Ivoso 6 - Seysyo No Tao

Nanao ni Pawlo so inyapwan a kano minapodpod jira

¹ Inyo rana kanakan am amizngen nyo o inyapwan nyo. Ta ori rana am iyangay ta amraralay ni Kizisto a Panirsirngen ta.

^2-3 “Ikaglaw nyo a ikanig o inyapwan nyo. Ta ori o ipeypapya nyo a peypanokonokow na do karawan ni Ama ta do to do.” So na idket do iwawalam ni Moyse no kaji na ablisan no aglaglaw na so akman sang a tao ni Ama ta do to.

⁴ Inyo rana keynyapwanan da am ji nyo pasozya o anak nyo. Vavagan nyo sira no nanao ni Kizisto a ipeypararako nyo so nakem da.

Nanao na so lawpan a kano lamlamsoy

⁵ Inyo rana lamlamsoy da am onotan nyo sira o lawpan nyo. Ikanig nyo sira. To nyo peynara o nakenakem nyo si Kizisto a mahap so vazay da no lawpan nyo.

⁶ Beken a no mangay da citahen inyo no lawpan o ikakdeng nyo a mahap so vazay da. Ta omaing do kararalay nyo ni Ama ta do to o kasaray nyo a mahap so vazay da, do kakma nyoy kalamsoyan ni Kizisto.

⁷ Ji nyo nginara sira o somoli so lawpan da tao. Manakem nyo o kakma nyoy mahap so vazay ni Ama ta do to, a omahap so vazay no lawpan.

⁸ Manakem nyo o na kato mapeyyangangayan so tao ni Ama ta do to. Tana peylamsoin da am tana beken a lamlamsoy am na to palololwa do kapyapya no vazay na o yazaw na sya.

⁹ Inyo rana yamapeylamsoy so tao a lawpan am makapya kamo so nakem jira an. Taosya o kateywara no oyyan nyo nira. Manakem nyo o kapeyyangay nyo a tao a italamozong no asa ka Panirsirngen ta do teyngato. Iya rana am peyyangangain na o tao a ikarilaw.

Akma tey voovoo a nitoro ni Ama ta do to a iharag ta si Satan

¹⁰ Manga kakteh, oya rana am imanowji rana yako inanao jinyo. Inyo rana am ipeyhanhan nyo o rako a oyowyat no Panirsirngen ta a omzat jinyo.

¹¹ Ahapen nyo o akma nyoy voovoo a na nitoro ni Ama ta do to, ta ori o ipakaharag nyo si Satan no mangay na littan inyo.

¹² Ta yaten rana am beken a ta macililiman do tao. Ta tamo macililiman ji Satan a kano aro a kalamsoyan na yatomalamozong no meyraraten a tao do karawan.

¹³ Am ori o ahapan nyo so akma nyoy voovoo a nitoro ni Ama ta do to a ipaciliman nyo ji Satan a kano kalamsoyan na a yamlita jinyo. Ta ori o ipakaharag nyo sira. So to nyo meyyonongi rana ji da rana litai.

¹⁴ Am ori o ipeytataziman nyo a mapeyyabtek so manoyong a nanao na ni Ama ta do to. Kalokalen nyo o apya icicirawat nyo a omaing ji Kizisto.

¹⁵ Akma nyoy tokap o kapeylimwang nyo no Mapasaray a Ciriciring a mapanop so tao ji Ama ta do to.

¹⁶ O peyhanhanan nyo ni Kizisto am akma nyoy sirong a izazat nyo do akmey apoy a ilita na jinyo ni Satan.

¹⁷ Ipeyhanhan nyo si Ama ta do to a mapatazadang jinyo. Ta akma nyoy sakop o kapatazadang na jinyo ni Ama ta do to. Peyyanen nyo do onowned nyo o Ciriciring na ni Ama ta do to. Ta ori rana am akma nyoy cinalolot a nitoro na jinyo no Seyzi.

¹⁸ Miminen nyo ori a ipeynozi ji Ama ta do to a kasidong na jinyo. Abo ji nyo meynozyan a tomala so Seyzi a meypalanginan ninyo. Ori o ipeytataziman nyo. Ji nyo amtadan o kapeynozi nyo no akma nyoy kakteh do cinai.

¹⁹ Ipeynozi nyo yaken an, katoro na nya jyaken ni Ama ta do to so ciriciring na ipangnanao ko. Ta ori o ji ko a mamai no ji da pa nipatwaw no kakwa a Mapasaray a Ciriciring na ni Ama ta do to a ipeylimwang ko.

²⁰ Ori an, yako iyan do pamemtengan. So yako alitan ji Kizisto a yameylimwang no Mapasaray a Ciriciring na. Ori o peynozyan nyo nyaken a kaji ko macimamman no ciriciring na ipeylimwang ko. Ta ori o peypeypangayan no na nipamnekan jyaken.

Peyminaminasyan na nira ni Pawlo

²¹ Si Ticiko a kakteh ta do cinai a yamakdeng a yamahap so vazay na ni Yeso a Panirsirngen ta am cyaha, ta ipanci na jinyo o ko kapiya do jya.

²² Am ori o yako pasonsonan sya mangay a manci nya jinyo so namen kapiya do jya a kapait na pa so onowned nyo.

²³ Inaoy no si itoro na ni Ama ta do to a kani Yeso Kizisto o ikapiya no onowned nyo, a kazagoman nyo a yamraralay ni Ama ta do to, a kapanta na ninyo so manoyong a pangangarilawan nyo, a kakdeng nyo na so nakem a meyhanhan nya.

²⁴ Inaoy no si itoro na ni Ama ta do to o pangangarilawan na jinyo a yajyahayo a yamraralay ni Yeso Kizisto a Panirsirngen ta.