3 Yowani 1 - Seysyo No Tao

¹ Yaken rana am cyozo ko a yameyteygami ni Cyayo a ney kaglaw ko a akma koy kakteh do cinai.

² Mo ovay, inaoy si apiya o makakaday a vazay mo. Akman sang o kataotao mo a akmey aryaripasalaw, akman so yamo kakdekdeng so nakem ji Ama ta do to.

³ Makaranes sira o akma tey kakteh do cinai do jya am ipanci da jyaken o kakdekdeng mo so nakem ji Ama ta do to a manoyong a mangozay do nanao na. So nikasaray ko a makamizing sya.

⁴ Mamizing ko inyo manganako a mangozay do nanao ni Ama ta do to am ji ko rana tenngi o sarasaray ko.

Yazwazway si Cyayo

⁵ Mo keypong, yatey makdeng o nakenakem mo a yamahap so vazay no akma moy kakteh do cinai. Tana kadwan lili am yakman sang o nakem mo sira.

⁶ Da nimalavat do kyokay do jya o pangangarilawan mo. So sidongan mo pa sira meypangay do angayan da a meylimwang no Mapasaray a Ciriciring na ni Ama ta do to an. Ta akman rana sang am isaray ni Ama ta do to.

⁷ Ta o ipangilili da nira ori am ciring na ni Yeso Kizisto. Am yabo da nyahap a da isidong sira no ji manaralay a tao.

⁸ Ori o sidongan ta sira a yamraralay ni Ama ta do to. Ta ori o icyakma tey macivazay jira meylimwang no nanao ni Ama ta do to.

Si Titevey a kani Temolyo

⁹ Ko nimeyteygami do kyokay do dang am si Titevey a yamnakenakem so na kakmey tomalamozong no kyokay am na to nazibwan o ciring ko.

¹⁰ No si mai ko am patwawen ko o mina vazay na, do kanimangamaog na so iraherahet na jyamen a ciring. Beken a orii o na nikarehtan. Ta iya rana am na ji naotawwa sira o akma ney kakteh do cinai a meylimwang no Ciriciring na ni Ama ta do to a na ioya sira a yapagcinen do kyokay o yatomaotao sira tao.

¹¹ Ji mo nginara o akman sang a marahet, mo keypong an, ta kahap mo so apiya vazay. Ta o apya so icicirawat am macikaop ji Ama ta do to. O marahet so icicirawat a tao am ji meyngongyod o akman sang a makateneng ji Ama ta do to.

¹² Yabo yaji naray ni Temolyo, do na kato macipayokan no icicirawat na do ciriciring na ni Ama ta do to. So namen sarayan nya. So na ikanoyong no yakman sang a ciring namen.

Ney manowji na asyasi na sya

¹³ Yaro pa ciring a yako ipanci jimo. Am ko na jyapakongo a yavatvatkan.

¹⁴ Inaoy si makeykai ko rana makacita jimo a kawalawalam tamo rana makacita so kadwan jyaten.

¹⁵ Makapiya ka so kataotao an. Da ipeyminaminasi imo no akma tey kakteh do cinai do jya. To mo na ngapa o ciring ko a meyminaminasi no akma tey kakteh do cinai do dang an.