Kelosi 1 - Seysyo No Tao

¹ Yaken rana am si Pawlo ko a lamlamsoy na ni Ama ta do to a yana nipamnekan ni Yeso Kizisto a omlivolivon no ciriciring na. Yaken rana kano akma tey kakteh do cinai a si Timotay am,

² yanamen ipeyteygami inyo a yameyili do Kelosi a sinjya a yatey makdeng so nakem ji Kizisto. Inaoy si itoro na ni Ama ta do to o pangangarilawan na kano ikapiya no onowned nyo.

³ No namen ipeynozi inyo am namen masangib a isaray ninyo ji Ama ta do to a Ama na ni Yeso Kizisto a Panirsirngen ta.

⁴ Ta namen rana nimamizing o nakenakem nyo si Yeso Kizisto a kano aryarilaw nyo so aro a sinjya.

⁵ Ta no kavavayo nyo pa nimakamizing so Mapasaray a Ciriciring na ni Ama ta do to am to nyo na nganoyngi o itoro na jinyo ni Ama ta do to do teyngato.

⁶ Beken a inyoo o na peylimwangan no Mapasaray a Ciriciring na ni Ama ta do to, ta yarana nimeylimwang do peycyamahamahatawan na. So da rana ipamlis no tao. So da icyakman jinyo a yarana makateneng do pangangarilawan na ni Ama ta do to.

⁷ Nyo nimahap o pangangarilawan na ni Ama ta do to ji Ipava a kararay namen a yaji mapasaklang do vazay ni Yeso Kizisto.

⁸ Iya o nimanci nya jyamen so katey mangarilaw nyo so icyatatao nyo, do kaniomoyat na jinyo no Seyzi.

⁹ Mamizing namen inyo am masangib namen a meynozi ninyo. Ipeynozi namen o kapanta na ninyo no Seyzi so makakaday a teneteneng a makateneng do nisidongan na jinyo ni Ama ta do to a kano peypalanginan na ninyo.

¹⁰ No si akman sang am manoyong kamo na macipayok so vazay ji Yeso Kizisto a Panirsirngen ta, do kahap nyo so vazay na a meypahagnat rana so onowned a makateneng rana ji Ama ta do to.

¹¹ Ta iya rana am tey mowyat. So namen peyhanhanan nya a makasidong jinyo a jyamama no makakaday a alalaw a masaray rana so onowned.

¹² Isaray nyo si Ama ta do to. Ta iya o yanimapanop jinyo a yamraralay nya. So nyo ikanoyong rana yamyan do kazngangan.

¹³ Na nyagag yaten do kasarisaryan a na kaparapong jyaten do italamozong no Anak na ni Ama ta do to.

¹⁴ Nyagag na yaten ni Yeso Kizisto do peyraratenan ta. So ta ikanoyong rana nimavonas so raraten.

Si Kizisto a kano vazay na

¹⁵ Si Kizisto rana am akma ney kamamagenan ni Ama ta do to. So na ikanoyong ney manhama na do makakaday a nyamamaog na.

¹⁶ Iya o nyamaogan na sya ni Ama ta do to so hanit a kano karawan a kano meycyamadadayan a yamacita kano yajyacita, pacyangayan no yajyacita so oyowyat a kalamsoyan ni Satan a kano tinsi na ni Ama ta do to. So na ikanoyong a tey mazway a Tao do to.

¹⁷ Jya nimamaog pa o makakaday am amyan rana si Kizisto. So ika iya na no tomalamozong no yamakakaday.

¹⁸ Yaten rana a yamraralay nya am akma ney kataotao yaten ni Yeso Kizisto. So ika iya na no yameymatmatngeh nyaten. Iya o na yapwan no to meyyonong a ikavyay no pahad ta. Iya am Anak na ni Ama ta do to a nimirwa mavyay. So ika iya na no ney manokdwan na do karawan.

¹⁹ Ta kakdain na ni Ama ta do to o Anak na macikto jya so kadmayan.

²⁰ Tana teyrahem a tana teyngato am yana nimimin a nitoro ji Yeso ni Ama ta do to. Ta iya rana am na nikawakwak yaten do jyojika. So na ikabo rana no yamarahet.

²¹ No kakwa pa am abo kasngesngenan nyo ji Ama ta do to, do karahet no onowned nyo a kano vazay nyo. So nikanoyong nyo akmey mapeykavosoyan si Ama ta do to.

²² Am sicyaikwaya am nikawakwak na rana yaten ni Yeso Kizisto a Anak na ni Ama ta do to. Am ori o yanyo rana ipacikaop ji Ama ta do to. O icyakman na sang am kakzeben na inyo a ji meylimoteng so onowned a abo so karatan do tangain na.

²³ Am ori an, ji nyo na pasalai do nimamizing nyo pa no kakwa a Mapasaray a Ciriciring na ni Ama ta do to. Ta to kamo ngotokot so onowned a meyhanhan ni Ama ta do to a manta ninyo so to meyyonong a ikavyay no pahad nyo. So na rana nipeylimwangan no akman sang a nanao do karawan. So yako ikanoyong a lamlamsoy na ni Ama ta do to a meylimwang no ciriciring na.

Sidongen ni Pawlo o omraralay ni Yeso a tao

²⁴ Tana tey rako o alalaw ko sicyaikwaya am cyaha, ta o akman rana sang am ipakasidong ko jinyo a meypahagnat so nakenakem a omraralay ni Yeso. Am ori o ko isaray, ta ipakasidong ko so omraralay ni Yeso Kizisto a tao. Ta nimakman sang si Yeso Kizisto a nimawakwak no omraralay nya tao.

²⁵ Yaken rana am lamlamsoy na yaken ni Yeso Kizisto a somidong so yamraralay nya tao. O na nitorwan nya jyaken so akman sya vazay ni Ama ta do to am ipeypahagnat ko inyo. So ikanoyong ko rana meylimwang no ciriciring na ni Ama ta do to.

²⁶ Ori rana am ji da pa nipatwaw no kakwa, a ji da tenngi no tao do karawan. Am na rana nipatwaw sicyaikwaya ni Ama ta do to do amraralay nya tao.

²⁷ O nakenakem na ni Ama ta do to am ikakza na o kapakateneng da no tao do karawan so mapeyzokab a nanao na. Ori rana am si Yeso Kizisto a yarana macikaop jyaten. So yata ikanoyong a macizanod do azwazway na ni Ama ta do to no makwa.

²⁸ Si Kizisto o namen ipeylimwang do aro a tao. Am ori o na ikabo no namen jyasapa rana a ipeylimwang do tao a ivavaga jira, ipaziman sira, a kanoyong da rana a meypahagnat so nakenakem a amraralay ni Yeso Kizisto.

²⁹ Am ori an o ko ikowyat a yameyvazay a ji macimazikna do vazay a mangozay do na kaniomoyat jyaken ni Kizisto a yanitomoro no vazay na jyaken.