Ipaziman 11 - Seysyo No Tao

Rarwa ka lamlamsoy na ni Ama ta do to

¹ Amyan so nimanta nyaken so kayo a dedpang. Maniring jyaken am, “Tanek a kaktokto mo do yana tankan no yararalayan ni Ama ta do to a kano patanatanangan so nakem a kavilang mo do karwaro da no yamanaralay a tao.

² Am ji mo aktoktoi o pantaw na, ta o pantaw na am yarana nitoro do beken a tao do Yotay. Sira rana am ipeykaraherahet da o akma ney ili ni Ama ta do to a yadwa so ikasikalima (42) a vehan.

³ Manovoy ko so rarwa ka meyyayob so zaping a tao a yongkad na ni Ama ta do to. Sira rana am ipeylimwang da o ciring na so adwa so ikasikalima (42) vehan.”

⁴ O rarwa ka lamlamsoy na ni Ama ta do to am katonodan da o adwa ka kayo a kano adwa ka zampo a meytatanek do tangain ni Ama ta do to a Panirsirngen no karawan.

⁵ No amyan so tao a amnakenakem so kapeyzaza na sira am to makowbot do ngongoy da o apoy a itemtem da so kavosoyan da a kawakwak da rana.

⁶ Amyan so oyowyat da amzazat do cimoy do peylimwangan da no ciring na ni Ama ta do to. So talamozongan da no tozongan no ranom a kapeyvaliw da so ranom a rala. So iyan no oyowyat da a mapeykaraherahet so tao do karawan no makakaday a alalaw. Am jyapingsan o araraw no ipeykaraherahet da so tao.

⁷ Mateyka da ipanci o ciring na ni Ama ta do to am arapen na sira no omalalam a apo do gazawagaw a kaharag na sira wakwaken.

⁸ O kataotao da am to rana nangyan do rarahan do rako a ili. Do dang rana am nipadketan da so Panirsirngen ta do jyojika. O pehngehngayan da so ngaran no ili am Sotoma kano Ayci.

⁹ O nimapo do peycyeytetngehan a tao a kano peycyeylilyan a kano meykataretarek so ciriciring a kano peycyamahamahatawan na am mangay da citahen o kataotao da so kasisi so ikapat a araw. Ji da amya o tao a ambobo nira.

¹⁰ Somaray o tao do teyrahem a makacita sira a nimawakwak rana. Macyazazaw sira somaray, ta nimapo do rarwa ka lamlamsoy na ni Ama ta do to o alalaw no tao do karawan.

¹¹ Mavitos rana o kasisi so ikapat a araw am avyain na rana sira ni Ama ta do to. Ori o nipeyvangon da rana. Am ori o nikanyahey da no tao a makacita sira tomanek.

¹² Makamizing sira o rarwa ka tao so amlololos a apo do teyngato. Maniring jira am, “Sijya kamo do jya.” Karahan am citahen da sira no kavosoyan da omavang do cinalab a meycyakavat do teyngato.

¹³ Karahan am meykanini. Am ori o nikazkem na no pozos na no rako a ili. O nimawakwak no kanini a tao am kakapitwan na ranaw (7000) sira. So nikanyahey da no nimavezed pa tao a kazway da rana si Ama ta do to do teyngato.

¹⁴ Komavos o ikadwa no alalaw am meypanam o ikatlo no alalaw a mai.

Ikapito no zapa

¹⁵ Avyotan no ikapapito no tinsi am amyan so macyak a ciring do teyngato. Maniring am, “Oyowyat a yatomalamozong no karawan am yamonganay do Panirsirngen ta kani Kizisto a nipamnekan na a yatomalamozong nya a mangay do kaidan no karawan.”

¹⁶ O yamyan do tangain ni Ama ta do to yaomlisna do lilisnan na yapapat so ikakatlwan (24) a kamanrarakehan am yamamimin a yameylilitod do teyrahem a yaomraralay ni Ama ta do to.

¹⁷ Maniring sira am, “Nimakalapo no kakwa na kato ngayyan sicyaikwaya Panirsirngen a yatey mowyat a Tao do to. Namen isaray imo, ta yamo nyahap no rako a oyowyat mo o mo kapeypanirsirngen sicyaikwaya.

¹⁸ Ta no kapeyoyaoya da no ji raralay nimo a tao am nipadna mo rana o peyoyaoyyan mo jira. Yarana marateng o araraw no yamo ipacici so nimawakwak a tao. O lamlamsoy mo a panoyonoywan mo so ciring mo a kano yaomanop jimo a yamraralay nimo a tao am tana meynakem sira, tana makasi a tao sira am mo miminen sira azawen. Sira rana yamapeykaraherahet so karawan a tao am yamo balinasen sira.”

¹⁹ Karahan am meywang rana o raralayan ni Ama ta do to do teyngato a kapeytotwaw no kavangan a kakozongan no nivatvatkan a pangozayan a ciring na ni Ama ta do to do Isedi a tao no kakwa pa amyan do panaralayan, a kapeycicilat na zomaigezeg, a kapeykanini na rana, a kapeycyahekas no rarako a makarerekmeh do teyrahem.