Cyalatay 3 - Seysyo No Tao

Meytarek o iwawalam ni Moyse a kano raralayan ta ni Kizisto

¹ Inyo rana abwata so kapsepsekan a tao do Cyalatay am yamanoyong na kanidomket ni Yeso Kizisto do jyojika. Am sinosino yamapeykawaw jinyo. Manngwa, kamo mavota saon?

² Pancyan kamo pala jyaken. Iwawalam na ni Moyse o yanyo ipakahap so Seyzi na ni Ama ta do to? No yapo do yanyo nimamizing a Mapasaray a Ciriciring na ni Ama ta do to.

³ Yakamo meypanngonngo a yakmey abo so nakem. No kakwa am nipeyhanhan nyo o Seyzi a tomalamozong ninyo. Am ikongo kamo a to mangozangozay do nyo ahapan sya a mapasaray si Ama ta do to sicyaikwaya.

⁴ Manngwa, abo peypeypangayan na no kato nyo meyrektan do mina alalaw nyo no kakwa? Jyabo kakman na sang a.

⁵ Na nitoro ni Ama ta do to o Seyzi jinyo a yamapeyvazay so mapeyzokab a vazay. Am manngwa, yamonganay ori do yanyo kahap so iwawalam na ni Moyse? No yamonganay do yanyo kanimakamizing so Mapasaray a Ciriciring na ni Ama ta do to.

⁶ Akman si Apolahan a nimalavat da do Seysyo. Maniring am, “Iya rana am nyanoyngan na si Ama ta do to. Am ori o nibnekan na sya a abo so raraten do tangain na.”

⁷ Am ori an, no si myan so tao a meyhanhan ni Ama ta do to am manoyong ori a macikownongan ji Apolahan.

⁸ Nipaziman na rana ni Ama ta do to do Seysyo o kabnek na so beken a tao do Yotay a abo so raraten do tangain na, do kapeyhanhan da ni Ama ta do to. So nipazimanan na rana sya ji Apolahan so akman sang a Mapasaray a Ciriciring no kakwa pa. Maniring am, “Mamimin o tao do karawan a ipanta ko so aryarilaw ko, do mo kapeyhanhan nyaken.”

⁹ Nyanoyngan na ni Apolahan. Ori o nikarilawan na nya ni Ama ta do to. So ikamimin no omanoyong jya tao a ikarilaw na ni Ama ta do to.

¹⁰ O tao a meyhanhan no iwawalam na ni Moyse am meydedna jira o peyoyaoyyan na ni Ama ta do to, do kaji da makataptapan sya a peyvazain. Ta o ciring do Seysyo am, “O tao a ji makataptap sya peyvazain so yadomket a iwawalam ni Moyse am mangay jira o peyoyaoyyan na ni Ama ta do to.”

¹¹ Ori o ikanoyong no kabo no asa ka tao a abneken na ni Ama ta do to a abo so raraten do tangain na a mangozay do iwawalam ni Moyse. Ta o ciring do Seysyo am, “O meyhanhan ni Ama ta do to a tao o abneken na abo so raraten do tangain na. So ikanoyong na rana makahap so to meyyonong a ikavyay no pahad na.”

¹² Am o iwawalam na ni Moyse am abo kasngesngenan na do kapeyhanhan ni Ama ta do to. Ta o ciring do Seysyo am, “O mangozay do iwawalam na ni Moyse am abo dang o likliken a ciring.”

¹³ Am si Kizisto o nimalit jyaten do oyaoyyan na nyaten ni Ama ta do to a ji makataptap so iwawalam na ni Moyse. Ta o ciring pa do Seysyo am, “O nipadket da do jyojika am iya o nyangayan no peyoyaoyyan na ni Ama ta do to.”

¹⁴ O nikakman na sang ni Yeso Kizisto am ikakza na o aryarilaw na ni Ama ta do to si Apolahan a mangay na itoro do beken a tao do Yotay. So ta rana ikamimin a makahap so Seyzi a nipanci na itoro na jyaten ni Ama ta do to, do kapeyhanhan ta nya.

