Kelosi 2 - Seysyo No Tao

¹ Inaoy si katenngan nyo yaken a tao do Kelosi a ka ninyo a tao do Lawticya a mowyat a meynozi ninyo a kano aro a tao a ji ko pa nimacita.

² O ko ikakman sang am ko kakzeben o kasaray nyo so onowned a masicyakarilaw. So ikapinpin na no nang a ko tey kakza inyo a manoyong rana makateneng do nanao ni Ama ta do to a omagaz ji Kizisto.

³ Si Kizisto o na yanan no makakaday a teneteneng.

⁴ O ko pancyan no akman sang jinyo am ko ihawa o karwan no tao a mapeykawad jinyo no malas a ciring da.

⁵ Tana ko ji ngyan jinyo do dang am cyaha, ta yamyan jinyo o onowned ko. So ko ikasaray a yamakanakem jinyo a mowyat so onowned a meyhanhan ni Kizisto.

Peypeypangayan no kararalay ni Kizisto

⁶ Inyo rana am nyo anoyngan si Yeso Kizisto a Panirsirngen ta. Am ori o panadnadan nyo sya an.

⁷ Payamoten nyo o nanao na ni Yeso Kizisto do onowned nyo a kapeypahagnat nyo na so nakenakem jya. So sarayan nyo nya ji Ama ta do to.

⁸ Makapzat kamo. Ji nyo ngonoci o mapeycyakawad jinyo a nanao no tao do karawan. Ta o akman rana sang a nanao am apo do tao no kakwa. So ji na monganai ji Kizisto no da ipamizing jinyo.

⁹ Ta yamanoyong o nakem na ni Ama ta do to a yarana nimacimalag ji Kizisto.

¹⁰ Yakamo rana a macikaop ji Kizisto. Am ori o nyo rana ipakahap so to meyyonong a ikavyay no pahad nyo. So na ikanoyong a Panirsirngen ta, ney manokdwan na do karawan.

¹¹ So na rana iyan no yongkad nyo a yamonganay ji Ama ta do to a tao, do nyo kapacikaop ji Kizisto. Am o yongkad rana am beken a monganay do kataotao. Ta yamonganay ori ji Kizisto, do na kaniomyavayo so onowned nyo.

¹² Ta o peypeypangayan no da kataktak jinyo am yongkad no kapacizanod no raraten nyo a yakmey nimacikawakwak ji Kizisto. So icyakman nyo sang a akmey to nimacizanod ji Kizisto a nimirwa a mavyay, do kanoyong nyo do mapeyzokab a oyowyat na ni Ama ta do to a nimapeyvangon sya.

¹³ No kakwa pa am abo pa jinyo o to meyyonong a ikavyay no pahad nyo, do keyyan no raraten nyo a nimacisyay ji Ama ta do to. Am kanimapazanod na jinyo ji Kizisto a avyain ni Ama ta do to, do kanimvonas na rana so raraten ta ni Ama ta do to.

¹⁴ Nipeyyopowpas no rala ni Yeso Kizisto o domket a raraten ta a ji ngahap so iwawalam ni Moyse.

¹⁵ Na nibalinas ni Yeso Kizisto no jyojika na o oyowyat ni Satan. So na ikanoyong a yarana nimharag sya do tangain no tao do karawan.

¹⁶ Am ori an, ji nyo rana ingnan no onowned do kazyakan da ninyo no tao a jingdeng so nakem do adan a icicirawat nyo a omagaz do pamarmarngan nyo so kanen a kano ipeyweywalam no tao.

¹⁷ O ahahapan da sya no tao do Yotay no kakwa am ji pa meyngongyod ori. Ta akmey avwavong ori. Am o vazay ni Kizisto a ta macita am ori o meyngongyod a makasidong jyaten a macikaop ji Ama ta do to.

¹⁸ Ji nyo ngonoci sira o mapakateneteneng a tao a manci no kapakacita da so mapangyangyalak a vazay a kano tanwasiwasi a amraralay no tinsi. Ta mapehes jinyo o akma ney nakem jinyo ni Ama ta do to. Ta o akman rana sang a tao am to da mangozangozai o nakem da a tanteneteneng.

¹⁹ Sira rana am ji sira rana macikaop ji Yeso Kizisto. Ta si Yeso Kizisto rana am Panirsirngen ta a yamraralay nya tao. So ta icyakmey kataotao na. No macikaop ta na ji Kizisto a yamraralay nya am ori o ipeypahagnat ta rana so onowned, do kapakateneng ta rana do manoyong a nanao na ni Ama ta do to.

²⁰ Inyo rana yameyngongyod a macikaop ji Kizisto am ji nyo rana pasaklanga o adan a marahet a icicirawat nyo, do nyo kaji ngonotan rana do adan nyo a icicirawat. Am ikeykongo kamo ya a yapa macizavoz do icicirawat da no tao do karawan,

²¹ a yaro pa so yamakanyaw a yamangozay do ciring da no tao no kakwa a manci no, “Ji nyo minani oya. Ji nyo nganna ori.”

²² Manoyong o kabo no peypeypangayan no akman sang a iwawalam no tao. Ta o meycyamadadayan a isovo a kanen am makeykai a gomcin do kataotao.

²³ No citahen sira o amraralay no tinsi a kano tanwasiwasi a kano mapeyzaza so kataotao da manaralay so malas a iraralay am akmey apiya sira. Am sira rana am ji da pariparing o aktokto da do kataotao da. So ikabo no peypeypangayan na.