Ipaziman 18 - Seysyo No Tao

Nikabalinas no Papilon

¹ Mavitos rana ori am macita ko o asa ka tinsi a meyhekas a apo do teyngato. Iya rana am tey rako oyowyat na a to maniray so karawan.

² Maniring ori a amlololos am, “Yarana nimabalinas o rako a ili a meyngaran so Papilon. Ori rana am yamanoyong a yada peyvahayan no makakaday a kararay na ni Satan a da peyvahayan no yamapaoya a meyyasasalap.

³ Ta yana cinirara no Papilon o peycyamahamahatawan na a mapasagpyan so kataotao da a yamraralay no malas a iraralay da. So da nionotan jya no panipanirsirngen. O meypananazangan a tao am nikarapan o nizpi da no peycyamahamahatawan na a omraralay no malas a iraralay da.”

⁴ Makamizing ko paha so ciring a apo do teyngato. Maniring am, “Pakowbot kamo na a yamanop jyaken a tao. Pakowbot kamo na apo do ili ang. Ta mangay jinyo o raraten na kano pasingsingtan na jya ni Ama ta do to.

⁵ Ta yarana to makanavak do hanit o raraten na. So na tovilan do raraten na ni Ama ta do to.

⁶ So to na macilociloloi do mina vazay na no ipasingkad na jya. So ikanoyong no ipasingkad na jya a meyparahet.

⁷ O nakenakem na meyhahama no kabsoy na kano kazwayan na am meyvoga rana o kakdekdeng no ipasingkad na jya. So ikabo no kavyavyayan na a meyrarahet. Ta o aktokto na so kataotao na am, ‘Amlisna ko do lilisnan no panirsirngen. Beken a vao ko. So ikabo no alalaw ko.’

⁸ Am ori o ipeydedna na no alalaw jya do kasaraw. So iyan na rana no ingingnen a kano meykakcin a kano mazabab so onowned. So ikatemtem na do lila no apoy. Ta o mapasingkad jya am Panirsirngen a tey rako so oyowyat a Tao do to.”

⁹ O macizanod jya amraralay no malas a tao do to a panipanirsirngen do teyrahem am mavoya da o aob no apoy a tomemtem sya. So ilololos da mazabab nya so onowned.

¹⁰ Manyahey sira a makacita sya meyrarahet. Ori o nipakarai da meytatanek. Maniring sira am, “To ka makasi a rako a ili a yameyngaran so Papilon. Ta yasa ka vatvatek pa am yarana meydedna jimo no pasingsingtan na jimo ni Ama ta do to.”

¹¹ O meypananazangan do teyrahem a tao am abo ji lavi jya, do kabo rana no somazang do apzapzatan da.

¹² So ikabo rana no tao a somazang do ovay da kano gizit da kano zaka da kano angongonay da kano tamtamek da. So icyakman na sang no nicinon da masisingat a ayob a kano nipariparing da no masisingat a kayo a apzapzatan a kano makakaday a masisingat a ileylamnay da no nakem.

¹³ Abo rana o tao a manazang so makakaday a pipya kanekanen a kano mahangno a haneng a kano saki a kano makakaday a pazavozen da do yakan da a haneng a kano odong a kano mogi a kano baka kano kagling a kano lolowen no baka aleleh a kano peylamsoin da tao.

¹⁴ Maniring o meypananazangan a tao do rako a ili a meyngaran so Papilon am, “O yamo ikakza a meycyamadadayan a apipya apzapzatan am yabo rana. Yakman sang o azwazway mo. Ta todabo rana. Jyabo kapeysinaoli na pa jimo a.”

¹⁵ O meypananazangan do ili ori a nimakanizpi a tao am makararai sira do kahawa da no kapazanod na sira do pasingsingtan ni Ama ta do to.

¹⁶ Maniring sira amlavi am, “To makasi o rako a ili ya. Ta akman so mavakes a mabwang a meyyayob so inyangana na meytaktakzes so padonen a kano makekdeng a tamtamek.

¹⁷ Am yapa jyangay do yasa ka vatvatek am na rana nikatemteman no kangangay na.” O manavilak do aro a avang a kano maoran do avang a tao a kano kasakap da kano aro a mangahangahahap a tao am makararai sira do kwang.

¹⁸ Macita da o aob no apoy a tomemtem so rako a ili am amlololos sira. Maniring sira am, “Sino o makataha so akman sya rako a ili.”

¹⁹ Meyratateng am mangap sira so tana a pasakoin da do oo da a amzezezeng a omlavi. Maniring sira am, “To makasi o rako a ili ya. Ta makanizpi sira o amyan so avang a meyliyliktaw do jya. Ta ji pa angay do asa ka vatvatek am katemteman na rana a kabo na no makakaday a kangangay na.

²⁰ “Somaray kamo do teyngato, ta yarana nimabalinas o rako a ili a meyngaran so Papilon. Inyo a yaomanop ji Ama ta do to a kano amlivolivon no ciriciring na ni Ama ta do to a kano panoyonoywan na so ciring am somaray kamo, ta na rana nipangonong inyo ni Ama ta do to. So na rana nipasingsingtan jya.”

²¹ Makarahan am amyan so mowyat a tinsi a mangap so rako a vato a paliwaten na do awa. Maniring am, “Kakma ka sang a rako a ili do Papilon a mabalinas a ji rana meyteytotoro.

²² Abo rana dang o mamizing a maganaganam a meyyanwanood a kano meyzeyzapa tao. So icyakman da sang no meytanatana tao a kano mangsad a tao a ji rana amizing.

²³ Ji rana lila o zampo. Ji rana amizing o ciriciring da no meysinmo a tao. O meypananazangan a tao do dang am mamimin sira ney meynakem na tao do karawan. Abo ji na nicirara a tao do karawan no oyowyat ni Satan.”

²⁴ Manoyong o ili do Papilon a peydednan no peyoyaoyyan na ni Ama ta do to. Ta do ili rana ori am nikawakwakan da no panoyonoywan na so ciring a kano omanop jya tao. So ikanoyong na do ili ori nikawakwakan da no tao do teyrahem.