Ipaziman 14 - Seysyo No Tao

Kagling a kano omanop jya tao

¹ Macita ko pa o Kagling a meytatanek do meyngaran so Sian a tokon. O macihza jya tao am yamyan so ikakapatan da ranaw so ikalima da zivo no ikadwa da latos (144,000) no tao. So ikamimin no zozogwan da adketan no ngaran no Kagling a kano ngaran na ni Ama na.

² O nimamizing ko a ciring a apo do teyngato am akma raney azda kano adey a zomaigezeg. O nimamizing ko pa am akma raney meykaryag.

³ Sira rana am meytatanek sira do sazapen no lilisnan a kano apat a ka omalalam a kano kamanrarakehan a meyyanwanood so vayo a anood. O meyyanwanood a tao am o nipasakay na do kapyapyan am yamyan so ikakapatan da ranaw so ikalima da zivo no ikadwa da latos (144,000) no tao o makateneng do anood a peyyanwanooden.

⁴ Sira rana am ji nagpyan so aktokto sira a macilocilolo do angayan no Kagling. Sira rana am nipasakay na sira do kapyapyan. So ipanoma da nira patanangen ji Ama ta do to a kano Kagling.

⁵ Ji pa nimangalalas sira. So ikanoyong da abo so kararatan.

Tatlo a ka tinsi

⁶ Macita ko o tinsi am somalap do hanit. Iya rana am yanan no to meyyonong a Mapasaray a Ciriciring na ni Ama ta do to a ipeylimwang na do peycyamahamahatawan na kado peycyeylilyan na kado meykataretarek so ciriciring do karawan.

⁷ Maniring a amlololos am, “Anooden nyo si Ama ta do to a iraralay. Ta yana marateng o araraw na no ipacici na a mapeykapyapinpin so tao do karawan. So raralayan nyo no yanimangamaog so hanit a kano teyrahem a kano awa kano tozongan no makakaday a atbod a ranom.”

⁸ Maniring o ikararwa no tinsi am, “Yarana mabalinas o rako a ili a meyngaran so Papilon. Ta yana itoro do tao o yamapasagpyan a saki a da yopen.”

⁹ Maniring o ikatatlo no tinsi a amlololos am, “O amraralay no omalalam a kano kamamagenan na nipadketan rana so zozogwan a kano lima am,

¹⁰ ayopen da o masozi a saki ni Ama ta do to. O saki rana am sozisozyan na ni Ama ta do to. So ikabo no kasyasyan na nira. O paglowan na so ayoyopen no peyoyaoyyan na am pasingsingkadan na sira do tangain no aro a tinsi a kano Kagling a matemtem no lila no apoy.

¹¹ O amrahet so kangangay da aob am jimtad a meypangay do teyngato. Sira rana omraralay no omalalam a kano kamamagenan na kano adketan no ngaran na so zozogwan am ji sira makayaknen a makaliliw so kataotao da do apoy ang.”

¹² Inyo rana a omonot do ciriciring na ni Ama ta do to a ji na lilis so nakem ji Yeso a tao am makowyowyat kamo pa omraralay nya.

¹³ Makamizing ko pa so ciring a apo do teyngato. Maniring am, “Amyapo sicyaraw eya o katey rako na rana no sarasaray da no mawakwak no vazay ni Yeso a tao. So vatvatkan mo do ciring eya.” Maniring o Seyzi am, “Manoyong o kakavos na rana no zikzikna da. So ipeywalam da rana, ta amyan so kakownongan no mina zikna da.”

¹⁴ Meyratateng am makacita ko so asa ka malavang a cinalab a lisnan no akma raney tao a meysakop so vowawan a meypinan so matarem a kekezdas.

¹⁵ O asa ka tinsi am makowbot a apo do panaralayan a tomawag do omlisna do cinalab ang. Maniring a amlololos am, “Yarana marateng o araraw na. So na ikanoyong rana no mowamowa ko do karawan a yarana mazako. So mangay mo langyan rana sya no kekezdas.”

¹⁶ Karahan am langin na rana no kekezdas na no amlisna do cinalab ang a kalangi na rana so mowamowa na do teyrahem.

¹⁷ Makacita ko pa so asa ka tinsi a apo do panaralayan a makowbot. Akman sang ori, ta meypinan so matarem a kekezdas.

¹⁸ Karahan am amyan so asa ka tinsi a tomalamozong no apoy a meytotwaw a apo do patanatanangan so nakem a tomawag do meypinan so matarem a kekezdas a tinsi. Maniring a amlololos am, “Tavazen mo no kekezdas mo o potaw do teyrahem, ta yarana mazako o asi no potaw.”

¹⁹ Meyratateng am langin na rana no tinsi no kekezdas do teyrahem a tomavaz so potaw a asi no kayo a kapangay na sya do pangangatesan so saki. Ori rana am peyoyaoyyan ni Ama ta do to.

²⁰ O potaw a asi no kayo am atdesen da na do siri no ili da a katesen a kapeytotwaw no rala apo do pangangatesan so potaw. So icyakma ney ayo a omhangop so karatayan. O karaherahem na am manda do kawakan.