Ipaziman 8 - Seysyo No Tao

Ikapito no ipadedket

¹ Pakarwen no Kagling o ikapito no vakong a nipadketan am kakteb no vatvatek o ji na nimeyminiminiki no teyngato.

² Makarahan am macita ko o papito a ka tinsi a meytatanek a maponged no teyhesa ka zapa.

³ O asa ka tinsi am mai a meypinan so vowawan a yanan no mahangno a haneng a meytatanek do patanatanangan so nakem. So ikaro no mahangno a haneng a nitoro da jya a kapazanod na so inozi no sinjya patanangen do vowawan a patanatanangan so nakem do sazapen no lilisnan.

⁴ O aob no mahangno a haneng am macizanod do inozi da no sinjya a kapeypangato na apo do lima no tinsi a yameytatanek do tangain ni Ama ta do to.

⁵ Makarahan am apnowen no tinsi o vowawan a yanan no mahangno a haneng no apoy do patanatanangan so nakem a kabokbok na nya do teyrahem. Am ori o niyan no zomaigezeg a kapeycicilat na a kapeykanini na.

Zapa

⁶ Makarahan am o papito a tinsi a meypinan so teyhesa ka zapa a omanam a da avyotan.

⁷ Avyotan no ney manma na tinsi am amyan so makarerekmeh a kano apoy a pacizavozan no rala a mabokbok do teyrahem. Karahan am o icyakatlo no tana kano kayo am nimamimin a matemtem. So nikamimin no tamek a nimatemtem.

⁸ Avyotan no ikararwa no tinsi am amyan so akma raney masleb a rako a tokon a makas do awa. O icyakatlo no awa am to rana meyngongyod a rala.

⁹ O masaod no awa am icyakatlo na o nimawakwak. O avang am icyakatlo na o nimakava.

¹⁰ Avyotan no ikatatlo no tinsi am amyan so rako a mata no hanit a masleb no apoy a makas a apo do hanit a makas do icyakatlo no ayo a kado icyakatlo no atbod.

¹¹ O ngaran no mata no hanit am Makopad. Karahan am icyakatlo no ranom to rana kopad. Ayopen no aro a tao am meycyawawakwak sira do kakopad no ranom ang.

¹² Avyotan no ikapapat no tinsi am icyakatlo no araw a kano vehan a kano mata no hanit o ji rana makacimat. Am ori o icyakatlo no araw a todasari. Akman sang no macyey no mahep, ta icyakatlo no ahep o to na sari.

¹³ Citahen ko am mamizing ko o asa ka kangkang a somalap do hanit. Maniring am, “To sira makasi o tao do teyrahem. Ta da rana avatan no yatatlo a ka tinsi o zapa yavyotan.”