Ipaziman 5 - Seysyo No Tao

Makowkow a vakong a kano Kagling

¹ Ko macita o yaomlisna do lilisnan a yameypinan so makowkow a vakong no wanan na. O vakong rana am yameyyatovang a yana adketan no vatvatek a nipatodwan no apito a ipatotodo a kapadket da jya so vakong a jya nivezay pa no tao.

² Yako kapakacita pa so yatey mowyat a tinsi a yamlolos a yamanci no, “Sino o makapakaro so nipadketan a vakong a kavezay na sya.”

³ Am tana do teyngato a tana do teyrahem a tana mavyay a tana nimawakwak rana am abo o asa ka tao a makavezay sya vilangan.

⁴ Ori o nilavi ko, ta abo tao makawasak sya vezain a vilangan so vakong ang. Ta ji pa makanet o onowned da.

⁵ Karahan am maniring jyaken o asa ka tao do kamanrarakehan am, “Ji ka lavi. Citahey o Kokoman so tao a yanimakowbot a yapo do iteytetngehan ni Yoda a sivovoong ni Tawey a yarana nimakata. Iya o mapakaro so yapito a ka vakong a nipadketan.”

⁶ Karahan am macita ko o Kagling a amyan do avak no lilisnan a kano apat a ka omalalam a kano kamanrarakehan. O Kagling rana am akma raney niwakwak da a apito so ozong a kapito no mata na. O mata na am Seyzi na ni Ama ta do to a nitovoy na mangay do teyrahem.

⁷ Karahan am meypasngen o Kagling do sazapen no lilisnan a kahap na so vakong do wanan no amyan do lilisnan ang.

⁸ Todahen na o vakong no Kagling am meylilitod sira o papat so ikakatlwan (24) a kamanrarakehan a kano apat a ka omalalam do tangain no Kagling a kamimin da no kamanrarakehan a meykaryag a somaray a kaponged da no vowawan a kapnowan no mahangno a haneng. O mahangno a haneng am inozi da ori no manaralay a tao,

⁹ a kapeyyanwanood da so vayo a anood. O kanwanoodan na am, “Imo o makahap so vakong a mapakaro so nipadketan a vakong. Ta imo rana am niwakwak da imo. O nimvoyog a rala mo am nimapatastas so tao do peycyeylilyan na kano meykataretarek so ciring a kano meytaretarek a tao do sinokob no hanit a yaitoro ji Ama ta do to a yaponged na.

¹⁰ Imo yada nipamlis a yada to ngonongonongi do kangay da do tangain na ni Ama ta do to a amraralay nya. So talamozongan da no teyrahem no makwa.”

¹¹ Karahan am ko pa macita yako kapakamizing so yamakazivo a tinsi a omlivon so lilisnan no Panirsirngen a kano apat a ka omalalam a kano kamanrarakehan,

¹² a omlololos a meyyanwanood. O aingan no anood da am, “O niwakwak da Kagling am manoyong a mahap so oyowyat a kano keynakman a kano teneteneng a kano azwazway a kano sarasaray a anwanooden.”

¹³ Karahan am mamizing ko o makakaday a nyamaog na do teyngato a kado teyrahem a kado awa, pacyangayan da no nimawakwak rana tao meyyanwanood. O aingan no anood da am, “Inaoy no si mamimin o sarasaray a kano azwazway a kano oyowyat a mangay do yaomlisna do lilisnan na kano Kagling a mangay do kaidan no karawan.”

¹⁴ Maniring sira o apat a ka omalalam am, “Yamanoyong,” a kapeylilitod da rana o kamanrarakehan a omraralay nya.