Locya 12 - Seysyo No Tao

Paziman na ni Yeso do tanwasiwasi a tao

¹ No kanang am meycyalaklaksa o tao a meysilisilin. Am ori o nipacizasazasag da so ai. Meyratateng am panomanomahen na ni Yeso o kananao na so macinanao jya. Maniring am, “Azimanen nyo o iyangay da no tao a macyagom do Vadisay. Ta akmey yapya do cittan sya am beken a manoyong sira an.

² O taywen rana vazay am abwata o ji meytotwaw. O ji meycicicyan a vazay am akman sang a katenngan da no tao.

³ O taywen nyo a ciring nyo am akmey ciring nyo do maraw, apya amyamizngan da no tao. O ciriciring nyo do kavahayan nyo am ipeylimwang da a patwawen no aro a tao.

Si Ama ta do to o ikanyahey ta

⁴ “Ko pa ciring jinyo manga keypong am ji nyo anyaheyan o omwakwak so kataotao nyo a tao an. Ta ji da wakwak o pahad nyo. So ji nyo a mogawi.

⁵ Ko pa ciring jinyo am sino manoyong a ikanyahey nyo. O ikanyahey nyo am o mahap so pahad nyo a kawalit na pa nya do kararatan. Ori rana am si Ama ta do to ori. So ika iya na no ikanyahey nyo.

⁶ Jyabo kahamang na jinyo ni Ama ta do to a. Kakwakwan da no likta meyyasasalap ori a na manakem ni Ama ta do to am imanngo kamo.

⁷ Am ori an, ji nyo anyaheyan. Ta yarakorako o nakenakem na jinyo a kano meyyasasalap. Tana avok nyo am na nimimin rana nivilangan.

Omanoyong ji Yeso a kano ji nganoyong jya

⁸ “Ko pa ciring jinyo am omanoyong jyaken do tangain no tao am anoyngan ko ori do tangain ni Ama ta do to a kano aro a tinsi.

⁹ Omalalas jyaken do tangain no tao am alalasan ko ori do tangain ni Ama ta do to a kano aro a tinsi.

¹⁰ Omraherahet jyaken no ciring a Nipamnekan na ni Ama ta do to am mavonas pa ori. Am o omraherahet sya no ciring so Seyzi am to rana meyyonong a jyavonas o akman sang a raraten.

¹¹ “Tana rakpen da inyo a yangay do peyneynozyan a kangay da ninyo a pacicin do tangain no panipanirsirngen am ji nyo alawan o ipasapa nyo jira an.

¹² Ta nanawen na inyo no Seyzi a mapasapa jira.”

Omagom so peymeymasaodan a tao

¹³ Amyan do aro a tao so asa a mapacici si Yeso. Maniring am, “Mo Mangnanao, ipanci mo pa o kakteh ko a kavonong namen so nimataid ji ama icyalaw an.”

¹⁴ Maniring si Yeso am, “Mo kahakay, sino yamanci nimo a tomeneng jyaken a omvonong so kangangay nyo.”

¹⁵ Maniring jira am, “Azimanen nyo kaji nyo mangagoman so meykamadadayan an. Ta tana meynakem o tao ori am beken a ikapintek na do karawan ori.”

¹⁶ Meyratateng am mangononong si Yeso so payyaingan na sya. Maniring am, “Amyan so asa ka katenngan a tao. Iya rana ori am tey yaro nihakawan na.

¹⁷ Manakenakem do onowned na am, ‘Meypanngonngo ko ya, ta jyabo kapakangay no asyasi no nihakawan ko do vahay ko a.

¹⁸ No komwan am peyparakwen ko saon o vahay ko a sokzan ko so asyasi no nihakawan ko a kano aro a warawara ko,

¹⁹ a kanakenakem ko sya do onowned ko so, Yajyarahet o aro a peymasaodan ko a. O yamasokoz do vahay ko am tana to ko na valivalyat do awawan a kakan so naknakmen am ikongo ikarahet ko pa.’

