Ipaziman 22 - Seysyo No Tao

¹ Makarahan am ipacita na pa jyaken no tinsi o asa ka ayo a yapwan no to meyyonong a ikavyay no pahad a to meylacilat a akma raney panganinwan a apo do lilisnan ni Ama ta do to a kano Kagling.

² O ranom rana am amvoyog a mangonong do rarahan do avak no ili. O sigisigil na no ayo am amyan so kayo a tomanek do dang a yapwan no to meyyonong a ikavyay no pahad. Do kasa kawan am ipidwa so icyarwa a meyyasi. So ipangday na do vehavehan a meyyasi. O voong na am makavavaw so ingingnen no tao do peycyamahamahatawan na.

³ Abo rana do ili ya o ikaoya na ni Ama ta do to. So ikanoyong na rana no lilisnan ni Ama ta do to a kano Kagling a amyan rana do ili a kararalay da nya no lamlamsoy na.

⁴ Sira rana am pacimatan da rana o moing na ni Ama ta do to. O ngaran na ni Ama ta do to am domket do zozogwan da.

⁵ Abo rana do dang o mahep. Ji da rana ngezsangan o kabo no zampo a kano araw, ta zezak da si Ama ta do to a Panirsirngen ta. Nipamnekan na sira a meypanirsirngen a mangay do kaidan no karawan.

Mai pa si Yeso

⁶ Maniring jyaken o tinsi am, “Yabo na kalalasan no ciring eya. Ta si Ama ta do to a yaniomoyat do panoyonoywan na so ciring am yanimanovoy so tinsi a mapaziman so yaomanam pa vazay do aro a lamlamsoy na. Ta ji rana meyyahahay a mai.”

⁷ Maniring si Yeso am, “Amizngen nyo an. Ta makeykai ko na mai. O mangozay do ciring eya yadomket do vakong eya am manoyong o akman sang a tey yapya.”

⁸ Yaken rana am si Yowani ko. Manoyong o kanimakacita ko so aro a vazay eya. Mamizing ko a macita am meylilitod ko do tangain no tinsi a nimapacita jyaken so aro a vazay eya a amraralay nya.

⁹ Am maniring jyaken am, “Ji ka akman sang. Ta yaken rana ka nimo a kano akma moy kakteh do cinai a yana panoyonoywan so ciring a kano yamangozay do ciring do vakong eya am to meyyangangay a lamlamsoy na. So ikapyapya na pa ni Ama ta do to a iraralay mo.”

¹⁰ Maniring pa jyaken am, “Ji mo naywa o ciriciring do vakong eya, ta makeykai rana o araraw na no ipakaranes no vazay eya.

¹¹ O meyraraten am jyablis o kapeyraraten da. O mapasagpyan so aktokto da am jyablis o vazay da. O manidong so tao am jyablis o kapanidong da. O ji meylimoteng so onowned am jyablis o kaji da meylimotengan so onowned.”

¹² Maniring si Yeso am, “Meytataziman kamo an. Ta yako makeykai rana a mai. Yai ko o nakem ko so omanoyong jyaken a tao am to ko palolwa do kapyapya no iwawalam da o nakem ko sira.

¹³ Yaken rana am Aarva kano Yamicya. Yaken rana am nikapwan na kano pangavosan na.

¹⁴ “O manownaw rana so onowned a tao am tey yapya sira. Ta sira rana am sira o apya koman so asi no kayo a yapwan no to meyyonong a ikavyay no pahad. So ika sira da no somdep do pazezevngen no ili.

¹⁵ Am sira rana somagpyan a kano manlita no oyowyat ni Satan a kano mangzakza so icyatatao da kano mangap so tao a kano manaralay so malas a iraralay a kano jyanoyong so ciring a kano iwawalam am mamimin sira mavezed do pantaw no ili.

¹⁶ “Yaken rana am si Yeso ko. Nimanovoy ko so lamlamsoy ko a tinsi a meylimwang nya jinyo so vazay eya do peycyakyokyokayan na. Yaken rana am sivovoong na yaken ni Tawey. Yaken rana am akmey karow a mata no hanit.”

¹⁷ Maniring o Seyzi a kano Macivahavahay a mavakes am, “Mai ka na.” O makamizing sya tao am akman kamo sang a manci no, “Mai ka na.” Mai kamo a yamawaw a tao. O makza nya am mai mai rana a omyop so ranom a yapwan no to meyyonong a ikavyay no pahad. Am ori rana am abo o ngina na.

Pangavosan no ciring

¹⁸ Yaken rana am si Yowani ko. Ko pa pakoyokoin jinyo a ipaziman jinyo a yarana nimakamizing so ciriciring a yadomket do vakong eya tao am: no amyan so tao a omnapnap do ciring eya am itoro na jya ni Ama ta do to o yadomket do vakong a makakaday a alalaw.

¹⁹ No amyan so tao a komteb do ciring a yadomket do vakong eya am ji na rana mya ni Ama ta do to a koman so asi no kayo a yanan no to meyyonong a ikavyay no pahad a yadomket do vakong eya. So icyakman na sang a ji na mya a somdep do ili na ni Ama ta do to.

²⁰ Si Yeso a yamacyanoyong do aro a ciring eya am na ipanci, “Yamanoyong o kakeykai ko na a mai.” Amin. Mo Yeso Kizisto a Panirsirngen, mai ka rana.

²¹ Inaoy si itoro na jinyo o pangangarilawan na ni Yeso a Panirsirngen ta. Amin.