Ipaziman 2 - Seysyo No Tao

Nanao na so kyokay do Ivoso

¹ Maniring jyaken si Yeso am, “Ipeyteygami mo o yamimong no kyokay do Ivoso. Si maniring ka am, ‘Yamaniring o yameypinan no wanan na so yapito a ka mata no hanit a yaomalam do avak no yapito a ka peyzeyzampwan a niparing da no ovay am:

² Ko katenngan o nyo kasasaodan. Kamo mowyat a yameyvazay a yaji macizizikna do alalaw nyo. Ko katenngan inyo a yamapengkad so meyraraten a tao a amlivolivon no yamacitarek a ciriciring na ni Ama ta do to. So yanyo ipakateneng do malas a tao.

³ Yakamo tey mowyat so onowned a ji macizizikna do aro a alalaw nyo a mahap so vazay ko.

⁴ Am yamyan so yasa ka vazay a yako oyyan ninyo. Ori rana am yarana nimablis o nyo kararalay nyaken. So nyo rana jyakmai no kakwa so onowned.

⁵ To nyo rana naknakma o yanyo nikahahan no nakenakem an. So ipamlis nyo a amwoli so kararalay nyo nyaken an. Ta no si ji kamo mamlis am to ko nangai a mehes so peyzeyzampwan nyo.

⁶ Am yasa o yanyo kapyan, ta yakamo akman jyaken a yamaoya no iwawalam no Nikela tao.

⁷ O ciring no Seyzi so peycyakyokyokayan na am amizngen nyo a yameycicilwan a tao an. Sira rana yamakata tao am ipanta ko sira so oyowyat da a koman so asyasi no kayo a yapwan no to meyyonong a ikavyay no pahad da ji Ama ta do to do teyngato.’

Nanao na so kyokay do Semayna

⁸ “Ipeyteygami mo o yamimong no kyokay do Semayna. Si maniring ka am, ‘Yamaniring o nikapwan na kano pangavosan na a yanimirwa a mavyay am:

⁹ Ko inyo katenngan so alalaw a yamavak so velek. Am inyo rana am kamo ney mabsoy na. Ko inyo katenngan a yada tamwaden no yamanci no ka tao da do Yotay. Am sira rana ori am beken a tao do Yotay, ta sira rana am akmey kalavongan ni Satan.

¹⁰ Ji nyo anyaheyan o yaomanam a alalaw nyo. Citahey kamo si Satan a yaomileylamdam so nakem nyo si Ama ta do to. So ikanoyong no tatasa jinyo a mangay na alyowen do pamemtengan. So ikasa ngarnan (10) no araraw na no peyrarehten no kataotao nyo. Am to kamo ngotokot so nakem. Ta ori o pantan ko ninyo so to meyyonong a ikavyay no pahad nyo.

¹¹ “ ‘O ciring no Seyzi so peycyakyokyokayan na am amizngen nyo a yameycicilwan an. O jya nimablis so onowned a tao am ji rana meydedna jya o keypirwa na mawakwak.’

Nanao na so kyokay do Peycyamo

¹² “Ipeyteygami mo o yamimong no kyokay do Peycyamo. Si maniring ka am, ‘Yamaniring o yameypinan so yamatarem a ipangan am:

¹³ Ko katenngan na katey mowyat ni Satan do yanyo peyilyan. Am yanyo jya nipasaklangan yaken no kawakwak da so meylimwang no ciring ko a tao a meyngaran so Antipa do italamozong na ni Satan a ili nyo. Nyo jya nipeymakarwan yaken a iraralay.

¹⁴ Am yamyan pa so yako oyyan ninyo. Yamyan jinyo so yana nicirara ni Palang a yaomonot do nanao ni Palake. Si Palang am yamanci no Isedi a tao a meyraraten a nikoman so mina pazos da so malas a iraralay da a da kapasagpyan so aktokto da.

¹⁵ Yakman sang ta yamyan jinyo so yaomonot do nanao ni Nikela.

¹⁶ Am ori o ipamlis nyo, ta no ji kamo mamlis am makeykai ko a mai a kabalinas ko sira no yako sangpahen a ipangan.

¹⁷ “ ‘O ciring no Seyzi so peycyakyokyokayan na am amizngen nyo a yameycicilwan a tao an. Sira rana a jya nimablis so onowned a tao am itoro ko jira o kanen apo do teyngato a meyngaran so mana a yajyasingkad no mata sicyaikwaya a kapanta ko nya so malavang a veysen a adketan no vayo a ngaran. O mahap so veysen a tao o makateneng do ngaran a domket do veysen ang.’

Nanao na so kyokay do Tiyatila

¹⁸ “Ipeyteygami mo o yamimong no kyokay do Tiyatila. Si maniring ka am, ‘Yamaniring o Anak na ni Ama ta do to a yakmey apoy so mata yamanikap a yameyyai so yakmey aswaz a nilinasan am:

¹⁹ Yako katenngan o mo kasasaodan. Ko katenngan o nyo kararalay nyaken. Ko katenngan o nakenakem nyo si Ama ta do to a kano vazay nyo si Ama ta do to a yaji macizizikna do alalaw nyo. Yako katenngan o na karwaro pa no vazay nyo sicyaikwaya kano kakwa.

²⁰ Am yasa ka vazay pa o yako oyyan ninyo. Inyo rana am nyo to amyapya o malas so ciring a mavakes a meyngaran so Yesipi. Na cirarahen o lamlamsoy ko a mapasagpyan so kataotao da a yakoman so pazos da no yamalas a da iraralay.

²¹ Nipanci ko rana jya o kapamlis na am ji na ablisi o kapasagpyan na so kataotao na.

²² Citahen nyo an, o pasingsingtan ko jya, keyngen no kataotao na an. O kararay na mapasagpyan so kataotao da am no si mamlis sira ji rana mapasagpyan so kataotao da am ori ikapya da. Am no si ji sira mamlis am pazanoden ko sira a peydednan no alalaw.

²³ Wakwaken ko sira o macihza jya tao, ipakatenngan da jyaken no tao do peycyakyokyokayan na a makateneng do onowned no tao. To ko palololwa do mina vazay nyo o itoro ko jinyo.

²⁴ “ ‘Am inyo rana tatasa ka tao do Tiyatila a jya niomonot do malas a nanao a jya nimacinanao do matayo a iwawalam ni Satan am ji ko na norwan jinyo o masalit a ji nyo a patakan a vazay.

²⁵ Am ahapen nyo o yanyo na nimamizing a nanao ni Ama ta do to mangay do ikeypirwa ko a meyhekas do karawan.

²⁶ Sira rana jya nimablis so onowned a tao a to noib nya do karawan a mahap so nanao ko am ipanta ko sira so oyowyat da a tomalamozong no karawan.

²⁷ O itoro ko jira oyowyat am akman so oyowyat a nitoro na jyaken ni Ama. So icyakma dey vahalang to makaspi so vahanga a tomalamozong no karawan.

²⁸ Azawen ko sira so karow a mata no hanit.

²⁹ O ciring no Seyzi so peycyakyokyokayan na am amizngen nyo a yameycicilwan a tao an.’