Meytarek o iwawalam na ni Moyse a kano pangozayan a ciring na ni Ama ta do to

¹⁵ Manga kakteh, o ahahapan sya no tao am no meysirisiring o rarwa ka tao do vazay da am to da na mamneki o apyahen da. So ikabo rana no mapasobna do nipamnekan da vazay, do kabo rana no nipeyras da vazay.

¹⁶ Akman sang an, o nipanci ni Ama ta do to a nakem na a itoro na ji Apolahan a kano asa ka tao do sivosivovoong na. So ji na nimapakaciringi sya do aro a tao, ta asa ka tao. Iya rana am si Kizisto.

¹⁷ O peypeypangayan no ciring ko am ji meyyopowpas o nimanmanma a nipamnekan na ni Ama ta do to a ciring na. Tana nimanownowji o iwawalam ni Moyse so atlo a poo so ikasikalima ranaw (430) so awawan am jyablis o mina ciring na ni Ama ta do to ji Apolahan.

¹⁸ Ta no si pangozayan ta o iwawalam na ni Moyse o torwan na jyaten so aryarilaw na ni Ama ta do to am beken a monganay ori do mina ciring na ni Ama ta do to. Ta o nitoro na aryarilaw na ji Apolahan am pangononongan na ni Ama ta do to o mina ciring na jya.

¹⁹ Am ikongo peypeypangayan na no iwawalam ni Ama ta do to a nitaid na ji Moyse. O iwawalam rana ori am ipakateneng no tao do raraten da mangay do yai no sivovoong ni Apolahan a si Kizisto. Am no kano nang am tinsi o nitomoro nya ji Moyse so iwawalam ang a katoro na rana nya do tao.

²⁰ Am si Ama ta do to o nimacisirsiring ji Apolahan.

Peypeypangayan no iwawalam na ni Moyse

²¹ No akman sang am manngwa, masipalpalpid o iwawalam ni Moyse a kano pangozayan na a ciring a nitoro na ni Ama ta do to? Jyabo kakman na sang a. No si manoyong o kapakahap ta no iwawalam ni Moyse so to meyyonong a ikavyay no pahad ta am makanet rana ori a ipacikaop ta ji Ama ta do to.

²² Am o ciring do Seysyo am yatodamimin o tao do karawan a yamabedbed no raraten. Am ori an, no kakzeben ta o kapakahap ta so to meyyonong a ikavyay no pahad ta am kapeyhanhan ta ni Yeso Kizisto. Ta ori rana am mina ciring na ori ni Ama ta do to do amraralay nya tao.

²³ Am no kabo pa ni Yeso a ipeyhanhan ta am apya, ta amyan so iwawalam ni Moyse a omzat do onowned ta.

²⁴ Am ori o icyakma ney inyapwan ta no iwawalam ni Moyse amzat do onowned ta mangay do yai na rana ni Kizisto a kabnek na rana jyaten ni Ama ta do to a abo rana so raraten do tangain na, do kapeyhanhan ta nya.

²⁵ Sicyaikwa rana ya am yarana amyan si Kizisto. Am ori o na rana ji amzaci do onowned ta no iwawalam ni Moyse.

²⁶ Inyo rana am kamo rana mamimin a akma ney anak ni Ama ta do to, do yanyo rana kapeyhanhan ni Yeso Kizisto.

²⁷ Inyo rana am kamo rana a nimamlis so onowned a nitaktakan rana a yarana macikaop ji Kizisto a ominara so icicirawat na.

²⁸ Am ori o ikabo rana no matarek do amraralay ni Yeso Kizisto a tao. Ta meyyangangay sira do tangain na. Tana tao do Yotay a tana beken a tao do Yotay, tana lamlamsoy a kano beken a lamlamsoy, tana mahakay a tana mavakes am kamo mamimin a akmey asa rana a yamacikaop ji Yeso Kizisto.

²⁹ No kamo macilovot ji Kizisto am manoyong kamo na a macikownongan ji Apolahan a omamoon so aryarilaw na ni Ama ta do to si Apolahan.