Kelosi 4 - Seysyo No Tao

¹ Inyo rana yamapeylamsoy a tao am peyyangangain nyo o nakenakem nyo so peylamsoin nyo a tao. Ta nyo katenngan na keyyan no Tao do to nyo do teyngato a yatomita so vazay nyo.

Nanao na so meynozi

² Makowyat kamo a meynozi. Ji kamo tongwakwan a meynozi. Ta mapo do onowned nyo o inozi nyo a kasaray nyo so onowned ji Ama ta do to.

³ Ipeynozi nyo yamen a kapeypalanginan na nyamen ni Ama ta do to a mangay meylimwang no ciriciring na. So ikanoyong na rana meylimwang no ji da pa nipatwaw no kakwa a nanao ni Kizisto. O yada aptengan jyaken sicyaikwaya am ko nyahap o vazay na ni Ama ta do to.

⁴ Am ori an, peynozyan nyo nyaken a kanoyong ko a ombaba so nanao ni Yeso Kizisto.

⁵ Apzatan nyo o iwawalam nyo a kano ciriciring nyo, ta peycitacittan da inyo no ji manaralay so Tao do to. Makateteneng kamo a meylimwang no nanao ni Ama ta do to jira.

⁶ No meyzezyak kamo am pasaklangen nyo o apiya gamogamo nyo, kapiya da omamizing nya a kateneng nyo a mapasapa do mapacici jinyo a tao.

Manowji rana asyasi na sira

⁷ Si Ticiko rana akma tey kakteh do cinai am ipanci na jinyo o namen kapiya do jya. Iya rana am tey makdeng a mahap so vazay na ni Ama ta do to. So namen ipeyyangay a yamahap so vazay ni Ama ta do to a lamlamsoy na.

⁸ Am ori o ko tovoyan sya yamangay jinyo do dang a manci no namen kapiya do jya a ipait na jinyo so onowned.

⁹ O yamacihza jya am akma tey kakteh do cinai si Onaysemo a tey mowyat so nakem ji Ama ta do to. Iya ori am keylyan nyo. Cyaha, ta ipanci da jinyo no yararwa ang o vazay namen do jya.

¹⁰ Na ipeyminaminasi inyo no yako kararay a yada aptengen do jya si Aditako. O kateysa ni Parnapo a meyngaran si Make am yakman sang a yameyminaminasi ninyo. Si Make rana am nipanci ko na o kapeyseysan nyo pa sya si mangay jinyo do dang.

¹¹ Si Yeso a yada ngaranan a Yoseto am yakman sang a yameyminaminasi ninyo. Do tao do Yotay a sinjya am sira yatatlo ang o kararay ko a mahap so vazay ni Ama ta do to. So ikanoyong da nimakasidong jyaken.

¹² Si Ipava rana a keylyan nyo am yakman sang a yameyminaminasi ninyo. Iya rana am lamlamsoy ni Yeso Kizisto a masangib a meynozi ninyo. Ipeynozi na o kakdeng nyo so nakem ji Ama ta do to a meypahagnat so nakem a manoyong a omonot do nakem na ni Ama ta do to.

¹³ To ko na macitangayan jinyo a tao do Kelosi am aro alalaw na do kasidong na jinyo, pacyangayan nyo a sinjya do Lawticya kado Silapodi.

¹⁴ O akma tey kakteh do cinai a koysang a meyngaran so Locya kani Temase am da ipeyminaminasi inyo.

¹⁵ Ipanci nyo pa da kakteh ta do Lawticya kani Ningva kano yamalwalovot do vahay da sinjya o ko kapeyminaminasi nira.

¹⁶ No si teyka nyo a vilangan o teygami eya am yangay nyo do Lawticya, kavilang da jya do kyokay do dang. O yai da teygami apo do Lawticya am akman sang, ta vilangan nyo pa.

¹⁷ Ipanci nyo ji Asipo, ta pakavosen na o nitoro na jya ni Ama ta do to a vazay.

¹⁸ Yaken rana am si Pawlo ko. Ko meyvatvatek so yako peyminaminasyan ninyo. Ji nyo a hamangi yaken a da aptengen an. Inaoy si mangay jinyo o pangangarilawan na ni Ama ta do to.