Ivoso 4 - Seysyo No Tao

Akmey yasa so onowned o omraralay ni Yeso Kizisto a tao

¹ O yako iyan do pamemtengan sicyaikwaya am yako peyvazain o vazay na ni Yeso a Panirsirngen ta. So yako pancyan ninyo a omzat do icicirawat nyo. So ikanoyong nyo a macipayok so icicirawat ji Kizisto.

² Taosya o kapahama nyo so nakem nyo. Apyapya pa kapiya no nakem nyo do icyatatao nyo. Ji kamo meyoyaoya. Ta karilaw nyo no kadwan jinyo.

³ Makowyowyat kamo pa mapeyyanowanop so kadwan jinyo. Ta ori o icyakma nyoy yasa so onowned a yanan no Seyzi.

⁴ Ta yaten rana yamraralay ni Yeso am yata akmey yasa so kataotao. Yasa o Seyzi a yamyan jyaten a yasa so ipeynanakem a yameyhanhan ni Ama ta do to a yanimapanop jyaten.

⁵ Yasa o Panirsirngen ta. Yasa o ta ipeyhanhan. Yasa o ta pangozayan so ngaran a tomaktak jyaten.

⁶ Yasa o Tao do to ta, akma tey Ama do karawan. Iya rana am yameymatmatngeh nyaten a yamraralay nya tao a yamacikaop jyaten a mapakavos so vazay na do karawan.

⁷ Am yameykataretarek o na nitoro jyaten ni Yeso Kizisto a teneteneng ta. Am na to mangozai o nakem na a yatomoro nya jyaten.

⁸ Akman so ciring do Seysyo. Ta maniring am, “No kapeycyakavat na rana do teyngato am niharag na si Satan a kano kalamsoyan na a kapanta na no yaomanod jya tao so teneteneng a kano oyowyat da.”

⁹ O peypeypangayan no kanimeycyakavat na do teyngato am nimanmanma mai do karawan.

¹⁰ O nimeygegcin do karawan am iya o nimeycyakavat do teyngato. O ikakman na sang am na itoro do tao do karawan o mapeyzokab a aryarilaw na.

¹¹ Iya o nimanta no tao so teneteneng a kano oyowyat da. Nitenngan na o tatasa ka tao a amlivolivon no ciriciring na, kapamnek na do tatasa ka tao a mangononong so ciriciring na, kapamnek na do tatasa ka tao a meylimwang no Mapasaray a Ciriciring na. So iyan no tao a panirsirngen do kyokay amnanao so sinjya.

¹² O ikakman na sang am ipakasidong da so aro a omanod ji Ama ta do to a tao a meypahagnat so nakenakem ji Ama ta do to. Ta yaten rana am akma ney kataotao ni Kizisto.

¹³ So ikamimin ta akmey yasa meyhanhan nya a makateneng ji Yeso a Anak na ni Ama ta do to a akmey makaveyvow a tao a makataptap rana so nanao ni Kizisto,

¹⁴ a ji rana akman so kanakan, akmey azda a kano pagpag a jyatenngi so pamnemnekan a to ngonongonot so nakem do mangalalas so ciring a tao.

¹⁵ Ji ta mangononong so malas. Ta pangozayan ta o pangangarilawan a macisirsiring do icyatatao ta. Ta ori o ipeypahagnat ta so onowned a ominara si Kizisto a yameymatmatngeh nyaten.

¹⁶ Yaten rana yamraralay nya tao am akma ney kataotao yaten. Iya am yatomalamozong nyaten. Ori ta icyakmey yasa so nakenakem yamarilaw no kadwan jyaten. Ta yaten rana akmey meyketeketeh do cinai am cinamaog no kataotao na. No si akma tey yasa mapanod so nakenakem ta ji Kizisto am tey rako o oyowyat ta, do kapeyyanowanop na jyaten no pangangarilawan na ni Kizisto.

Vayo a icicirawat no macikaop rana ji Yeso Kizisto a tao

¹⁷ Ko pangozayan o ngaran ni Yeso Kizisto a Panirsirngen ta a yamvavaga jinyo. Ji nyo nginara o icicirawat da no yaji manaralay a tao, ta o nakenakem da nira am yabo na peypeypangayan.

¹⁸ Onowned da am yakmey kasarisaryan. Yabo da kasngesngenan do vayo a onowned a yapo ji Ama ta do to. So da ikanoyong a yaji macipayok so nakenakem ji Ama ta do to.

¹⁹ Da jyatenngi o da kanigan a yato mangozangozay do nakem da yamapasagpyan so aktokto da.

²⁰ Am abo o akman sang a nanao na ni Kizisto a nimamizing nyo.

²¹ No kamo manoyong a yarana nimakamizing sya, yarana mangononong do manoyong a nanao na ni Yeso a ninanao namen jinyo am,

²² karwan nyo na o adan a nakenakem nyo a yamngingit jinyo do peyraratenan nyo.

²³ So alitan nyo na do adan a nakenakem nyo.

²⁴ Pangozayan nyo o avayo a onowned nyo a kano icicirawat nyo a mapatwaw so apiya nakenakem na ni Ama ta do to.

²⁵ Am ori o ji nyo na mangononongi so malas. O manoyong a ciring o patwawen nyo do akma nyoy kakteh do cinai, ta tamo mamimin a akma ney peyvongvongwan no kataotao ni Kizisto.

²⁶ No si meyoyaoya kamo am ji kamo na to meyraraten. Taosya o kato nyo pasdepan so araw a meyoyaoya.

²⁷ Ta no si akman kamo sang am kalittan kamo a littan ni Satan.

²⁸ O nimangap so ahahapen no kakwa am ablisan na rana o panakawan na a kowyat na rana amyaw no velek na, makanakem so kapanidong na so makasi a tao.

²⁹ Taosya o marahet a ciring a makowbot jinyo. Ta o makasidong so tao a kano ikapya no tao a ciring o patwawen nyo. Ta ori o ipakasidong nyo so omamizing so ciring nyo a tao.

³⁰ Ji nyo alavat o ikeyngen na no onowned no Seyzi na ni Ama ta do to a vazay. Ta o Seyzi am yongkad na jinyo ni Ama ta do to, do kavyay na jinyo no makwa.

³¹ Ablisan nyo na o oyaoyyan nyo no kadwan jinyo. Ji nyo macizagzagi o icyatatao nyo a meyoyaoyan. Ji kamo na lololos a mangavay. Taosya rana o kapeyyan nyo sya do onowned nyo so pacioyyan nyo do tao.

³² O kapya nyo so nakenakem do kadwan jinyo. To nyongbowa o oyyan nyo no kadwan jinyo, akman si Ama ta do to a yatongbo so raraten nyo, do na kanimawakwak ninyo ni Kizisto.