²⁰ Am no maniring si Ama ta do to jya am, ‘Oyod mo kasagpyan a tao. Sicyamahep rana ya am komavos rana o allag no kataotao mo. Manngwa, sino omamoon so aro a peymeymasaodan mo a yamasokoz do kavavahay mo ang.’ ”

²¹ Pakavosen ni Yeso o ciring na am ipanci na o, “Sira rana o yamanokoz no kataotao da so peymeymasaodan da am beken a katenngan a tao do tangain ni Ama ta do to o akman sang a tao an.”

Ipeyhanhan si Ama ta do to

²² Maniring si Yeso do macinanao jya am, “Ko pa ciring jinyo am ji nyo a ratan o kanen nyo a kano ayob nyo.

²³ Ta maharahara pa o ipeyigegen nyo do karawan a kano kanen nyo. Meyneynakem pa o kataotao nyo a kano ayob nyo.

²⁴ To nyo nita o meyyasasalap an. Ta sira ji hakaw, sira ji manlangi, yabo da panonokozan so kankan da. Ta na avyavyain sira ni Ama ta do to an. Jyabo nyo kajyakdekdengan pa kano meyyasasalap a.

²⁵ Manngwa, ikapintek nyo o kalaw nyo no kawakwak nyo?

²⁶ No si anoyngan nyo ori am ikongo peypeypangayan no kaozoz nyo no makakaday a vazay nyo.

²⁷ Citahen nyo pala o vonitan. Ta yaji meyvazay a yaji ninon so ayob na. Am ko pa ciring jinyo am apyapya pa o vonitan a citahen a kano mina aywayob na no meyngaran so Solomen a panirsirngen no kakwa.

²⁸ O tamek rana am amyan pa sicyaraw eya. Am simaraw am mahayo rana a kapasleb rana sya do apoy. Tana akman sang o tamek a ji meyyonownay do tana am yana padketan ni Ama ta do to so na ikazway a savong na. Kakwakwan na rana no tamek am imanngo kamo na. Ta jyabo kaji na mantan ninyo so ayob nyo a. Am nyo kaji makanetan so nakenakem ji Ama ta do to.

²⁹ Am ori o ji nyo alawi no kanen nyo a kano yopen nyo.

³⁰ Ta ori rana am naknakmen da no ji manaralay a tao. Am inyo rana am na katenngan ni Ama ta do to o nyo kakzeben no nakem.

³¹ So ikapinsan na no kakza nyo no katalamozong na ninyo ni Ama ta do to. Ta ori o torwan na nya jinyo so apyahen nyo no nakem.

Peymasaodan do teyngato

³² “Inyo rana a macilolo jyaken am ji kanyo anyahey an. Ta isaray na ni Ama ta do to o katalamozong na ninyo.

³³ Ipanazang nyo o peymeymasaodan nyo a isidong nyo so ji makahakaw a tao. So ikanoyong nyo amyan do teyngato so peymasaodan a kano kangangay, ta abo dang o tao a tomakaw sya. Abo dang o vozsok a koman sya. So ikanoyong na no peymeymasaodan do dang a ji nyo a giji.

³⁴ Ta o yanan no peymeymasaodan nyo am pacilolwan no onowned nyo an.

Omnanala si Yeso a meysinaoli pa mai

³⁵ “Inyo rana am azimanen nyo o iwawalam nyo,

³⁶ akman so lamlamsoy a tao a omnanala so lawpan da nimapo do mamaring so kanen a nimeysinmo a tao. Ta no makaranes do vahay na o lawpan am iwangan da no lamlamsoy na o pazevngen.

³⁷ Meysinaoli o lawpan am macita na o lamlamsoy na a yapiya so nakenakem. Ori o nisarayan na nira. Ko pa ciring jinyo am jyabo kaji na meyyaywayob no lawpan a mapalisna sira a kangay na tomaotao so lamlamsoy na.

³⁸ Tana mahay o lawpan a mai kapiya no nakenakem da am isaray na sira a ipanlanlag an.

