Ipaziman 19 - Seysyo No Tao

¹ Komavos ori am makamizing ko pa so macyak a ciring. So icyakma dey amlololos no tao do teyngato. Maniring sira am, “Anooden ta si Ama ta do to. Ta si Ama ta do to o yamapatazadang jyaten a kano yapwan no azwazway a kano oyowyat.

² Manoyong o kaji na mapeycyakabanan so tao do pacicyan na so tao, ta na rana nipasingsingtan o rako a ili akman so somagpyan a mavakes a yatomirara so tao do karawan a yamraralay no malas a iraralay a na kawakwak pa so lamlamsoy na ni Ama ta do to.”

³ Maniring sira no keypirwa da amlolos am, “Anooden si Ama ta do to. O aob no apoy a itemtem na so rako a ili am jyavitos a mangay do kaidan no karawan.”

⁴ Makarahan am meylilitod sira o papat so ikakatlwan a kamanrarakehan a kano apat a ka omalalam a omraralay ni Ama ta do to a omlisna do lilisnan no panirsirngen. Maniring sira am, “Amin. Anooden si Ama ta do to.”

Sarasaray do teyngato

⁵ Makarahan am amyan so ciring a apo do lilisnan. Maniring am, “Inyo rana a lamlamsoy ni Ama ta do to a kano amraralay nya tao am tana meynakem a tana ipangoyongoyod da inyo am mamimin kamo a omanwanood so Tao do to ta.”

⁶ Mamizing ko paha o akmey amlololos a aro a tao. O ciring da am akma raney azda kano adey a zomaigezeg. Maniring am, “Anooden si Ama ta do to, ta yatey mowyat a yarana myan do Panirsirngen.

⁷ Makapya ta somaray a zomwazway sya. Ta yarana makeykai o araw no kapazagzagpit no Kagling. So yana rana tazimanan jya no yasomeksek jya mavakes.

⁸ Na rana nipanta ni Ama ta do to so malavang a ayob na.” (O peypeypangayan no malavang a ayob ori am kapyapya no vazay da no omanop ji Ama ta do to a tao.)

⁹ Makarahan am maniring jyaken o tinsi am, “Vatvatkan mo o katey yapya da no nitaidan na tao a macikasaray jya a nimatarek so vahay.” Maniring pa o tinsi am, “Manoyong ya ciring na ni Ama ta do to.”

¹⁰ So nipeylilitod ko do tangain na omraralay nya. Maniring jyaken am, “Ji ka akman sang an. Ta yaken rana ka nimo a kano akma moy kakteh do cinai a yamahap so nipeylimwang na ni Yeso a nanao am mamimin a lamlamsoy ni Ama ta do to. So raralayan mo ni Ama ta do to. Ta o nanao na ni Yeso Kizisto am meyyangay ori a kano nipangnanao da no panoyonoywan na ni Ama ta do to so ciring na no kakwa pa yato ngai sicyaikwaya.”

Maoran do malavang a baka tao

¹¹ Makarahan am macita ko o teyngato a kacyangan a keyyan no asa ka malavang a baka. O ngaran no maoran do baka tao am meyngaran si Manoyong a kani Ipeyhanhan. Iya rana am to na mangozai o apya aktokto na a mapacici so tao a omarap so kavosoyan na.

¹² O mata na am akma raney lila no apoy. O oo na am meysakop so aro a sakop no panirsirngen. Amyan so nivatvatkan do kataotao na a ngaran am abo tao a makateneng do peypeypangayan na. Ta iya o makateneng jya.

¹³ O ayob na magorogod am maday a rala. O ingaran da jya am Ciring na ni Ama ta do to.

¹⁴ O kalavongan na do teyngato am maoran sira do malavang a baka a meyyayob so malavang a ayob a macihza jya.

¹⁵ So nipeytotwaw no ipangan do ngongoy na. O ipangan am ibalinas na so peycyamahamahatawan. So icyakma ney vahalang so kowyowyat a tomalamozong no peycyamahamahatawan na. So icyakma ney komates so macioya jya tao a pasingsingtan na jira no tey mowyat a Tao do to.

¹⁶ O vatvatek a domket do ayob na kado appa na am, “Kabtekan a Panirsirngen.”

¹⁷ Makarahan am makacita ko so asa ka tinsi a meytatanek do zezaken no araw a omlololos a tomawag do meyyasasalap do hanit. Maniring am, “Sijya kamo, ta yamyan so itoro na ni Ama ta do to a ikabsoy nyo.

¹⁸ Kanen nyo rana o kataotao da no nimawakwak a panipanirsirngen a kano panipanirsirngen no itaysang a kano itaysang a kano baka kano maoran do baka tao a kano peylamsoin da kano to naliway a tao a kano meynakem a kano jyeynakem a tao.”

¹⁹ Karahan am macita ko paha o omalalam a kano panipanirsirngen do teyrahem a amlovot so itaysang da a omarap so maoran do baka tao a kano kalavongan na.

²⁰ So nirakpan da so omalalam a kapazanod da so nimeyvazay so mapangyangyalak a makahaw a tao a rakpen. O makahaw a tao am nimeyvazay ori so mapangyangyalak a vazay a ipeykawad na so yanan no ipatotodo no omalalam a kano niomraralay no kamamagenan na tao. Omalalam rana kano makahaw a tao am niwalit na sira do akman so awa so karakorako a lila no apoy.

²¹ O itaysang da am nimimin na sira niwakwak no matarem a ipangan a apo do ngoso na no maoran do malavang a baka tao. So nikabobsoy da no meyyasasalap a nimanoktok so asisi da.