Locya 13 - Seysyo No Tao

Mamlis so nakenakem

¹ No kano nang am amyan so tao a manci nya ji Yeso so, “Yamapatanang sira o Cyadidi a tao so nakem da si Ama ta do to am na to wakwaka sira ni Pilato.”

² Maniring si Yeso am, “Manngwa, nyo ipanci sira o tao do Cyadidi a yarakorako so raraten a kano karwan da? Ori da ikakman sang?

³ Beken a akman sang. Ko pa ciring jinyo am no si ji kamo mamlis am akman kamo so sang a mawakwak.

⁴ No kazday na no makarang a nyatoy da no tao do Siloya am wao so ikakarwan (18) sira o nikazdayan a kapacitopos da. Ji nyo akwan o karakorako no raraten da kano meyvahay do Yelosaleng a tao an.

⁵ Ko pa ciring jinyo am no si ji nyo ablisi o kapeyraraten nyo am akman kamo so sang a macitopos.”

Pehngehngayan na so ciring na do ji meyyasi a kayo

⁶ Meyratateng am mangononong si Yeso so pehngehngayan na sya. Maniring am, “Amyan so asa ka tao a meymowa so ovako a kayo. Mownay am naknakmen na o kapeykala na so asi na am ji makakala.

⁷ Maniring do lamlamsoy na am, ‘Yana katlo a kawan o kayo eya yako nimowa am yapa ji nimeyyasi. So to mo nanbai sya, ta yamanlin.’

⁸ Maniring o lamlamsoy na am, ‘Ji kakman sang so nakenakem. Aidan ta pala so kasa kawan a peyveyveknen.

⁹ Simakseysawan a kapeyyasi na am ori o vezedan ta sya. No si ji meyyasi am ori o atbahan ta na sya.’ ”

Nipeysonong ni Yeso o likod na no mavokoz a mavakes do ipeywalam no tao

¹⁰ Ipisa kapeywalam no tao am mangnanao do peyneynozyan si Yeso.

¹¹ Amyan dang so asa ka mavakes a kovotan no kalamsoyan ni Satan. Nimeyngen a mina kawao so ikarwa (18) so awawan. Am ori o ipeyvovokoz na a ji rana meysonong so likod a tomanek.

¹² Macita na ni Yeso am tawagan na. Maniring jya am, “Mo kavakes, na nikarwan imo rana no ingingnen mo.”

¹³ Paoptahen na o lima na ni Yeso am ji nimeyyahahay ori a matazineng rana so kataotao. Ori o nisarayan na nya ji Ama ta do to.

¹⁴ Macita na no tomalamozong no peyneynozyan si Yeso a mangiwakwak so ingingnen do ipeywalam no tao am meyoyaoya. Maniring do aro a tao am, “Yakanem araw o tamo ipeyvazay. O mangiwakwak so ingingnen rana ya am vazay do kanem araw eya. Am ori o ji pazavozi sya do ipeywalam no tao.”

¹⁵ Maniring si Yeso am, “Inyo rana a mapakapyapya so nakem a tao am manngwa, nyo ji pakana o makakaday a vinyay nyo do ipeywalam no tao?

¹⁶ Yamyan do jya so sivovoong ni Apolahan a yana wao so ikarwa (18) so awawan a na nivaod ni Satan. Manngwa, marahet o kowvay so sang do ipeywalam no tao?”

¹⁷ Mamizing da o ciring ni Yeso no maoya nya tao am meylatlatlat sira. Am nisaray da no aro a tao o mina vazay na jira.

Payyaingen na do likta vettow no nappa

¹⁸ Maniring si Yeso am, “Akman so wanjin paro o italamozong na ni Ama ta do to. Ikongo payyaingen ko sya.

¹⁹ Oyowyat na ni Ama ta do to do talamozongan na ninyo am akman so likta vettow no nappa a mowahen no tao do peymowamowan na. No amlida rana am akma raney kayo a peyvahayan no meyyasasalap.”

Payyaingen na do mimway a odong

²⁰ Maniring si Yeso am, “Ikongo o payyaingan ko so italamozong na ni Ama ta do to.

²¹ Oyowyat na ni Ama ta do to do talamozongan na ninyo am akman so kosozi no odong a ahapen no mavakes a pazavozen do odong a ipeymway na sya.”

Alikey a asdesdepan

²² Kakadain na ni Yeso o aro a ili a pangnanawan na a meypangay do Yelosaleng.

²³ Pacicin na no asa ka tao. Maniring am, “Mo Panirsirngen, manngwa, apeleh o tao a patazadangen na ni Ama ta do to do teyngato?” Maniring si Yeso jya am,

²⁴ “Makowyat kamo a omyavayo so macicya onowned nyo. Ko pa ciring jinyo am aro tao a makza no kasdep da macikaop do italamozong na ni Ama ta do to. Am ji sira makasdep a macikaop jira.

²⁵ No aneban na rana no mapeyvahay sya am meytatanek kamo do pantaw a mapaktoktow a manci no, ‘Mo kahakay, iwangan mo pa yamen an.’ Jyabo kaji na mapeyciringan sya jinyo so, ‘Ji kamo makamo am ko jyatenngi o nyo kapwan.’

²⁶ No maniring kamo am, ‘Nimaciyop namen jimo asyo a kapangnanao mo do ili namen asyo.’

²⁷ O itovis na jinyo am, ‘Ko jyatenngi o nyo kapwan. Kazey kamo a yameyraraten a tao!’

²⁸ No si macita nyo si Apolahan a kani Isa kani Yakebo a kano aro a panoyonoywan na so ciring ni Ama ta do to a yamacikaop do italamozong ni Ama ta do to am inyo o tovoin da do pantaw a kapeylavilavi nyo a mapeygazicigit so ngepen nyo a maneneseh.

²⁹ Amyan so aro a nimapo do peycyeylilyan na a macihanghang do italamozong na ni Ama ta do to.

³⁰ O nimacipanownowji a tao am panomanomahen na sira an. O nimacipanomanoma tao am pangain na sira do panowjyan na an.”

Ikarilaw na ni Yeso o tao do Yelosaleng

³¹ No kano nang am amyan so tao a macyagom do Vadisay a mangay ji Yeso. Maniring sira am, “Apyapya o kakaro mo do jya a mangay do matarek a ili. Ta na vovwan ni Helote o na kawakwak jimo.”

³² Maniring jira si Yeso am, “Mangay nyo ipanci do yakmey votdak ang, ta sicyaraw a ka simaraw am mamozwaw ko so kalamsoyan ni Satan a kapangiwakwak ko so meykeyngeyngen a tao. Ikatlo na araw am pakavosen ko o vazay ko.

³³ Tana akman sang am sicyaraw a ka simaraw na ka simakseysaraw na am jyabo kaji ko angayan do Yelosaleng a. Ta do dang o nikawakwakan da no panoyonoywan na so ciring ni Ama ta do to. So ikakman ko sang.

³⁴ “Inyo rana tao do Yelosaleng am nyo niwakwak o panoyonoywan na so ciring ni Ama ta do to a nyo kabhebhes jira wakwaken so yana nitovoy ni Ama ta do to a lamlamsoy na jinyo. Ko ikakza o kapahawa ko jinyo do kanginanawan nyo akman so manok a komalopkop so anak na no panid na. Am nyo jyakzan.

³⁵ So peymakarwan na jinyo ni Ama ta do to. Am ko pa ciring jinyo am ji nyo rana cita yaken an, todangay do pancyan nyo no, ‘Azwazwain ta o mai a nitovoy ni Ama ta do to.’ ”