Locya 11 - Seysyo No Tao

Nanao na sira ni Yeso a meynozi

¹ Ipisa kapateyka na ni Yeso so inozi na am amyan so asa ka macinanao jya a manci nya jya so, “Mo Panirsirngen, nanawen mo yamen a meynozi an, akman si Yowani a nimnanao so macinanao jya.”

² Maniring si Yeso jira am, “No meynozi kamo am inarahen nyo ya an. ‘Mo Ama do to, inaoy ano si mamimin o tao a zomwazway so meylimwang a ngaran mo. Inaoy si italamozong mo o karawan.

³ O kanen namen sicyaraw eya am itoro mo jyamen.

⁴ Vonasen mo o raraten namen akman jyamen a ji mapeyyan sya do onowned so raten da jyamen no icyatatao namen. Ji mo yamen amya kalittan.’ ”

⁵ Maniring si Yeso do macinanao jya am, “No si myan jinyo so mangay do kagagan na do avak no ahep a kapanci na no, ‘Mo kahakay, mamood ko pa jinyo so atlo a ka myanpaw an.

⁶ Ta na kapakaranes pa no kagagan ko. So na ikabo no ko itaotao sya.’

⁷ No si maniring o kagagan na amyan do sahad am, ‘Kapakamo mo am ji mo yokaya yaken. Ta yamaneb rana o pangengneban, ta namen mitkeh kano anak ko. Am ori o ko ji makarawarawai so kapeyvangon a manta nimo.’

⁸ No si akman sang am meypanngonngo ka. Ko pa ciring jinyo am beken a kapeykagagan da o kapanta na nya. Ta na ahapen do kaji na nimtadan a mapasyasi jya. So nipantan na nya.

⁹ Am ori o ko pancyan nya jinyo an. Makowyat kamo a meynozi, ta ori o ipakahap nyo so apyahen nyo no nakem. Makowyat kamo a komala si Ama ta do to, ta iya o yanan no kakzeben nyo no nakem. Makowyat kamo a tomawag ji Ama ta do to, ta iya o makasidong jinyo.

¹⁰ Ta o mapasyasi jya kano komala sya kano tomawag jya am sidongen na sira.

^11-12 Sino jinyo o manta no minapodpod jinyo so mavowaw a kano alilipwan no macyami sira jinyo so among a kano icyoy.

¹³ Kakwakwan nyo a meyraraten a tao a yamakateneng do kapanta no anak nyo so ney pipya a kanekanen a imanngo rana si Ama ta do to. Ta jyabo kaji na mantan ninyo no amin nyo jya o Seyzi a.”

Yeso a kani Peysepo

¹⁴ Nivozwaw ni Yeso o asa ka kalamsoyan ni Satan. Iya rana ori am vazay na kakovot na do ji makabnebnek a tao. Vozwawen na ori am makabnebnek rana o tao. Ori o nisavasavakan da nya no aro a tao.

¹⁵ Am amyan jira ori so tao a manci no, “Iya rana ori am na nioyatan ni Satan a ngaranan da Peysepo. Ori o na ipakavozwaw so kalamsoyan ni Satan a komovot do tao.”

¹⁶ O karwan da am naknakmen da o keyleylamdam da sya. Am ori o kakzeban da si Yeso a mapacita no oyowyat na manoyong a nimapo ji Ama ta do to.

¹⁷ Katenngan na ni Yeso o keyleylamdam da sya. Maniring jira am, “Abwata asa ka mahataw a macizakazakat. So icyakman na sang no asa ka vahay a ji macizakazakat.

¹⁸ No si masyakakan ni Satan a kano kalamsoyan na am ji da rana pakongo o kabedbed da. To da ranavwaki. Nyo ipanci yaken a na oyatan ni Peysepo.

¹⁹ Ikongo nyo ji manci no kararay nyo a nipanta ni Peysepo so oyowyat.

²⁰ No si manoyong ko a mamozwaw no oyowyat ni Ama ta do to am yamanoyong rana si Ama ta do to a tomalamozong no omanoyong jya tao sicyaikwaya.

