Ipaziman 1 - Seysyo No Tao

¹ O vakong rana ya am na adketan no nipatwaw ni Yeso Kizisto a vazay. O na nitorwan nya jya ni Ama ta do to so akman sang a vazay am mangay na ipanci do aro a lamlamsoy na o yarana makeykai a makaranes a vazay. Si Kizisto rana am nimapahanhan so tinsi a mangay mapacita no aro a vazay eya do lamlamsoy na si Yowani.

² Meyratateng am padketen na rana ni Yowani do vakong o nimacita na aro a vazay. Ori rana am nipatwaw ni Yeso Kizisto a ciriciring a apo ji Ama ta do to.

³ O amvilang do vakong eya tao am tey yapya sira. O makamizing so yana nipaziman a ciring a kapangonong da jya am tey yapya sira o akman sang a tao, ta yarana makeykai o araraw na no ipakaranes na.

Ipeyminaminasi na sira o apito a kyokay

⁴ Yaken rana am si Yowani ko. Yako ipeyteygami sira o yapito a ka kyokay do Yasiya pongso. Inaoy no si itoro na jinyo o ikapiya no onowned nyo a kano pangangarilawan a apo ji Ama ta do to a jyablis a Tao do to a nimapo no kakwa a na kato ngayyan sicyaikwaya a mangay do kaidan no karawan a kano Seyzi na ni Ama ta do to,

⁵ a kani Yeso Kizisto a ta ipeyhanhan so ciring. Iya rana am ney manma na nimirwa a mavyay. Si Yeso Kizisto rana am yatomalamozong no panipanirsirngen do karawan. Na ikarilaw yaten. Na nipahawa yaten no rala na do yata peyraratenan.

⁶ Na nipamnekan yaten ni Yeso a to ngonongonong do kangay ta do tangain na ni Ama ta do to a omraralay nya. Inaoy si omaing o azwazway a kano oyowyat ji Yeso Kizisto a mangay do kaidan no karawan. Amin.

⁷ Citahen nyo an, si Yeso Kizisto a maciralay do cinalab a mai an. Mamimin o tao a makacita sya, mangay do nimapadket sya do jyojika tao o makacita sya. So ikamimin no tao do karawan a malaw nya so onowned a makaranes do karawan. So ikanoyong no akman so sang.

⁸ Maniring si Ama ta do to a Panirsirngen ta am, “Yaken am Aarva kano Yamicya a nikapwan na kano pangavosan na no aro a vazay eya.” Ta si Ama ta do to rana am jyablis a Tao do to a nimapo no kakwa a na kato ngayyan sicyaikwaya a mangay do kaidan no karawan.

Nioyatan no Seyzi si Yowani a kapakacita na si Yeso Kizisto

⁹ Yaken rana am si Yowani ko a akma nyoy kakteh do cinai. Ta yata akmey asaha do tangain ni Yeso. So yako ipacizanod jinyo a yaji macizizikna do alalaw nyo, do yana katalamozongan nyaten ni Ama ta do to. Niplin da yaken do alikey a pongso a meyngaran so Patemo do kapeylimwang ko no ciriciring na ni Ama ta do to a kano nanao a nipatwaw ni Yeso Kizisto.

¹⁰ Ipisa ka niciyo na am oyatan na yaken no Seyzi. So nipakamizing ko so akmey meyzapa a manci nya jyaken do likod ko.

¹¹ Maniring am, “Imo rana am vatvatkan mo o mo macita a kaparara mo so vakong do apito a ka kyokay do Ivoso a kado Semayna kado Peycyamo a kado Tiyatila kado Satise a kado Veylatevey a kado Lawticya.”

¹² Citahen ko o macisirsiring jyaken a tao am mapengkad ko o apito a ka peyzeyzampwan a ovay.

¹³ O avak no peyzeyzampwan am amyan so asa ka akmey tao a meytatanek do dang a meyyayob so magorogod a mangay do ai na a mibtek so ovay do vatavat na.

¹⁴ O avok na am akman so bobow no kagling so kalavalavang. O mata na am akman so apoy a manikap.

¹⁵ O ai na am akmey nilinasan a aswaz. O ciring na am akman so azda a zomaigezeg.

¹⁶ O wanan na am meypinan so apito a ka mata no hanit a somangpa so matarem a ipangan. O moing na am akman so peyignan no araw a mangowap.

¹⁷ Macita ko am to ko naziyazikaz do tangain na, akman rana so nimawakwak a tao. Meyratateng am pinanan na yaken no wanan na. Maniring am, “Ji ka nyahey. Ta yaken rana am nikapwan na kano pangavosan na.

¹⁸ Yaken rana am to ko meyyonong a mavyay. Nimawakwak ko no kakwa. Am ko na mavyay sicyaikwaya a mangay do kaidan no karawan. Yaken rana am yatomalamozong no kawakwakan a kano yaomanam pa vazay ko do mawakwak a tao.

¹⁹ Imo rana am vatvatkan mo o macita mo. Tana sicyaikwaya, tana yaomanam pa a vazay am miminen mo a padketen.

²⁰ O peypeypangayan no yapito a ka peyzeyzampwan a ovay a macita mo do wanan ko am yapito a ka kyokay. O yapito a ka mata no hanit am panipanirsirngen no yapito a ka kyokay.”