Kelosi 3 - Seysyo No Tao

¹ Inyo rana am kamo rana akmey nimacizanod ji Kizisto a nimirwa a mavyay. Am ori an, naknakman nyo kato nyo ngotokotan so onowned a omahap so apyahen na vazay ni Kizisto. Ta iya rana am yamyan do wanan na ni Ama ta do to.

² Makowyowyat kamo a amnakenakem so vazay do teyngato. So ikabeken a vazay do teyrahem no naknakmen nyo.

³ Ta inyo rana am yamyan rana jinyo so vayo a onowned nyo a ji nalamozongan rana no raraten. Ta kamo rana macikaop ji Yeso Kizisto a kani Ama ta do to.

⁴ Si Yeso Kizisto rana am yapwan no to meyyonong a ikavyay no pahad nyo. Si mirwa mai si Yeso am ipanta na inyo so vayo a kataotao nyo a pazanoden do azwazway na.

Peytarkan no adan a kano vayo a onowned ji Kizisto

⁵ Am ori o to nyo peykaboboi so marahet a ikeykakza nyo, akman so mapasagpyan so aktokto a kano makakaday a marahet a aktokto a kano mangagom. Ta o mangagom rana ya am akmey to na raralayan o kakzeben na no nakem.

⁶ O akman rana sang a vazay am peydednahen na jya o peyoyaoyyan ni Ama ta do to do akman sang a ji ngonot jya tao.

⁷ No kakwa pa am nimakman kamo so sang a nitalamozong no adan a nakenakem nyo.

⁸ Am sicyaikwa rana ya am zavaten nyo na o akman sang a vazay. Ji nyo na peyneynama o karahet no iyangay nyo abo so panganyanigan a mapeyyan do onowned so oyaoyyan nyo no tao a mangangavay a mapatwaw so makararahet a ciring.

⁹ Ji nyo palasa o ciring nyo. Ta nyo na nikarwan o adan a nakenakem nyo a kano adan a iwawalam nyo,

¹⁰ kapalit nyo rana so vayo a onowned nyo apo ji Ama ta do to, do na kaji amtadan a yasomidong jinyo a yaomyavayo so icicirawat nyo. Am ori o ikanoyong nyo rana meypahagnat a makateneng ji Ama ta do to.

¹¹ No manoyong kakman ta sang am abo rana peytartarkan ta do tangain na ni Ama ta do to. Tana tao do Yotay a kano beken a tao do Yotay a tana jyapsek a kano mapsek a tao a tana peylamsoin da kano ji da peylamsoya a pacyangayan ta am ta meyyangangay a yarana vayo so onowned ji Kizisto. So ika iya no azwazwain ta.

¹² Si Ama ta do to o yamarilaw ninyo a nimamnek jinyo a akma ney anak. Am ori o ipangarilaw nyo a mapanalawbo so aktokto nyo, ta kapiya nyo so nakem do tangain no tao a jyahayo so onowned.

¹³ Macisidosidong kamo. No amyan so kazyakan nyo no kadwan jinyo am to nyo peykabobwa. Inarahen nyo si Yeso Kizisto a Panirsirngen ta a nimapeykabobo so raraten nyo.

¹⁴ O ney makdeng na do makakaday a vazay am pangangarilawan. Ta o pangangarilawan rana am mapeypayopayok so onowned ta do icyatatao ta.

¹⁵ O nitoro na ni Kizisto a ikapiya no onowned nyo am ipeypalanginan na inyo. Isaray nyo ji Ama ta do to. Ta iya o yanimamnek jinyo akmey yasa so kataotao, do yana kanitomoro nya jinyo so ikapiya no onowned nyo.

¹⁶ Pakolivavahen nyo do onowned nyo o nanao ni Kizisto. Pangozayan nyo o teneng a nitoro na jinyo ni Ama ta do to a macinanannao. Meyyanwanood kamo so Anwanood ni Tawey a kano meyngongyod apo do onowned nyo a yanood nyo si Ama ta do to.

¹⁷ O makakaday a vazay nyo a kano ciring nyo am mamimin a pagazen nyo do ngaran ni Yeso a Panirsirngen ta a somaray nya ji Ama ta do to.

Icicirawat no nimamlis a tao do kavavahay da

¹⁸ Inyo rana mavakes am onotan nyo o kahanghangan nyo. Ta ori rana am adan ta iwawalam a amraralay ni Yeso Kizisto a tao.

¹⁹ Inyo rana mahakay am ikaglaw nyo sira o kataned nyo do vahay a mavakes. Taosya o kangamo nyo sira.

²⁰ Inyo rana minapodpod jira am amizngen nyo o ciring no inyapwan nyo. Ta ori rana am adan ta iwawalam a amraralay ni Kizisto a tao. So sarayan na no akman sang ni Ama ta do to.

²¹ Inyo rana inyapwan da am ji nyo peyleylakan sira o minapodpod jinyo. Ta ikahayo da no onowned a ji ngahap so inanao nyo sira.

²² Inyo rana peylamsoin da tao am amizngen nyo o ciring da no mapeylamsoy jinyo a tao. Ta o vazay nyo rana am beken a tao o pacittan nyo nya, ta omagaz rana do kakdekdeng nyo a amraralay ni Ama ta do to a Panirsirngen ta.

²³ O makakaday a vazay nyo am to nyongdengi a peyvazain a makanakem si Kizisto. So ji na monganai no vazay nyo do tao.

²⁴ Manakem nyo o keyyan no nakem na jinyo ni Kizisto, do kanoyong nyo a makahap rana so nakem na so omanop jya tao. So ikanoyong ni Kizisto a ahapen nyo so vazay.

²⁵ O meyraraten a tao am mamimin sira angayan no peyoyaoyyan na ni Ama ta do to. Ta meyyangangay o ahahapan na so tao do karawan.