Ivoso 5 - Seysyo No Tao

Apya so icicirawat a tao amyan rana do kazngangan

¹ No kamo manoyong a na tey kaglaw a anak na am inarahen nyo si Ama ta do to a tey yapya so nakenakem.

² Patwawen nyo do icicirawat nyo o pangangasyan na ni Ama ta do to, akman si Yeso Kizisto a yamarilaw nyaten a yajingbeywan do inawan na nisomidong jyaten. Ta o akman rana sang a vazay na am isaray na ni Ama ta do to.

^3-4 Ji nyo pasngesngena o mangzakza kano pangagoman nyo. Ta o akman rana sang am no peyyanen do onowned ori a kapeynyagamo nya am tey marahet o akman sang. Ta akmey anak na rana inyo ni Ama ta do to. So ikapyapya na no kasaray nyo no sidongan na jinyo ni Ama ta do to.

⁵ Ta o mangzakza kano mangagom a tao am ji na nalamozongan o akman sang ni Yeso Kizisto a kani Ama ta do to. Ta akma ney pahamahamahen pa o pangagoman na kani Ama ta do to.

⁶ Am ori o ji nyo litai do kadwan jinyo a manci no kapya no akman sang a vazay. Ta o akman rana sang so icicirawat a tao am amyan so oyaoyyan na nira ni Ama ta do to no makwa, do kaji da niomonotan do nanao na ni Ama ta do to.

⁷ Ji kamo na macihza do akman sang a tao.

⁸ Ta no kakwa am nimyan kamo do kasarisaryan a ji makateneng ji Ama ta do to. Am sicyaikwaya am kamo na macikaop ji Yeso Kizisto a Panirsirngen ta. So yanyo iyan rana do kazngangan. Am ori o inaran nyo so icicirawat da no tao a yamakateneng rana do ciriciring na ni Ama ta do to.

⁹ Ta o icicirawat no makateneng do ciriciring na ni Ama ta do to am ji meylimoteng so onowned. Omonod do manoyong a ciring. Ji mapowzib so nakem do icyatatao.

¹⁰ Naknakmen nyo o kahap nyo so apiya vazay a isaray na ni Yeso Kizisto a Panirsirngen ta. Ta ori o ahapen nyo.

¹¹ Ji nyo nginara o marahet a vazay da no amyan do kasarisaryan a yameyraraten a tao. Ta apyapya o kapacimalag nyo so apya vazay nyo jira. Ta ori o ipakateneng da do marahet a vazay da.

¹² No malavat o katamwadan da no akman sang a tao am tey macimanig.

¹³ O apiya icicirawat nyo am ori o ipakateneng da do marahet a vazay da no meyraraten a tao a kapamlis da rana.

¹⁴ Am ori o pancyan da nya, “Kayokay rana yamitkeh a tao. Pamlis kamo na, yapa meyraraten. Ta cirain na inyo ni Kizisto.”

¹⁵ Am ori o apzatan nyo do icicirawat nyo. Ta ji nyo nginara o abo so pannaknakman a tao. Ta inarahen nyo sira o tey rako so pangasasnekan so icyatatao.

¹⁶ No to ngyan so sidongen a tao am sidongen nyo sira. Ta ji nyo painini. Ta aliket rana o ta iyan do karawan.

¹⁷ Ji ta todabwabo so nakem. Ta katenngan ta o apya vazay a pahanhanan na jyaten ni Ama ta do to.

¹⁸ Ji ta todasaki, ta makararahet so tao o akman sang. Apyapya pa o kakza ta no Seyzi a tomalamozong nyaten.

¹⁹ O isirisiring nyo so kadwan jinyo am yadomket do Seysyo a Anwanood ni Tawey a kano meyngongyod apo do onowned nyo a yanood nyo si Ama ta do to. Akman sang o peyyanen nyo do onowned nyo a ipasaray nyo si Ama ta do to.

²⁰ O kasaray nyo no makakaday a yana nitoro jinyo ni Ama ta do to, ta si Yeso Kizisto o manoyong a Panirsirngen ta.

Ahahapan sya no meyyaven do vahay

²¹ Masicyakanig kamo, akman so nakenakem nyo si Yeso Kizisto a yamanig nya.

²² Inyo rana a mavakes am amizngen nyo o kahanghangan nyo akman si Yeso Kizisto a yanyo amizngen a Panirsirngen ta.

²³ Ta o kahanghangan nyo rana a mahakay am mamanong ninyo, akman si Yeso Kizisto a yamamanong no yamraralay nya tao. Ta iya rana am mapatazadang jyaten do teyngato. So icyakma ney mapeykataotao jyaten ni Kizisto a yamraralay nya.

²⁴ Am ori o onotan nyo do kahanghangan nyo a mahakay an, akman jyaten a yaomonot ji Kizisto.

²⁵ Inyo rana mahakay am ikarilaw nyo o katovong nyo do vahay an, akman si Kizisto a marilaw nyaten a nimawakwak nyaten.

²⁶ O na peyvazayan jyaten ni Kizisto am na toda ji ngamoga jyaten a yaponged na ni Ama ta do to. Nivonas na o raraten ta a kayavayo na so onowned ta, do yata kahap so ciriciring na.

²⁷ O peypeypangayan no vazay na ni Kizisto am isaray na yaten a tey yapya a abwata so karatan do tangain na ni Ama ta do to.

²⁸ O mahakay rana am ikarilaw na o katovong na do vahay. To na peynara o aryarilaw na so kataotao na a marilaw no mavakes na. Ta o marilaw no mavakes na am marilaw no kataotao na.

²⁹ Abo o tao a macioya do kataotao na. Ta peyveyveknen na akman si Kizisto a yaomzat jyaten.

³⁰ Ta yaten rana yamraralay nya tao am akma ney peyvongvongwan no kataotao na ni Kizisto.

³¹ Am ori an, “No myan rana so tao do mahakay am ji sira rana macivahay do inyapwan da, ta matarek rana sira kano kahanghangan na. So icyakma dey asa ka tao a meyyaven do vahay.”

³² Ori rana am yatey makdeng ori a ciring a yadomket do Seysyo a na pehngehngain ji Kizisto a kano amraralay nya tao.

³³ So icyakman nyo sang a mahakay a marilaw no katovong nyo do vahay. To nyo peynara do karilawan nyo no kataotao nyo o karilawan nyo nira. Am panadnaden nyo a mavakes o kahanghangan nyo.