Ipaziman 6 - Seysyo No Tao

Nipadketan a vakong

¹ Macita ko o Kagling a mapakaro so ney manma na nipadketan a vakong do makowkow a vakong ang a kapakamizing ko so asa ka omalalam do apat ang a zomaigezeg a akma raney adey. Maniring am, “Sijya.”

² Citahen ko am macita ko o asa ka malavang a baka. O maoran do baka am meypinan so akmey paltog a mangay macyarap a kapanta da nya so sakop a kangay na rana. So ikanoyong na makata.

³ Pakarwen na no Kagling o ikadwa no vakong a nipadketan am mamizing ko o ikadwa no omalalam a meyzezyak. Maniring am, “Sijya.”

⁴ Meyratateng am makowbot o asa ka akmey vangkoro a baka. O maoran do baka am amyan so oyowyat na mapeyparahet so karawan. So ipacizakazakat da na no tao. Karahan am todahen na o matarem a ipangan.

⁵ Pakarwen na no Kagling o ikatlo no vakong a nipadketan am mamizing ko o ikatlo no omalalam a meyzezyak. Maniring am, “Sijya.” Citahen ko am macita ko o asa ka mavaheng a baka. O maoran do baka tao am meypinan o lima na so pangananngan.

⁶ Akma koy todamizing o ciring da no apat a ka omalalam. Maniring am, “O nizpi no asa ka tao do kasaraw am ji dabsoyan pa do kapeykakcin no tao. Am to da meypanpani o kanen a haneng a kano saki.”

⁷ Pakarwen no Kagling o ikapat no nipadketan a vakong am mamizing ko o ikapat no omalalam a meyzezyak. Maniring am, “Sijya.”

⁸ Citahen ko am macita ko o baka akman rana so kakawan so keyteytawan. O maoran do baka am meyngaran ori so Kawakwakan a kapacitonton na no meyngaran so Heseb. So iyan no oyowyat da omwakwak so icyakapat no tao do karawan. Karwan da am mawakwak no arap. Karwan da am mawakwak no abcil. Karwan da am mawakwak no ingingnen a kano makakaday a kokoman so tao.

⁹ Pakarwen na no Kagling o ikalima no nipadketan a vakong am macita ko dobo no patanatanangan so nakem o pahad da no niwakwak da a ji macimaza no kapeylimwang da no ciriciring na ni Ama ta do to.

¹⁰ Maniring sira amlololos am, “Mo Panirsirngen a tey mowyat a tey meynakem a manoyong a ipeyhanhan, si mango am pacicin mo a peykapyapinpinen mo o tao do karawan a mangonong nyamen a yada niwakwak.”

¹¹ Makarahan am maponged sira no malavang a magorogod a kapakamizing ko so ciring a manci nira meywalam pa, mangay no si mablit rana sira o kararay da a mahap so vazay ni Yeso Kizisto a akma dey kakteh do cinai a akman sira wakwaken da.

¹² Karahan am macita ko pa o Kagling a mapakaro so ikanem no vakong a nipadketan. No kanang am mina to meykanini. So icyakma ney mavaheng a milakayob no araw a nimahesep. O vehan rana am akma raney rala.

¹³ O mata no hanit rana am makas rana do teyrahem, akman rana so mata pa asi no kayo a nizigzig no pagpag a makas do teyrahem.

¹⁴ O hanit rana am akma raney vakong a nikowkow a todabo. O tokon a kano mahataw am mablis sira do yanan da.

¹⁵ O panipanirsirngen rana do karawan a kano makayokod no teyhesa ka mahataw a kano kabtekan da no panirsirngen no itaysang a kano meynakem a tao a kano peylamsoin da kano to naliway a tao am mamimin sira mangay somazok do meykavavavahay a azcip a kano tokon,

¹⁶ a kalololos da do tokotokon a kado pongopongow a manci no, “Zingboi kamo yamen a taywen a kaji da makacittan jyamen no yasomozi so moing a Kagling a kano yaomlisna do lilisnan a Tao do to.

¹⁷ Ta oya rana o araraw no ipakaranes no da peyoyaoyyan. Sino todavangon do dang.”