²¹ “No si apzatan no tao no voovoo o peymeymasaodan da kano kavavahay da am jyabo kaji na makapzatan jya.

²² Am no si myan so mowyowyat pa tao a mangay omrapong sya am jyabo kaji na makavozcinan so voovoo na katakaw na so warawara na.”

²³ Nipanci na pa ni Yeso am, “O ji nganod jyaken am mapasobna jyaken an. O ji nidong jyaken am zazatan na o vazay ko an.

Meykala o kalamsoyan ni Satan so peyvahayan na

²⁴ “Mavozwaw o kalamsoyan ni Satan do tao am omlivolivon a meykala so peywalaman na. Am ji makakala. Maniring am, ‘Yapyapya rana o kapeysinaoli ko pa mangay komovot do nikovotan ko a tao.’

²⁵ Meysinaoli am macita na o tao ang a makownong rana jya. Ta abo nimacipalit a nikomovot jya.

²⁶ So nyangay na manara so papito a masozisozi pa ka nya a kalamsoyan ni Satan a mangay komovot jya. Manngo tao ori a. Jyabo kaji na rehrehtan pa sicyaikwaya no nakenakem na kano kakwa.”

Manoyong a sarasaray

²⁷ Kapyahen na meyzezyak si Yeso am to ngyan do aro a tao so asa ka mavakes. Maniring am, “O niomalavat jimo a kano niomazwazovo jimo am tey yapya.”

²⁸ Maniring si Yeso am, “Manoyong ori am omamizing so ciring na ni Ama ta do to a kapeyvazay na sya am tey yapya o akman sang a tao!”

Kakdain da no ji manganwanoyong a tao

²⁹ Rapongen da si Yeso no aro a tao am amyan so ciring na ni Yeso. Maniring jira am, “Yatey rako o raraten no tao sicyaikwaya. Ikongo da kakzeban so da kapakacita so oyowyat na ni Ama ta do to. Am o akman so mina vazay ni Ama ta do to do meyngaran so Yena o macita nyo. So ikabo no maharahara pa kano nang a macita nyo.

³⁰ O nimacita da ji Yena a oyowyat ni Ama ta do to no tao do Niniwey am akman sang o oyowyat ko a Nipamnekan na ni Ama ta do to a macita da no tao sicyakwaya.

³¹ No marateng o araraw no ipacici na mapeykapyapinpin so tao ni Ama ta do to am o mavakes a panirsirngen da do Siba a ili no kakwa pa am meytatanek a omraherahet jinyo a tao sicyakwaya. Ta iya rana ori am nimapo do marai a ili mangay a omamizing so ciring na no panirsirngen a meyngaran si Solomen. Ko pa ciring jinyo am yamyan do jya so rakorako pa so vazay a kani Solomen am nyo ji ngamiznga.

³² No marateng o ipacici na mapeykapyapinpin so tao ni Ama ta do to am meytatanek sira o tao do Niniwey a omraherahet jinyo a tao sicyaikwaya. Ta mamizing da o ciring ni Yena am mamlis rana sira. Ko pa ciring jinyo am yamyan do jya so yarakorako pa so vazay a kani Yena am yanyo ji ngapa o nanao na jinyo.”

Zezak no kataotao

³³ Maniring si Yeso am, “Abwata o tao a tomayo so nipaciscisan a zampo a katoong na sya. O pinaciscisan a zampo am pangain do pakacittan sya. So ipakacita da no somdep a tao.

³⁴ O mata nyo am akmey zezngang no kataotao nyo an. No si apiya o mata nyo am akmey mazngang o pangonongan nyo an. No si marahet rana o mata nyo am masari rana o citahen nyo.

³⁵ Am ori o azimanan nyo so onowned nyo. Ta si mablis o zezak no onowned nyo am mangay o kangay nyo do kasarisaryan.

³⁶ No si apya o nakenakem nyo a abo so karatan am akman kamo so sang a to maniray an. Akman so mazngang a apoy a somoo jinyo.”

