Ipaziman 15 - Seysyo No Tao

Tinsi a kano manowji rana alalaw

¹ Citahen ko am amyan so macitarek a mapangyangyalak. O peypeypangayan na am meypanam a alalaw no makwa. So niyan no papito a ka tinsi a tomalamozong no ney manowji na apito a ka alalaw. Ta pangononongan na rana ni Ama ta do to o peyoyaoyyan na do alalaw ang.

² Citahen ko pa am makacita ko so akma raney awa panganinwan a pacizavozan no apoy. So iyan no tatasa ka tao a nimacita ko. Sira rana am niharag da na o omalalam a kano kamamagenan na kano abo so tovil a tao. Sira rana am meytatanek sira do awa panganinwan a minan do nitoro na jira ni Ama ta do to a pakzikziken a meyyanwanood,

³ a meyyanwanood so anood ni Moyse a lamlamsoy ni Ama ta do to a kano anood no Kagling. O aingan no anood da am, “Mo Panirsirngen a tey mowyat a Tao do to a yatomalamozong no peycyamahamahatawan na. Yatey manoyong o vazay mo a yaji mapeycyakaban so tao.

⁴ Mo Panirsirngen, sino makadket jimo a ji raralayan. Sino ji nganood so ngaran mo. Imo saon o ji meylimoteng so onowned a Tao do to am. So ikamimin no tao do peycyamahamahatawan na a mangay do tangain mo a omraralay nimo. Ta yarana nimamimin o tao a yarana nimeymatamata do iwawalam mo a yaji mapeycyakaban so tao.”

⁵ Komavos ori am macita ko do teyngato o panaralayan a meywang. Amyan do sahad na so peyheyhekasan na ni Ama ta do to.

⁶ O tomalamozong no apito a ka alalaw a tinsi am makowbot a apo do panaralayan a meyyayob so maniray a ayob. O vatavat da am mibtek so vowawan.

⁷ O asa do apat a ka omalalam am itoro na o apito a ka vowawan a panay do papito a tinsi a kapnowan no oyaoya no to meyyonong a Tao do to.

⁸ O panaralayan na am kapnowan no aob a apo do azwazway a kano oyowyat ni Ama ta do to. Ji da nipakas no papito a ka tinsi so apito a ka alalaw am abo tao a makasdep do sahad no panaralayan.