³⁹ Naknakmen nyo o yameykasayan. Ta no katenngan no mapeyvahay sya o araraw no yai no manakaw a tao am jyabo kapakatakaw no manakaw ang.

⁴⁰ Am ori o ipeytataziman nyo an. Ta ji nyo a tenngi o araraw no ipeysinaoli ko do teyrahem a Nipamnekan na ni Ama ta do to a tao.”

Ipeyhanhan a kano ji meyhanhanan a lamlamsoy

⁴¹ Maniring si Pite am, “Mo pakacirngen jyamen ori an? No mo pakacirngen do karwan no tao.”

⁴² Maniring si Yeso am, “Sino o ipeyhanhan a tey mapatak a lamlamsoy. Iya rana am ipeyhanhan no lawpan a omaponged no vahay na do kapeyyangangay na so isovo da kanen no karwan no lamlamsoy na.

⁴³ No mai o lawpan a kapakacita na so lamlamsoy na makapeyvazay so vazay na am manoyong ori a ipanlanlag na.

⁴⁴ To ko na macitangayan jinyo am manoyong rana o akman sang a lamlamsoy a pahanhanen no lawpan a tomalamozong no peymeymasaodan na.

⁴⁵ Am no maniring o onowned no lamlamsoy na am, ‘Cyaha, ta yapa mahay o lawpan ko a yamai. Sipsipzotan ko o aro a lamlamsoy na a kapaciyoyop ko so saki.’

⁴⁶ No to ngai o lawpan do araw no nang am jyabo kaji na pakarwan so lamlamsoy na. Ji na bakbaki ori a pazanoden do ji na meyhanhanan a tao a.

⁴⁷ Ta o ji ngonot do ciring na no lawpan a lamlamsoy am tey rako oyaoyyan na no akman sang.

⁴⁸ Am o ji makateneng do ciring no lawpan a keyyan no marahet a vazay na am alikelikey o oyyan na nya. Akman sang, ta no aro nipahanhan na jimo a vazay ni Ama ta do to am aro kakdain na jimo.

Yapwan no ipeyvwak no tao

⁴⁹ “O ko nyai am ko peyhekasen o apoy do teyrahem. Inaoy no si manoyong rana masleb.

⁵⁰ Ko akmey todaliliw o yamai jyaken a rako a alalaw ko. Do na yanam pa no alalaw ko am yako tey mazikna so onowned.

⁵¹ Nyo ipanci yaken a yameygegcin no ikapya nyo so nakem do icyatatao nyo an? Beken a ori o ko nyai, ta ko nyai do karawan o ikasyasyay nyo.

⁵² Ta papwen sicyakwaya o ikasyasyay da no lalima do vahay da. O tatlo am ji sira macipaswasovoy do rarwa jira.

⁵³ So yanam no kapeyrahet da so nakenakem. O meyyama kano meyina kano meycyeycyarwa do vahay am ji sira macipaswasovoy.”

⁵⁴ Maniring do aro a tao si Yeso am, “No macita nyo o rako a cinalab a apo do keylawdan am makeykai nyo a katenngan o kacimoy na rana.

⁵⁵ No malangin do kapyan na am katenngan nyo kapamseng na.

⁵⁶ Inyo rana a mapakateneteneng a tao am nyo katenngan o kacita nyo so palapalanginan am ikongo nyo ji makatenngi do vazay ni Ama ta do to sicyakwaya.

⁵⁷ “Ikongo nyo ji naknakmi so apipya vazay nyo.

⁵⁸ No makasinmo ka so tao a pacioyyan mo am apyapya o to nyongbowa so marahet a vazay nyo do pangonongan nyo. Ta maraherahet o kangay na nimo do mapacici a tao a kaneb da jimo do pamemtengan.

⁵⁹ Ko pa ciring jinyo am no si katorwan mo na o ahapen da jimo a nizpi do kalasan mo am ori o ipakagag mo so kataotao mo.”