Cyalatay 4 - Seysyo No Tao

^1-2 Am tana kanakan o omamoon so kangangay na ni ama na am abo peytarkan na kano lamlamsoy, ta ji pa teneng o kanakan a meymatmatngeh no kangangay na. Am ori o iyan no makaveyvow a tao a somidong sya a meymatmatngeh no kangangay na, mangay do ipakaveyvow na rana.

³ Akman sang an, ta no kaji ta pa meypahagnatan so nakenakem ji Kizisto no kakwa am akma tey lamlamsoy a italamozong no jyapsepsek a iwawalam no tao do karawan.

⁴ Am marateng rana o araraw a nipamnekan na ni Ama ta do to am tovoin na rana o Anak na alavaten no asa ka mavakes a italamozong no iwawalam ni Moyse.

⁵ O ikakman na sang am ovayan na sira o mavaod no iwawalam na ni Moyse a tao. So ikanoyong ta rana meyngongyod a akma ney anak ni Ama ta do to.

⁶ O nitovoyan na sya jinyo ni Ama ta do to so Seyzi ni Kizisto am kamo meyngongyod rana akma ney anak. Am ori o nyo jyanigi a yatomawag ji Ama ta do to a Ama nyo.

⁷ Inyo rana sicyaikwaya am beken a lamlamsoy kamo rana a na italamozong no iwawalam ni Moyse, ta akma ney anak rana inyo ni Ama ta do to. O akma ney anak ni Ama ta do to am ori o makahap so aryarilaw na.

Ikarahet na ni Pawlo o tao do Cyalatay

⁸ No kakwa pa am ji nyo a tenngi si Ama ta do to. Am ori o ikanoyong nyo a lamlamsoy no makakaday a malas a iraralay nyo.

⁹ Am nyo katenngan si Ama ta do to sicyaikwaya. So na ipakateneng jinyo ni Ama ta do to a akma ney anak. Am ikongo kamo a yapa mangay amwoli so makanyaw a iwawalam nyo a abo so peypeypangayan. Manngwa, nyo apyapyahen pa o kakma nyoy lamlamsoy no makanyaw?

¹⁰ Nyo pahamahamahen pa o pamarmarngan nyo so kanen do araraw a kado vehavehan a kado awawan.

¹¹ So ko kalawan ninyo an, do na kakmey meyyopowpas a cinalab no ninanao ko jinyo no kakwa.

¹² Manga kakteh, inaoy si inarahen nyo yaken a ji rana mangozay do iwawalam ni Moyse. Ta beken a iwawalam nyo o kapangozay nyo do iwawalam ni Moyse a beken a tao do Yotay. Am ori o ko sarayan ninyo.

¹³ Ta no keyngen ko am nipeyveyveken nyo yaken no ka ori pa so kapeylimwang ko no Mapasaray a Ciriciring na ni Ama ta do to jinyo.

¹⁴ Tana nyo ikarahet no kangangay o ingingnen ko am nyo jya nikahayo yaken. Ta nyo nipehngay yaken do tinsi na ni Ama ta do to a taotawwen. So icyakma koy Yeso Kizisto a nitaotao nyo,

¹⁵ kasasaray nyo no kano nang, kaji nyo ngosowan so mata nyo a itoro jyaken, do nyo karilawan nyaken. Am kamo makongokongo sicyaikwaya.

¹⁶ Ala ori nyo oyyan yaken am ko na ji nayotaywa o ciring ko a ko ivavaga jinyo.

¹⁷ Sira rana yamnanao jinyo no malas am da kakzeben o kapacioya nyo jyaken a kaglaw nyo nira.

¹⁸ Apya o karilaw da ninyo. Am ney yapya na am tana myan ko dang a tana abo ko dang am to meyyonong o karilawan da ninyo.

¹⁹ Kamo akmey anak ko na. Ta yatey rako o aryarilaw ko jinyo. So yako icyakmey mavakes a toda jyapaw so totowang so alalaw a omnanao jinyo, mangay no si meynara nyo na si Yeso Kizisto so icicirawat.

²⁰ Ko toda ji nalap a macikaop jinyo a kaji ko na ratan ninyo so kangangay, do kahawa ninyo a da pamizngen no malas a ciring.

Pehngehngain ni Pawlo o iwawalam ni Moyse ji Hacya kani Salay

²¹ Inyo rana yamangozay do iwawalam ni Moyse sicyaikwaya am manngwa, nyo katenngan o ciriciring a yadomket do iwawalam na ni Moyse an?

²² O nivatvatkan do Seysyo am rarwa o anak ni Apolahan. Asa am anak no lamlamsoy na. Asa am anak no meyngongyod a mavakes na.

²³ O anak no lamlamsoy na am omaing do pamnemnekan na. Am o anak no meyngongyod a mavakes na am omaing do mina ciring na jya ni Ama ta do to.

²⁴ Sira rana ya rarwa ka mavakes am kehngehngay no adan a kano vayo a pangozayan a ciring ni Ama ta do to. O meyngaran so Hacya a lamlamsoy am omagaz do iwawalam na ni Moyse do Sinay a tokon. O ipanci da ananak ni Hacya tao am pangozayan da o iwawalam na ni Moyse. So icyakma dey lamlamsoy no iwawalam na ni Moyse.

²⁵ O Sinay a tokon am amyan do Alapo. Akma ney kehngehngay no tao do Yelosaleng a mangozay do iwawalam ni Moyse.

²⁶ Am o mavakes a meyngaran si Salay am akma tey ina, do kakma ney mapehngehngay sya do Yelosaleng do teyngato a ji rana nalamozongan no iwawalam na ni Moyse.

²⁷ Ta o ciring do Seysyo a omaing ji Salay am, “Imo rana ji meytaodtod a ji pa nimangalavat a mavakes am somaray ka an. Imo rana ji pa nimacizaza mavakes am arakorako pa o sarasaray mo, ta pasaoden ko jimo o ananak mo. So ikanoyong mo a arwaro pa so anak a kano lamlamsoy da mavakes.”

²⁸ Manga kakteh, kamo na meyvaliw a akma ney anak ni Ama ta do to. Ta yarana nimangononong jinyo o ciring na ni Ama ta do to, akman si Isa a anak ni Salay. Ta iya rana am nimangononong o ciring na ni Ama ta do to ji Apolahan.

²⁹ No kano nang am o anak na ni Hacya am nipeyrarahet na o kakteh na si Isa a nimalikey apo do Seyzi. Yakman so tao do Yotay sicyaikwaya a yamangozay do iwawalam na ni Moyse a yamapakakasi jyaten.

³⁰ Am o ciring do Seysyo am, “Pagcinen mo o lamlamsoy mo a mavakes a kano anak na. Ta o anak no lamlamsoy mo am ji macivonong do kangangay mo. Ta o kangangay mo am amoonen no meyngongyod a anak no mavakes mo.”

³¹ Ori an, manga kakteh an, ta ji macikownongi do anak no lamlamsoy a mavakes. Ta yaten rana am akma ney anak yaten ni Ama ta do to, do yata kaji mangozayan rana do adan a pangozayan a ciring.