Marahet a iyangay da no tao a macyagom do Vadisay a kano mangnanao no iwawalam ni Ama ta do to

³⁷ Mateyka a meyzezyak si Yeso am amyan so asa ka tao a macyagom do Vadisay a amrara sya koman do vahay da. Ori o nyangay na ni Yeso.

³⁸ Macita no tao a macyagom do Vadisay si Yeso am yeyyak na do kaji na mavanawan a todey angan.

³⁹ Maniring si Yeso jya am, “Inyo rana tao a macyagom do Vadisay am nyo ji peylolita o kakanan nyo am onowned nyo am yamapno no yamakakaday a nyo peyraratenan.

⁴⁰ Inyo rana ji mamayok a tao am manngwa, nyo jyatenngi na kapakateneng do kataotao nyo a kano onowned nyo ni Ama ta do to?

⁴¹ So ikazonos nyo a manta no ji makahakaw a tao. Ta ori o akma ney ikatnaw no onowned nyo an.

⁴² “To kanyo makasi a tao a macyagom do Vadisay. Tana mapasina kamo so ipeykingking nyo ji Ama ta do to so meykamadadayan a monganay jinyo am yanyo to nazibwan o pangangarilawan na ni Ama ta do to a kano nakenakem nyo so icyatatao nyo. Ta ori rana am ji to nazibwan o akman sang a vazay an.

⁴³ Inyo rana tao a macyagom do Vadisay am to kanyo makasi an. Ta nyo ikakza o nyo kalisna do pamanongan no peyneynozyan a kado karwarwan no tao a komakzeb so da kararalay ninyo no tao.

⁴⁴ Am ori o to nyo makasi an! Ta yakanyo akman so jyasingkaji a heseb no tao a jyaziman no mangonong a tao. Tana hapen da o icicirawat nyo no tao am ji da tenngi o karahet no onowned nyo.”

⁴⁵ Amyan so asa ka mangnanao no iwawalam ni Ama ta do to a mapacici si Yeso. Maniring am, “Mo Mangnanao, o ciring mo rana am yamo to mimina yamen a pazagomen?”

⁴⁶ Maniring si Yeso am, “Inyo rana ya am tey makasi kanyo an. Ta yatey yaro o yamasalit a vazay a nyo ipanci do tao a peyvazain da. Am inyo am yanyo ji patodotodwa o yasa ka tanoro nyo a yanyo isidong sira.

⁴⁷ So to nyo makasi an! Ta nyo peyveyveknen o heseb da no panoyonoywan na so ciring ni Ama ta do to no kakwa a niweywakwak da no ineynapo nyo.

⁴⁸ Am ori o nyo icyakmey macizanod so nakenakem do ineynapo nyo a yanimwakwak so aro a panoyonoywan na so ciring ni Ama ta do to.

⁴⁹ Am o mina ciring na ni Ama ta do to am, ‘Manovoy ko so panoyonoywan ko so ciring ko a kano nipamnekan ko a tao a omlivolivon no ciriciring ko a mangay jira. Am wakwaken da sira o karwan da. Am o karwan da am peyraraheten da sira.’

⁵⁰ Inyo rana a tao sicyakwaya am mamwamoon jinyo o peyoyaoyyan ni Ama ta do to do aro a panoyonoywan na so ciring na a niwakwak da a nikapo na do nikamaog no karawan an,

⁵¹ a nimapo ji Yapo kangay na do meyngaran si Sacyadiya a niwakwak da do panaralayan a masngen do patanatanangan so nakem si Ama ta do to. Ko pa ciring jinyo am mamwamoon do tao sicyakwaya o oyaoyyan na nira ni Ama ta do to.

⁵² Inyo rana yamangnanao no iwawalam ni Ama ta do to am to kanyo makasi an! Ta nyo to ngimongan o teneteneng ni Ama ta do to an. Am nyo jyakzan am nyo ji mya o tao a makateneng jya.”

⁵³ Karwan na do dang ni Yeso am ikazyak da rana no tao a macyagom do Vadisay a kano mangnanao no iwawalam ni Ama ta do to si Yeso. Am ori o nipacicyan da si Yeso no masasalit a vazay,

⁵⁴ do kapeynakem da so kasozib da jya.