Cyalatay 2 - Seysyo No Tao

Si Pawlo a kano karwan da a nipamnekan ni Yeso a amlivolivon no ciriciring na

¹ Ikapat na so icyarwa (14) no awawan am macihza ko ji Parnapo a mangay do Yelosaleng a kapehza ko si Tito.

² O yangay ko do Yelosaleng am onotan ko o ciring na ni Ama ta do to a manci nya do panipanirsirngen no kyokay so mina vazay ko no kapeylimwang ko no Mapasaray a Ciriciring na ni Ama ta do to do beken a tao do Yotay. Ta ji ko mamyapyan o kapanci da no vazay ko ji Ama ta do to no kakwa a kasicyakwaya abo so peypeypangayan.

³ Ikongo do nisaray da o vazay ko no kanang, am ori o ji da nimgacigaci ji Tito amyongkad do kataotao na a mahap so iwawalam ni Moyse. Ta si Tito rana am beken a tao do Yotay, ta tao do Sila.

⁴ Am yamyan so tatasa ka tao a yanimacizavoz a yamapatpeh so kataotao da. Sira ori am kakzeben da si Tito a amyongkad do kataotao na. Am sira rana am beken a kayyai da, ta ileylamdamen da yamen a yamraralay ni Yeso Kizisto a tao. Ta manngo paro sira. Ala ahapen da o iwawalam ni Moyse.

⁵ Am ji namen mamyapyan o kablis na no Mapasaray a Ciriciring na ni Ama ta do to a nipeylimwang namen jinyo. Am ori o ji namen nimapaoyoi jira.

⁶ Am sira rana panipanirsirngen am ji ko ngezsangan o keynakem da, kato da katawwan. Ta si Ama ta do to rana am ji na nita o akman sang. O ko pancyan no nang am abo nikarahet da do ipangnanao ko.

⁷ To da rana tenngi o kanitomovoy na jyaken ni Ama ta do to a yamangay a meylimwang no Mapasaray a Ciriciring na do beken a tao do Yotay. Akman sang si Pite a nitovoy na ni Ama ta do to do tao do Yotay a meylimwang no Mapasaray a Ciriciring na.

⁸ Ta si Ama ta do to o yaniomoyat jyaken a mangay do beken a tao do Yotay, akman si Pite a nitovoy na ni Ama ta do to a meylimwang no Mapasaray a Ciriciring na do tao do Yotay.

⁹ Am katenngan da no panipanirsirngen do kyokay a si Yake a kani Pite a kani Yowani o ka yaken na no nipanta na ni Ama ta do to so oyowyat a meylimwang no Mapasaray a Ciriciring na do beken a tao do Yotay am isaray da yaken a kani Parnapo. Am ori o mina to da macipanadngi jyamen a meylimwang no Mapasaray a Ciriciring na ni Ama ta do to do beken a tao do Yotay. Am sira am to sira tarek a mapamizing so tao do Yotay.

¹⁰ Da kakzeben yamen a makanakem so makcin a tao do Yelosaleng. O akman rana sang am yamangday ori a yako naknakmen a vazay.

Si Pawlo a kani Pite do Antia

¹¹ Mownay am mangay si Pite do Antia. Am ikongo do amyan so kalasan na, am ori o ninanawan ko sya.

¹² Ta no keyyan na rana ni Pite do Antia am nimacyakan do beken a tao do Yotay a sinjya. Am makaranes rana sira o nitovoy ni Yake a tao do Yotay am ji na ranadkeci ni Pite o kapacyakan na do beken a tao do Yotay. Ta ihawa na sira o tao do Yotay a mazyak nya. Ta sira rana am pangozayan da pa o iwawalam ni Moyse a amyongkad do kataotao da.

¹³ Macita da no karwan da no tao do Yotay si Pite a akmey jya nikoman am to da nginara si Pite. So nikakman na sang ni Parnapo.

¹⁴ Macita ko o iwawalam da a macisala do Mapasaray a Ciriciring na ni Ama ta do to am maniring ko ji Pite do tangain da no aro a tao am, “Imo am tao do Yotay ka. Am iwawalam mo am beken a tao do Yotay a yaji mangozay do adan a iwawalam ta a tao do Yotay. Ikeykongo ka yamgacigat do beken a tao do Yotay a mangozay do iwawalam da no tao do Yotay.

¹⁵ “Yajyalas. Ta imo a ka nyaken am ta manoyong a yamacitetngehan do tao do Yotay. So ji ta nginarai so beken a tao do Yotay a ji ngahap so iwawalam ni Moyse.

¹⁶ Am ta katenngan an, o ipacikaop no tao ji Ama ta do to am anoyngan si Yeso Kizisto. Beken a omagaz do kahap so iwawalam ni Moyse. Yaten rana am yata anoyngan si Yeso Kizisto. Am ori o ta ipacikaop ji Ama ta do to. So na ji monganai do ta kapangozay do iwawalam na ni Moyse. Ta abo o asa ka tao a meypapya no iwawalam na ni Moyse do tangain na ni Ama ta do to.

¹⁷ Yaten rana a yaomanoyong ji Kizisto a nibnek na ni Ama ta do to a abo rana so raraten do tangain na am no si meyyangay ta kano beken a tao do Yotay a meyraraten am manngwa, apyahen na ni Kizisto o kapeyraraten ta saon? Jyabo kapya na sya a.

¹⁸ Am no si olin ko pa hapen o iwawalam ni Moyse am raraten ko ori.

¹⁹ Yaken rana am ko katenngan o kaji makahapan so to meyyonong a ikavyay no pahad ko no si pangozayan ko o iwawalam ni Moyse. Am ori o ko na ji ngapi so iwawalam ni Moyse. Ta ko na hapen o vazay na ni Ama ta do to. Ko akmey to macizasing so kataotao ji Kizisto a nimawakwak do jyojika.

²⁰ Am ori an, ikabeken a yaken rana no yamavyay sicyaikwaya. Ta si Kizisto rana o yamavyay do onowned ko. O yako ikavyay sicyaikwaya am yako ipeyhanhan o Anak na ni Ama ta do to. Na nikarilaw yaken a na nyangay no inawan.

²¹ Ko ji zazaci o pangangasyan na ni Ama ta do to. No si iwawalam na ni Moyse o abnekan na jyaken ni Ama ta do to a abo rana so raraten do tangain na am manngwa, abo saon o peypeypangayan no na kanimawakwak ni Kizisto am.”