Ivoso 2 - Seysyo No Tao

O mina vazay ni Kizisto am ori na nikavonas rana no raraten ta

¹ No kaji nyo pa manaralayan am pasobnan nyo pa o ciriciring na ni Ama ta do to a meyraraten.

² No kano nang am onotan nyo pa o malas a vazay da no ji manganoyong a tao a kano ciring ni Satan a yatomalamozong no meyraraten a tao.

³ No kakwa am akman tamo sira a to mangozangozay do nakenakem da. Am ori o ikanoyong ta meyraraten a tao a pasingsingtan na ni Ama ta do to no makwa.

^4-5 Am tana akman ta sang a meyraraten a tao no kakwa am yatey rako o na karilawan nyaten ni Ama ta do to, do kanimanta na nyaten so to meyyonong a ikavyay no pahad ta a macikaop rana ji Kizisto. So ta ikanoyong a yana nipatazadang no pangangarilawan na.

⁶ Na rana nipazasing yaten so inawan ji Yeso Kizisto a nimirwa a mavyay. So icyakma tey macikaop jya amyan do teyngato.

⁷ O ikakman na sang ni Ama ta do to am ipacita na do kaidan no karawan o mapeyzokab a pangangarilawan na kano pangangasyan na jyaten a yamacikaop ji Yeso Kizisto.

⁸ Na nyahap inyo do peyraratenan nyo, ta nyo rana ipeyhanhan si Kizisto. O nyo ipakahap so sang am beken a oyowyat nyo, ta omagaz do pangangarilawan na ni Ama ta do to a na yazaw jinyo.

⁹ Am ori o ji nyo pahamai so nakem nyo. Ta beken a omaing do kapya no icicirawat nyo o na nyahapan jinyo ni Ama ta do to.

¹⁰ Si Ama ta do to o yata nikablis no onowned a yarana macikaop ji Yeso Kizisto. So na ikapya rana no vazay ta a mangonong do na peypalanginan nyaten ni Ama ta do to.

Akmey yasa so onowned a meyhanhan ni Yeso Kizisto a tao

¹¹ Am ori an, pakanakman nyo so kataotao nyo a ji da nipazasing no tao do Yotay a omraralay ni Ama ta do to no kakwa, do kaji nyo nginaran sira amyongkad do kataotao nyo.

¹² No kano nang am abo o kasngesngenan nyo ji Kizisto, ta akma kamoy kadwan a ji da patwatopa do tangain ni Ama ta do to, do kaji nyo macitetngehan do tao do Yotay. Ta sira am nipanta na sira ni Ama ta do to so pangozayan na ciring. So ikanoyong nyo a to rana hayo so onowned, do kaji nyo makatenngan ji Ama ta do to.

¹³ Am inyo rana a ji ngasngen ji Ama ta do to a tao am na rana nipanop inyo ji Yeso Kizisto sicyaikwaya. So nyo ikanoyong rana yamacikaop ji Ama ta do to. Ta na nikawakwak rana inyo ni Kizisto.

¹⁴ Iya o yamapeyyanowanop jyaten a tao do Yotay a kano beken a tao do Yotay. Na nibalinas no kataotao na o yakmey atoy a yamapeysyay so tao do Yotay a kano beken a tao do Yotay a da pacikaoyyan.

¹⁵ O na nyangay so inawan ni Kizisto am na niblis o yada hanhan no tao do Yotay a iwawalam ni Moyse. So icyakma dey yasa rana no tao do Yotay a kano beken a tao do Yotay do tangain ni Kizisto. No si manoyong kakma tey yasa rana am apya ta na so nakem do kadwan jyaten.

¹⁶ O nikawakwak na ni Kizisto do jyojika am balinasen na o kakma tey meykavosoyan. O jyojika na ni Yeso Kizisto o mapeyyanowanop jyaten, akmey asa ka tao so onowned a meyyangangay rana amraralay ni Ama ta do to.

¹⁷ O na nyai ni Kizisto am na ipeylimwang do aro a tao o Mapasaray a Ciriciring na ni Ama ta do to, pacyangayan nyo a beken a tao do Yotay a ji makateneng ji Ama ta do to no kakwa ka nira tao do Yotay.

¹⁸ Na peyyanowanopen yaten ni Kizisto a tao do Yotay a kano beken a tao do Yotay, akmey asa so onowned do tangain na ni Ama ta do to a yana sidongen no Seyzi.

¹⁹ Am ori an, ikabeken nyo rana kadwan a beken a tao do Yotay an. Ta tamo na mamimin a akma ney anak ni Ama ta do to a yakmey yasa ka vahay.

²⁰ Ta nyo nimahap rana o nanao da no nipamnekan ni Yeso a omlivolivon no ciriciring na kano mangononong so ciriciring na ni Ama ta do to. So na ikamimin no nang a yapo ji Yeso Kizisto.

²¹ Iya o yatomalamozong nyaten a yamanta nyaten so ji meylimoteng a onowned ta.

²² Am ori o nyo ipeyyangangay rana kano tao do Yotay a na rana yanan no Seyzi na ni Ama ta do to.