Cyalatay 5 - Seysyo No Tao

Beken a lamlamsoy na yaten no iwawalam na ni Moyse

¹ Na rana niovayan yaten ni Kizisto do yamvaod jyaten a iwawalam ni Moyse. Ori o ji nyo rana meyhanhani no adan a iwawalam ni Moyse.

² To ko na macitangayan jinyo am no si ipeyhanhan nyo o kayongkad do kataotao nyo a ipasaray nyo si Ama ta do to am abo peypeypangayan ni Kizisto jinyo.

³ Ko pazimanen pa jinyo so ipisa. No si yongkadan nyo o kataotao nyo am pangononongan nyo saon o aro a iwawalam ni Moyse am.

⁴ Inyo rana yamnakenakem so kabnek na jinyo a abo so raraten ni Ama ta do to a yamangozay do iwawalam na ni Moyse am kanyo manoyong a yameyparai ji Kizisto, do nyo kataosya so oyowyat na ni Ama ta do to a yasomidong jinyo.

⁵ Am yaten rana am na oyatan yaten no Seyzi a meyhanhan ni Yeso Kizisto. Am ori o na abnekan rana jyaten ni Ama ta do to a abo rana so raraten do tangain na.

⁶ Ta o tao a macikaop rana ji Yeso Kizisto am ji na rana ngezsangan o kaji na yongkadan do kataotao na. Ta o ney makdeng na ji Ama ta do to am ipeyhanhan ta si Kizisto a kapangarilaw ta so icyatatao ta.

⁷ Kanyo tey yapya so ahahapan sya a yamnakenakem si Kizisto. Sino a yamazazat jinyo a yanyo kaji ngonotan do manoyong a nanao.

⁸ Jyabo ka si Ama ta do to no amzazat jinyo a. Ta iya o nimamnek jinyo a omanoyong ji Yeso.

⁹ Ta naknakmen nyo pala o kosozi no odong. Tana alikey pazavozen am mapeymway na o nipeysolisoliket a odong. Akman sang o malas a nanao a makeykai a meylimwang a ikarahet no tao.

¹⁰ Am ko ipeyhanhan inyo, do ta kapeyyangangay a macikaop ji Kizisto. Yabo kapacitarek no nakenakem nyo jyaken a. O tao rana mapeyzavozavoz jinyo am mangay a meydedna jya o peyoyaoyyan na ni Ama ta do to.

¹¹ No si ipeylimwang ko o kayongkad do kataotao am ikongo da rehrehtan jyaken. O da rehrehtan jyaken am ko ipeylimwang o jyojika ni Kizisto. Am ori o da oyyan nyaken no ji raralay ni Yeso.

¹² Ko apyapyahen pa o kato da na ngarwan jinyo no yamapeyzavozavoz jinyo a tao.

¹³ Manga kakteh, o na nipamnekan jinyo ni Ama ta do to am na ovayan inyo a yamvaod no iwawalam ni Moyse. Am ori o ji nyo to mamyapyai no kataotao nyo a italamozong no marahet a nakenakem nyo. Apyapya pa o pangarilawan a isidong nyo so kadwan jinyo.

¹⁴ Ta yana to zagoma no pangangarilawan o iwawalam na ni Moyse. Ta si ahapen ta o ciring do Seysyo a manci no, “O aryarilaw mo so kataotao mo am akman sang o karilawan mo no icyatatao mo,” am nimahap ta rana o iwawalam ni Moyse.

¹⁵ Am no si akman kamo so omalalam a somongisongit so kadwan jinyo am jyabo kapya nyo a.

Italamozong no Seyzi a tao

¹⁶ O yako ipanci am onotan nyo o peypalanginan na ninyo no Seyzi an. Ta ori o ipakazazat nyo do onowned nyo a to mangozangozay do apyahen nyo no nakem.

¹⁷ Ta o marahet a ikeykakza no kataotao ta am macitarek a kano ikakza na jyaten no Seyzi. So icyakma dey meykavosoyan, do kazazat na jyaten no Seyzi a mangozay do marahet a ikeykakza no kataotao ta.

¹⁸ No si peypalanginan na inyo no Seyzi am ji na rana vaoda inyo no iwawalam na ni Moyse.

¹⁹ Mapengkad o marahet a vazay no tao. Ta to rana tenngi do icicirawat da, akman so macimasesnek a vazay,

²⁰ manaralay so malas a iraralay a kano mamnek a kano meyliliman a kano maoyaoyahen a kano mararaten a kano mapeysyasyay so nakem no tao,

²¹ manginanahet a kano mayoyopen so saki a kano makakaday pa a ikarahet no tao a vazay. Oya rana am nipaziman ko na jinyo no kakwa. Am yako olin pa ipanci jinyo. Ta o mapeyvazay so akman sang a tao am ji macilovot do italamozong na ni Ama ta do to.

²² O italamozong no Seyzi a tao am mangarilaw, masaray, apiya o nakenakem na, jyaharag no alalaw, mazonos, manidong so tao, ji mangalalas,

²³ ji mapahama so nakem, ji to mangozangozay do nakem. So ikabo no pasobnan na a ciriciring na ni Ama ta do to no akman sang a tao.

²⁴ O yaomanod ji Yeso Kizisto a tao am akma dey nipazanod o marahet a nakenakem da do jyojika ni Yeso Kizisto, do kanimawakwak na no raraten ta.

²⁵ Manoyong o kanimanta na rana nyaten no Seyzi so vayo a onowned ta. Am ori o na ikanoyong a yatomalamozong nyaten.

²⁶ Ji ta mapahama so nakem. Ji ta pasozisozya o kadwan jyaten. Ji ta manginanahet.