Ipaziman 21 - Seysyo No Tao

Vayo a hanit a kano teyrahem

¹ Makarahan am makacita ko so vayo a hanit a kano vayo a teyrahem. O nimanmanma hanit a kano teyrahem am ji rana cita. Akman sang o awa a ji rana cita.

² Makarahan am macita ko o ili na ni Ama ta do to. Ori rana am Vayo a Yelosaleng a apo ji Ama ta do to do teyngato a nipagcin na do teyrahem. So icyakma ney meyvinavinaywan a tey mazway a citahen a mavakes a omrapong so mangay na seksekan a tao.

³ Makamizing ko so ciring a apo do lilisnan no panirsirngen. Maniring am, “Yamyan do karawan o vahay ni Ama ta do to a yamacivahay do tao do karawan. Sira rana am abneken na sira anak. So ipacitovong na jira ni Ama ta do to a Tao do to da.

⁴ Linasan na ni Ama ta do to o kaoo da. Abo rana o mawakwak. Abo rana mazabab so onowned a kano amlavi so onowned a kano meyngen. So ikanoyong na rana komavos no mina vazay no kakwa.”

⁵ Maniring o amlisna do lilisnan no panirsirngen am, “Citahen mo o kayavayo ko so makakaday.” Maniring pa am, “Padketen mo, ta yamanoyong kapeyhanhan no ciring eya.”

⁶ Maniring pa jyaken am, “Yarana nikomavos. Yaken rana am Aarva kano Yamicya. Yaken rana am nikapwan na kano pangavosan na. No myan so mawaw am itoro ko o atbod a yopen na a yapwan no to meyyonong a ikavyay no pahad na. Am ori rana am abo ngina na.

⁷ O ji nimablis so onowned a tao am ori o apya amyop sya. O icyakman na sang am abneken da yaken a Tao do to da a kabnek ko sira anak ko.

⁸ Am sira rana manyahey a tao a kano ji nganoyong jyaken a tao a kano somagpyan a kano manwakwak a kano mangzakza so icyatatao da kano manlita no oyowyat ni Satan a kano manaralay so malas a iraralay a kano mangalalas a tao am amyan so akmey awa so karakorako a lila no apoy a omapanala sira. Ori rana am ipirwa kawakwak ori.”

Vayo a Yelosaleng

⁹ O papito a ka tinsi a meypinan so apito a panay a kapnowan no manowji a alalaw am amyan so asa jira a nimai a manci nya jyaken. Maniring am, “Sijya, ta ipacita ko jimo o yasomeksek do Kagling a mavakes.”

¹⁰ So nitalamozongan na nyaken no Seyzi. Makarahan am yangay na yaken no tinsi do toktok no tokon a kapacita na nya jyaken so apo ji Ama ta do to a nimeygegcin do teyrahem a Yelosaleng.

¹¹ O rako a ili rana am yanan no azwazway ni Ama ta do to. So icyakma na raney olo a maniray. No maniray am akma raney panganinwan.

¹² Amyan so makarang a atoy. O atoy rana am adwa o icyarwa na no pangengneban na a pamzatan no rarwa so ikakarwan a tinsi. O pangengneban am domket o ngaran da no rarwa so ikakarwan a iteytetngehan da no Isedi a tao.

¹³ O teyhesa ka mocimot na am atlo o pangengneban. Nikakaday da o pangengneban a nipasazap da do palapalanginan.

¹⁴ O abneken na soil no atoy am adwa o icyarwa no lalitan a kakakadayan no ngaran da no nipamnekan no Kagling a amlivolivon no ciriciring na.

¹⁵ O macisirsiring jyaken a tinsi am meypinan so vowawan a ipangtokto a ivitong na do rako a ili a kano pangengneban na kano atoy na.

¹⁶ Akma raney kavangan o ili so keyteytawan. O kanaronaro na kano kowvowvong na kano kakarakarang na am meyyangangay. Kaptepteng na rana jya no tinsi. Aptengan na am makanateng a zivo o kananet na. So icyakman na sang no kowvowvong na kano kakarakarang na.

¹⁷ No to na mangozai no tinsi o ipamtepteng no tao do karawan a idpang na do atoy no ili am o kakarakarang na am kakteb o ikapat na anet.

¹⁸ O nipeyyatoy da am lalitan. O nyamaog da so ili da am meyngongyod a vowawan. So icyakma na raney panganinwan a to rana pengkad.

^19-20 O soil na no atoy no ili am pangayan da so ikadwa na so icyarwa no makakaday a masingat a lalitan a yazwazway da sya.

²¹ O peypeypangayan na no yadwa so icyarwa a pangengneban na am adwa so icyarwa a masingat a lalitan. Mamimin o teyhesa ka pangengneban a nyamaog no masingat a lalitan. O rarahan do ili am mamimin a vowawan. So icyakma na raney panganinwan a to rana pengkad.

²² Abo do ili o nimacita ko a panaralayan. Ta si Ama ta do to rana kano Kagling o iraralay da do dang.

²³ O ili rana am tana abo o araw a kano vehan am cyaha, ta cirain na sira no oyowyat na ni Ama ta do to. So peyyapoyan da so Kagling no tao do ili.

²⁴ Mamimin o peycyamahamahatawan do karawan a mangonong do cirain na. O panipanirsirngen do karawan am mamimin sira mai no keynakman da do ili eya.

²⁵ Kasaraw a todeywang o pangengneban. So to na meyyonongi a meywang, ta abo do dang o mahep.

²⁶ O keynakman da kano azwazway da no peycyamahamahatawan am miminen da yai do ili eya.

²⁷ Am o meyraraten a kano marahet so iwawalam a kano mangalalas am ji sira makasdep. O amyan so ngaran do vakong no Kagling a yanan rana no to meyyonong a ikavyay no pahad da am ori o makasdep.