Ipaziman 4 - Seysyo No Tao

Raralayan da ni Ama ta do to do teyngato

¹ Karahan am macita ko o teyngato a kacyangan. Ipirwa ko mamizing o akmey meyzapa. Maniring am, “Tanang do jya, ta ipacita ko jimo o yaomanam a vazay.”

² So ji ko nimeyyahahai a nitalamozong no Seyzi. So nipakacita ko na do teyngato so lilisnan no panirsirngen a keyyan no amlisna dang.

³ O keyteytawan no moing na am akman rana so ovay a somilasilaw a kano olo a maniray. So ikatey mazway na citahen. O livolivon na no lilisnan am livonen no nangirang. O keyteytawan na am akmey tamek.

⁴ Apat so ikasikatlo (24) o lilisnan a amlivon so lilisnan no panirsirngen ang a lisnan no papat so ikakatlwan (24) a kamanrarakehan a meyyayob so malavang a magorogod a kapeysakop da so vowawan.

⁵ Amyan so to meycicilat a kano gomanazegez a nimapo do lilisnan no panirsirngen a keyyan no apito a ka zampo a amlila do tangain no lilisnan. Ori rana am Seyzi na ni Ama ta do to.

⁶ Amyan so malavang a panganinwan akman so awa so karakorako do tangain no lilisnan a keyyan no apat a omalalam do sirisiri no lilisnan. O sazapen da kano likod da am makakaday no aro a mata da.

⁷ O ney manma na omalalam am akma raney kokoman so tao. Ikadwa na am akmey baka. Ikatlo na am moing no tao. Ikapat na am akmey kangkang a to nalasalap.

⁸ So ikamimin da meykanem so panid no apat a omalalam am tana sazapen na, tana likod na am makakaday no mata na. Sira rana am abo maraw a abo mahep a to da meyyanwanooji. O anwanood da am, “Mo ji meylimoteng so onowned a Panirsirngen a tey mowyat a Tao do to a to meyyonong a mavyay a nimapo no kakwa, kasicyaikwaya kano kangay na do kaidan no karawan.”

⁹ O anwanood da no apat a ka omalalam am azwazway a kano keynakem a kano sarasaray a yanood da so to meyyonong a mavyay a omlisna do lilisnan ang. No meyyanwanood sira o omalalam am,

¹⁰ meylilitod sira o papat so ikakatlwan (24) a kamanrarakehan a omraralay no to meyyonong a mavyay a omlisna do lilisnan ang a kapangay da so sakop da vowawan do tangain no lilisnan ang. Maniring sira am,

¹¹ “Panirsirngen namen, Tao do to namen, manoyong ka mahap so azwazway a kano keynakman a kano oyowyat. Imo nimangamamaog so makakaday. Mamimin a nakenakem mo o nikamaog no makakaday.”