Ipaziman 10 - Seysyo No Tao

Tinsi a kano alikey a makowkow a vakong

¹ Nimakacita ko pa so asa ka tey mowyat a tinsi apo do teyngato a meyyayob so cinalab a meysakop so nangirang. O moing na am akma raney araw a maniray. O ai na am akma raney amlida apoy.

² O lima na am meypinan so mavezay a likta vakong. O asa ka ai na am amzasag do awa. O asa ka ai na am amzasag do kacyan.

³ No amlololos ori am akma raney kokoman so tao so ilololos. No ipisa amlolos am apito o adey a zomaigezeg.

⁴ Padketen ko o peypeypangayan no apito a ka adey am amyan so ciring a apo do teyngato. Maniring am, “O peypeypangayan no yapito a ka adey am ji mo meycicicyan. Ji mo padketa.”

⁵ Komavos rana ori am o nimacita ko a tinsi a meytatanek do awa kado kacyan am macita ko rana mapatala so wanan na do teyngato,

⁶ kasirisiring na si Ama ta do to a nimangamamaog so hanit a kano teyrahem a kano awa kano meycyamadadayan a nyamamaog na. Maniring am, “Ji rana inini ori.

⁷ Ta no si omanam pa avyotan no ikapito no tinsi am pangononongan na rana ni Ama ta do to o mina ciring na pa so aro a lamlamsoy na a panoyonoywan na so ciring na.”

⁸ Makarahan am mamizing ko pa o nimamizing ko pa no kakwa apo do teyngato. Maniring am, “Mangay mo hapen kai mo no yamavezay a vakong do lima no tinsi a yameytatanek do awa kado kacyan.”

⁹ Mangay ko am ipanci ko o tinsi a tomoro nya jyaken so likta vakong. Maniring jyaken am, “Hapey a katlen mo nya. Tana meyngen do velek mo am cyaha, ta maganinem do ngoso mo.”

¹⁰ Karahan am todahen ko o likta vakong a apo do lima na a kakan ko sya. So nikanoyong no ngoso ko a maganinem. Am itlen ko am todeyngen rana o velek ko.

¹¹ Maniring pa jyaken o tinsi am, “Ipisa ka pa a mangay a mapaziman sya do peycyamahamahatawan na kano meykataretarek a tao a kano meykataretarek so ciriciring a kano aro a panipanirsirngen.”