kamo amlisna do ney manowji rana lilisnan an. Apyapya kananala nyo so meykanekanen a tao a mapalisna jinyo do pipya lilisnan, ta ori o ji nyo meylatlatlaci do tangain no aro a tao da.

¹¹ Ta o mapakarakarang a tao am mangay na pavevehen ni Ama ta do to. O ji makazyazyak a tao am peypakatkaten na sira ni Ama ta do to.”

¹² Maniring si Yeso do tomaotao sya a tao am, “No manaotao ka am ji ka manaid so kagagan mo a kano kakteh mo a kano zipos mo a kano katenngan a tao a kataib mo. Ta patonggalan da o kanekanen mo.

¹³ No manaid ka am taidan mo sira o ji makahakaw a tao a kano makasapa tao a mavota a mapilay a tao.

¹⁴ Ta ori o ikapya mo, ta sira rana ori am abo patoplis da jimo. No mirwa a mavyay o pipya so nakenakem am patoplisan na ni Ama ta do to.”

Payyaingen na do rako a pamarimaring so kanen

¹⁵ Mamizing na no asa ka tao a macihanghang ji Yeso am amyan so ciring na jya. Maniring am, “Tey rako o sarasaray da no macihanghang do italamozong ni Ama ta do to a tao.”

¹⁶ Tovisan na ori ni Yeso am payyaingan na o asa ka ciring. Maniring am, “Amyan so meykanekanen a tao a manaid so aro a tao na.

¹⁷ Marateng o araraw no ipamaring da so kanen am manovoy so lamlamsoy na do nitaidan na tao. Maniring jira am, ‘Sijya kamo na, ta yana nipeykakasa o aro a kanekanen.’

¹⁸ Am mamimin sira ji ngonot jya. Maniring o asa ka tao am, ‘Ko kapanazang pa so hakawan. So ko yangay a tomita pa sya. So ji mo ngozai jyaken an.’

¹⁹ Maniring o asa ka tao am, ‘Yako nimanazang so yasa ngarnan a baka. Ko yangay abwabwangen pa sira do ko palaman sira. Kapakamo mo am ji ko angay.’

²⁰ Maniring o asa ka tao am, ‘Ko kapapapen pa. Am ori o ji ko angai.’

²¹ Meysinaoli o lamlamsoy na am ipanci na o ciring da do lawpan na. Mamizing na am to na meyoyaoya. Maniring do lamlamsoy na am, ‘To ka nangay do ili a manara so ji makahakaw a tao a kano makasapa kano mavota kano meycyapilapilay.’

²² Meyratateng am to na mangozai no lamlamsoy na o ciring na. Meysinaoli am ipanci na do lawpan na, ‘Ko na nimimin a nipeyvazay o ciring mo am yapa myan so lilisnan a yakabwan no tao.’

²³ Maniring o lawpan do lamlamsoy na am, ‘To ka nangay do rararahan a manara so tao kapno da do vahay ko.

²⁴ Ko pa ciring jinyo am o ney manma na nitaidan ko a tao am abwata jira o tomaham do nipanam ko a kanen.’ ”

Ivavaga na do macilolo jya

²⁵ Aro sira tao a macihza ji Yeso. Paolin na o mata na sira am amyan so ciring na jira. Maniring am,

²⁶ “O mai jyaken a tao a kapahamahama da so inyapwan da kano kahanghangan da kano ananak da kano kakakteh da kano kataotao da ikaglaw am ji sira meyngongyod a abneken ko a macilolo jyaken.

²⁷ No myan so manyahey no kawakwak no kataotao da a macilolo jyaken am ji ko sira abneka a meyngongyod a macilolo jyaken.

²⁸ Sino jinyo o ji nakenakem so paringen na a rako a vahay, manngwa, makanet o yamaog ko sya an? No ji makanet.

²⁹ Ta no teyka na rana o aiyai na a paringen na a kabo rana no yamaog sya am jyabo kapakamaog pa sya. No macita da no tao am jyabo kaji da namwadan sya,

³⁰ a manci no, ‘Asyo tao eya a to nivang do vazay na a ji pakavosa.’

³¹ No myan so asa ka panirsirngen a mapalolo so asa laksa (10,000) tao a mangay a omarap so mapalolo so adwa laksa (20,000) tao am jyabo kaji na naknakman so kaji da makasangahan sira.

³² No naknakmen na o kaji na makasangahan sira am jyabo kaji na manovoyan so asa ka tao a mangay a mapasyahahap so nakenakem da.

³³ Akman kamo so sang an. Ta no si likodan nyo o makakaday a vazay nyo am ori o ikanoyong nyo a macilolo jyaken.

Abo so angangayan a asin

³⁴ “O asin rana ya am abo karatan na an. Am no si tomavang ori am ikongo pavowin a kapait na.

³⁵ So ikabwata no angangayan na rana. Apyapya rana kato patpehan sya do tana a iwasik. Am ori o amizngan nyo sya an, peyyanen nyo do onowned nyo ori an.”