Ipaziman 13 - Seysyo No Tao

Adwa ka omalalam

¹ Karahan am makacita ko so asa ka omalalam a apo do awa. O ozong na am asa ngarnan. Oo na am apito. O ozong na am makakaday no sakop no panirsirngen. Oo na am adketan no ngaran a iraherahet na si Ama ta do to.

² O nimacita ko a omalalam am akma raney kokoman so tao. O ai na am akmey ai no rako a kokoman so tao. Akman sang o ngongoy na. So nitorwan na no kamolay so oyowyat na kano lilisnan na kano keynakman na do omalalam.

³ O asa ka oo no omalalam am akman rana so makdeng a nimeyzaza. Am kanimapya na rana no nipeyzazan na. Ori o nisavasavak da no tao do karawan a macilolo do omalalam ang.

⁴ To da na raralayan o kamolay. Ta nitoro na o oyowyat na do omalalam. So icyakman na sang no omalalam a iraralay da. Maniring sira am, “Sino makataha so omalalam eya. Sino makahad sya.”

⁵ So nipyan na pa no kamolay so omalalam a mapazway a omraherahet si Ama ta do to a kapya na sya to ngonongonong do vazay na do adwa so ikasikalima (42) a vehan.

⁶ Ori o niraherahetan na so ngaran ni Ama ta do to a kano peyvahayan na kano macikaop jya tao do teyngato.

⁷ So to na rana myapyai sya amgogad no omanop ji Ama ta do to a tao a iharag na sira. So ikatey mowyat na tomalamozong no meykeytetngehan a tao do karawan a kano peycyamahamahatawan na kano meykataretarek so ciriciring a tao.

⁸ O tao rana do karawan a jidket so ngaran do vakong no niwakwak da Kagling a yanan na rana no to meyyonong a ikavyay no pahad da tao am ori o amraralay nya. O vakong rana ya am na adketan no ngarangaran da no kaji na pa mangamaogan so karawan.

⁹ O meycicilwan a tao am amizngen nyo an.

¹⁰ O ipanci a vaoden am mangay kavaod sira an. O ipanci a mahap so inawan no ipangan am mangay kangay no inawan da no ipangan. So ikamimin da no amraralay ni Ama ta do to a ji macizizikna do kapeyhanhan da nya.

¹¹ Makacita ko pa so asa ka omalalam a apo do oned no tana. Ori rana am adwa ozong na akman rana so ozong no kagling. Am o izezyak na am akman rana so kamolay.

¹² Amyan ori do tangain no nimanmanma a omalalam a mapeyvazay so rako a oyowyat no nimanma a omalalam ang. Iya rana am gacigatan na o tao do karawan mangay omraralay no nimapya rana so nipeyzazan a omalalam ang.

¹³ Meyvazay o ikadwa na no omalalam so mapangyangyalak a vazay am pakasen na o apoy a apo do teyngato do tangain no aro a tao.

¹⁴ So nipakahap na so rako a oyowyat a meyvazay so mapangyangyalak a vazay do tangain no nimanma na omalalam. Am ori o nilittan na do tao do karawan. Ipanci na o tao do karawan a mamaring so kamamagenan no nimatavaz no ipangan a omalalam.

¹⁵ Makahap o ikadwa na no omalalam so rako a oyowyat am avyain na o akma ney keyteytawan no nimanma na omalalam. So nipeyzezyak na rana a kawakwak na so ji raralay nya a tao.

¹⁶ Karahan am gacigatan na o aro a tao, tana meynakem a tana jyeynakem, a tana makcin a tana mabsoy, a tana peylamsoin da kano ji da peylamsoyan, miminen na o wanan da kano zozogwan da tovilan.

¹⁷ O ipadedket am vilang a ngaran na no omalalam. O jya nipadketan am ji makasazang so kanen na. Ji makapalit no apzapzatan na so ileylamnay na so nakem.

¹⁸ O mateneng a tao am to da na tenngi o peypeypangayan no vilang a ngaran no omalalam. Ta o peypeypangayan no vilang am asa ka tao. O vilang am yanem o neykasikapito a poo no neykapito a ranaw (666).