Ipaziman 7 - Seysyo No Tao

Kakapatan sira ranaw so ikalima da zivo no ikadwa da latos (144,000) a Isedi a tao

¹ Makarahan am macita ko o apat a ka tinsi a madaday do ngoso no palipalanginan a somengseng do yapwan no meykapat a pagpag a kaji na makaligligisi so yanan no karawan a kano awa kano kayokayo.

² Macita ko o asa ka tinsi apo do daddan no araw a meypinan so akmey ipadedket a yongkad ni Ama ta do to a amlolos a tomawag do nipanta na ni Ama ta do to so oyowyat a papat a ka tinsi a tey mowyat a to rana mapeykaraherahet so karawan a kano awa.

³ Maniring am, “Ji nyo peykaraherahet o karawan a kano awa kano kayokayo. Pananalahen nyo pa yamen a mapadket do zozogwan no lamlamsoy ni Ama ta do to so itovil namen jira.”

⁴ O nimamizing ko pa am o nipadketan do iteytetngehan da no Isedi a tao am yamyan so ikakapatan da ranaw so ikalima da zivo no ikadwa da latos (144,000) no tao.

⁵ O nipadketan do iteytetngehan da ni Yoda am o kakarwan sira ranaw so ikakarwan na zivo (12,000). O iteytetngehan ni Dipen am kakarwan sira ranaw so ikakarwan na zivo (12,000). O iteytetngehan ni Cyate am kakarwan sira ranaw so ikakarwan na zivo (12,000).

⁶ O iteytetngehan ni Asiar am kakarwan sira ranaw so ikakarwan na zivo (12,000). O iteytetngehan ni Navotadi am kakarwan sira ranaw so ikakarwan na zivo (12,000). O iteytetngehan ni Manase am kakarwan sira ranaw so ikakarwan na zivo (12,000).

⁷ O iteytetngehan ni Simoyang am kakarwan sira ranaw so ikakarwan na zivo (12,000). O iteytetngehan ni Diwey am kakarwan sira ranaw so ikakarwan na zivo (12,000). O iteytetngehan ni Isacya am kakarwan sira ranaw so ikakarwan na zivo (12,000).

⁸ O iteytetngehan ni Sipolon am kakarwan sira ranaw so ikakarwan na zivo (12,000). O iteytetngehan ni Yoseyvo am kakarwan sira ranaw so ikakarwan na zivo (12,000). O iteytetngehan ni Penyaming am kakarwan sira ranaw so ikakarwan na zivo (12,000).

Apo do peycyeylilyan na tao

⁹ Karahan am makacita ko so aro a tao am jyavilangi sira rana apo do peycyamahamahatawan na kano meykataretarek so ciriciring a meytatanek do sazapen no lilisnan a kano Kagling. Meyyayob sira so malavang a magorogod a meypinan so voovoong.

¹⁰ Maniring sira amlololos am, “Isaray ta si Ama ta do to a omlisna do lilisnan a kano Kagling, ta sira o mapatazadang jyaten.”

¹¹ Mamimin o tinsi a meytatanek do livolivon no lilisnan a kano kamanrarakehan a kano apat a ka omalalam a kapeylilitod da do sazapen no lilisnan a omraralay ni Ama ta do to.

¹² Maniring sira am, “Amin. Inaoy no si omaing jimo mo Ama do to o sarasaray a kano azwazway a kano teneteneng a kano keynakman a kano oyowyat a mangay do kaidan no karawan! Amin!”

¹³ Maniring o asa ka rarakeh do aro a kamanrarakehan jyaken am, “Sino sira o yameyyayob so yamalavang a magorogod ang. Do wanjin da kapwan nira ang.”

¹⁴ Maniring ko am, “Imo o makateneng jya.” Maniring jyaken am, “Sira rana am nimasapa da o rako a alalaw da no kakwa. Sira rana am nioyasan da no rala no Kagling o ayob da. So na ikalalavang rana no ayob da.

¹⁵ Ori o da ipeytatanek do sazapen no lilisnan ni Ama ta do to a yamahap so vazay na no yamaraw a kano mahep do panaralayan a mangay na apzatan ni Ama ta do to.

¹⁶ So ji da ranakcini a ji da rana awawi a kaji da rana dangdangan no araw a kano yazidangdang na.

¹⁷ Ta peyveyveknen na sira no meytatanek do sazapen no lilisnan a Kagling a kapangonong na nira yangay do atbodan no ranom a yakapwan no to meyyonong a ikavyay no pahad da. So ikanoyong ni Ama ta do to a omlinas do kaoo da.”