Ivoso 1 - Seysyo No Tao

¹ Yaken rana am si Pawlo ko a lamlamsoy na ni Ama ta do to a yana nipamnekan ni Yeso Kizisto a omlivolivon no ciriciring na. Yako ipeyteygami inyo a yamraralay ni Ama ta do to a tao do Ivoso a yato ngotokot so nakem ji Yeso Kizisto.

² Inaoy si itoro na jinyo o ikapiya no onowned nyo a kano pangangarilawan na ni Ama ta do to a kani Yeso Kizisto a Panirsirngen ta.

Isidong na so amraralay nya tao ni Ama ta do to

³ Isaray ta ji Ama ta do to a Ama na ni Yeso Kizisto a Panirsirngen ta. Ta yatamo na macibedbed ji Kizisto. So yana rana nitorwan so makakaday a aglaglaw na jyaten a na ipasaray jyaten.

⁴ No kaji na pa amaogan no karawan am nipamnekan na rana yaten ni Ama ta do to a monganay jya. Ta nikawakwak ni Yeso Kizisto o raraten ta. So ikanoyong ta abo rana so karatan do tangain na ni Ama ta do to. Na tey karilaw yaten ni Ama ta do to.

⁵ Am ori o na sarayan nyaten ni Ama ta do to a na panopen a akma ney anak, ta yata na macikaop ji Yeso Kizisto.

⁶ So ikanoyong ta somaray no akman sang a pangangarilawan na ni Ama ta do to, do na kabo no ngina na no Anak na, na to norwan jyaten.

⁷ Si Kizisto yanimawakwak nyaten. Am ori o yana nikavonas no raraten ta. Tey rako o pangangarilawan na ni Ama ta do to a yana nitoro jyaten.

⁸ O pangangarilawan na ni Ama ta do to am ta na ipakateneng do na ahahapan sya ni Ama ta do to.

⁹ So ta rana ipakateneng ji Kizisto akma ney kahanhanan a mapakavos so ji nitomwaw pa vazay na no kakwa.

¹⁰ Ta o pamnemnekan na ni Ama ta do to no kakwa am itoro na o makakaday do karawan a kado teyngato ji Kizisto a italamozong na, no marateng o araraw no nipamnekan na ni Ama ta do to.

¹¹ O makakaday do karawan am abo ji mangozay do ahahapan na sya ni Ama ta do to. So na to mangozai do nakenakem na a mapanop jyamen a amraralay ni Yeso Kizisto a tao do Yotay a akma ney anak a macikaop ji Kizisto.

¹² Inaoy no si mamimin namen a ney manma na makateneng ji Kizisto a somaray ni Ama ta do to a ney mazway na a Tao do to!

¹³ Inyo rana beken a tao do Yotay am kamo akman sang, ta no kapakamizing nyo so manoyong a mapasaray a nanao am mina to nyo nganoyngi si Kizisto. Ori o na nitorwan rana no Seyzi jinyo ni Ama ta do to akma ney yongkad no kapacikownongan nyo rana jya.

¹⁴ O Seyzi na ni Ama ta do to am ori o akma tey yongkad a somidong jyaten a omamoon so nipanci na itoro ni Ama ta do to do monganay jya tao. So ikanoyong na ni Ama ta do to a mapatazadang jyaten do teyngato a yaomanoyong jya tao. So sarayan ta ni Ama ta do to a tey mazway a Tao do to!

Inozi na ni Pawlo

¹⁵ Am ori an, mamizing ko na inyo a meyhanhan rana ni Yeso a Panirsirngen ta a marilaw no akma nyoy kakteh do cinai am,

¹⁶ ji ko ranamtad a somaray ninyo ji Ama ta do to. So ikasangib ko a makalavat jinyo do inozi ko.

¹⁷ Ko mapasyasi ji Ama ta do to a tey mazway a Tao do to a Ama na ni Yeso Kizisto a Panirsirngen ta a manta ninyo so teneng a kapakateneng nyo rana ji Ama ta do to.

¹⁸ Ko mapasyasi ji Ama ta do to a omiwang do onowned nyo a kapakateneng nyo na do peypeypangayan no na panopan jinyo a kapanta na ninyo so to meyyonong a ikavyay no pahad nyo do teyngato. So ikatey rako na no aryarilaw na so omanoyong jya tao.

¹⁹ Yamapeyzokab o na vazay no oyowyat na do yaomanoyong jya tao. Oyowyat rana ori am

²⁰ nimapeyvangon si Yeso apo do heseb na. So na rana iyan do teyngato a yaomlisna do wanan na ni Ama ta do to,

²¹ a kabtekan rana a Panirsirngen do sinokob no hanit. So ikabo rana no makahad so oyowyat na kano azwazway na do karawan a kado teyngato mangay do kaidan no karawan.

²² Abo ji na nalamozongan ni Kizisto do karawan. Ta iya o yameymatmatngeh nyaten a omanoyong jya tao.

²³ Yaten rana yamraralay ni Kizisto am akma ney kataotao yaten, do ta kararalay nya, do na kanimapeypapya so makakaday.