Ipaziman 17 - Seysyo No Tao

Pehngehngain na o ili do Papilon do somagpyan a mavakes

¹ O papito a ka tinsi a makakaday no panay am amyan jira so asa a mai jyaken. Maniring am, “Sijya, ta ipacita ko jimo o ipasingkad so yasomagpyan a mavakes. Iya rana am yatomnek a rako a ili do sirisiri no aro ayo.

² Abo ji na nicirara no somagpyan a mavakes a panipanirsirngen do karawan a omraralay no malas a tao do to. So icyakma dey masaki no tao do karawan a to ngonongonot jya.”

³ Yaken rana am nipeypalanginan na yaken no Seyzi a kangay na nyaken no tinsi do kabwan no nihakawan no tao. Am ori o nipakacita ko so asa ka mavakes a maoran do asa ka akmey vangkoro a omalalam. O kataotao no omalalam am makakaday no nivatvatkan a ciring a iraherahet na si Ama ta do to. Omalalam rana am apito oo na kano asa ngarnan a ozong na.

⁴ O mavakes rana am meyyayob so vangkoro a ayob a adketan no vowawan a kano olo a kano masingat a lalitan. O lima na am meypinan so vowawan a panay a kapnowan no makakaday a macimasesnek a vazay na.

⁵ Amyan so matayo so peypeypangayan a nivatvatkan do zozogwan na. Ori rana am, “Rako a ili do Papilon a akma dey ina no mapasagpyan so kataotao da do karawan.”

⁶ Karahan am macita ko o mavakes a masaki no rala no omanop ji Ama ta do to a tao a kano rala da no niwakwak da a nimeylimwang ni Yeso a tao. Macita ko am ikalak ko.

⁷ Maniring jyaken o tinsi am, “Ikongo mo kalakan nya. Ipanci ko jimo o peypeypangayan no yasomagpyan a mavakes a kano na avangan a yapito so oo a kano yasa ngarnan so ozong a omalalam ang.

⁸ O nimacita mo a omalalam am nimavyay pa no kakwa am yarana maliman sicyaikwaya. So ikakeykai na rana mai a apo do abo so takadan a gazawagaw a jyatenngi so karaherahem a meypangay do kararatan a ipasingkad na sya ni Ama ta do to. O tao do teyrahem a jidket so ngaran do vakong a yanan na rana no to meyyonong a ikavyay no pahad da no kaji na pa amaogan no karawan am mamimin sira malak no omalalam a nimavyay pa no kakwa yarana maliman sicyaikwaya. So ikanoyong da malak nya no meytotwaw no makwa.

⁹ “O mateneng a tao am to da na tenngi. O peypeypangayan no apito a ka oo am apito a ka tokon a lisnan no mavakes. Ipanci da ori a papito a ka panirsirngen.

¹⁰ Nimawakwak rana o lalima. O asa am meypanirsirngen sicyaikwaya. So ipeypanam na pa no asa mai. Am no mai am alikey iyan na meypanirsirngen.

¹¹ O nimavyay no kakwa yarana maliman sicyaikwaya am iya o ikawao a panirsirngen. Am karwan da ori no papito a ka panirsirngen a meypangay do kararatan a ipasingkad na sya ni Ama ta do to.

¹² “O peypeypangayan no mo nimacita yasa ngarnan a ozong am yaomanam pa yasa ngarnan a panipanirsirngen. Am sira rana am mahap da o peypanirsirngan da a kapacizanod da do omalalam a meypanirsirngen. Am alikey o iyan da do panirsirngen.

¹³ Sira rana yasa ngarnan a panipanirsirngen am meyyangangay o ahapan da sya. Ta itoro da o oyowyat da do omalalam.

¹⁴ Sira rana am arapen da o Kagling am haragen na sira no Kagling a kano nipamnekan na tao a omanop jya. Ta iya rana am kabtekan a Panirsirngen.”

¹⁵ Maniring pa jyaken o tinsi am, “Mo nimacita o ranom a yana lisnan no yasomagpyan a mavakes ang. O peypeypangayan no nang am peycyamahamahatawan na kano meykalyalipenpenan a tao a kano meykataretarek so ciriciring a tao.

¹⁶ O yasa ngarnan a ozong a kano omalalam am ikaoya da o mavakes. Am ori o nipehes da so kangangay na. So ikabo na rana no aywayob na a kakan da pa so asisi na a kasleb da rana sya temtemen.

¹⁷ Ta nipakemkem na ni Ama ta do to o nakenakem na do onowned da no asa ngarnan a panipanirsirngen. So icyakma dey asa so ahahapan sya, a kapanta da rana no omalalam so oyowyat a meypanirsirngen mangay si mangononong rana o ciring na ni Ama ta do to.

¹⁸ O mavakes rana a mo nimacita am rako a ili a yatomalamozong no panipanirsirngen do karawan.” Ori rana o ciring na jyaken no tinsi.