Ipaziman 12 - Seysyo No Tao

Mavakes a kano kamolay

¹ Kapeytotwaw no mapangyangyalak a vazay do hanit. O peypeypangayan no nang am amyan so makdeng a vazay do kadadayan na so araraw. So niyan no asa ka mavakes a meyyayob so araw a kazasag na do vehan a meysakop so adwa so ikarwa (12) a mata no hanit.

² O mavakes rana am makeykai rana amyan do vahay. So ilololos na makaliliw so velek na.

³ Karahan am amyan pa so mapangyangyalak a meytotwaw do hanit. Amyan so asa ka rako a akmey vangkoro a kamolay. Oo na am apito. Ozong na am asa ngarnan. Makakaday oo na no sakop no panirsirngen.

⁴ O ipos na am kowkowen na o icyakatlo no mata no hanit a papispisen do teyrahem a kapeytatanek na do tangain no mavakes a tod na ji ngyan do vahay a mapananala so katazak na tao no kanakan a kapacyop na sya a kanen.

⁵ Amyan do vahay o mavakes am mahakay o anak na. So icyakma ney vahalang so kowyowyat a tomalamozong so peycyamahamahatawan na no makwa. Am o kanakan rana am katkaten do lilisnan ni Ama ta do to,

⁶ a kaksoz no mavakes do kahasan a kangay na do angayan na nya ni Ama ta do to. So nipeyveyveknan na sya ni Ama ta do to so adwa so ikasikalima (42) a vehan.

⁷ Karahan am meyyarap sira do teyngato. O meyngaran so Micyale a tinsi a kano kararay na tinsi am macyarap do kamolay a kapalolo na no kamolay so kalamsoyan na macyarap jira.

⁸ Am nimaharag o kamolay. So ji da rana vezeji do teyngato no kamolay a kano kalamsoyan na,

⁹ kakas na sya ni Ama ta do to so rako a kamolay. Ori rana am nimeytetnga volay no kakwa. O ngaran na am si Satan a yatomirara so tao a yameyraraten. O kamolay rana am nimamispis do teyrahem. So icyakman da sang no kalamsoyan na iwalit na do teyrahem ni Ama ta do to.

¹⁰ Karahan am makamizing ko pa do teyngato so macyak a ciring. Maniring am, “Oya rana o araraw no na patazadangan jyaten ni Ama ta do to. Na rana nipacita ni Ama ta do to o oyowyat na. Yana rana nipatwaw ji Kizisto o oyowyat na a meymatmatngeh no teyngato. Ta na rana nipapispis do teyrahem ni Ama ta do to o yamraherahet so akma tey kakteh do cinai do maraw a kado mahep do tangain na ni Ama ta do to.

¹¹ O rala no Kagling a kano nipeylimwang da a nanao ni Ama ta do to am ori o da niharag so kamolay. So ikanoyong da yaji hawa no yada kaliman.

¹² Am ori o isaray nyo a tao do teyngato. So to nyo makasi a tao amyan pa do karawan. Ta yasomozi si Satan a yamangay jinyo do dang. Ta katenngan na o kalikey rana no araraw na.”

¹³ Katenngan no kamolay o kanimapaptad na rana do teyrahem am mangay na cyocyowen o keyyan pa do vahay a mavakes.

¹⁴ Karahan am makahap o mavakes ang so adwa ka panid no kangkang a ipakasalap na rana mangay do kabwan no nihakawan no tao a meyvahay. So iyan na do dang so kasisi so ikapat a kawan a mapeylamnay so kataotao na a ji na rana gogadan no kamolay.

¹⁵ Meyratateng am amyan so rako a ranom a mamsot do ngongoy no kamolay a ipazyod na so mavakes.

¹⁶ Am mina kasidong na sya no tana so mavakes a nisomepsep do tana so ranom a apo do ngongoy no kamolay.

¹⁷ Karahan am somozi o kamolay a omarap so komownongan do mavakes. Ta sira rana am omonot do ciriciring na ni Ama ta do to a tao a omanoyong do nanao ni Yeso a tao.

¹⁸ So nitanek no kamolay do pasalan.