2 Timotay 4 - Seysyo No Tao

¹ Yako vavagan imo do tangain na ni Ama ta do to a kani Yeso Kizisto. Katenngan ta, ta no makwa am meygegcin si Yeso Kizisto a tomalamozong no vayo a karawan. Ta iya o mapeykapyapinpin so mavyay a kano nimawakwak rana tao.

² Am ori o peylimwangan mo no ciriciring na ni Ama ta do to. Tana amizngen da, tana ji da ngamiznga am ji ka hayo so onowned a amvavaga jira kano mapait sira a omnanao sira.

³ Ta yamyan so araraw na no ji da ngapi so manoyong a nanao a to ngonongonong do apyahen da no nakem a ji rana mingsan so amizngen da.

⁴ So bengbengan da so cicilwan da ji ngamizing so manoyong a nanao a kamizing da so nipapo no tao a kavavatanen.

⁵ Am imo rana am meypepzat ka do meykamadadayan a vazay mo. Ji mo a mamman o alalaw mo a meylimwang no Mapasaray a Ciriciring. Ta ori o ikowyat mo a mahap so vazay mo ji Ama ta do to.

⁶ Yaken rana am yako rana makeykai a mangay ji Ama ta do to. So ikanoyong ko rana a na ahapen ni Ama ta do to do teyngato.

⁷ O vazay ko rana ji Ama ta do to a na nitoro jyaken am ko na nimamimin a nipateyka nipeyvazay. Akman so malalayo a tao a omtad rana malayo. So ko rana nimiminan so manoyong a nanao a nyahap.

⁸ Am ori o na iyan no azaw ko apo ji Ama ta do to. Ta si mai rana o yamapeyyangangay a mapacici a Panirsirngen ta am itoro na rana jyaken. Am beken a yaken o torwan na nya. Ta itoro na ori do tao a amraralay nya kano somaray a amnanala sya a mai do teyrahem.

Rarahen na ni Pawlo si Timotay

⁹ Makeykai ka mangay do jya.

¹⁰ Ta na nikarwan rana yaken ni Temase a mangay do Tesalonicya, do kapyapya na pa so masaod no karawan. Si Keleseke rana am nimangay do Cyalatay. Si Tito am nimangay do Taarmatiya.

¹¹ So na ika si Locya no kararay ko. Am ori o mangay mo kalan si Make kapalolo mo sya yai do jya, ta mowyat a somidong jyaken do vazay ko.

¹² Si Ticiko rana am ko na nitovoy a yamangay do Ivoso.

¹³ Si mai ka am yai mo o asa ka magorogod ko nyaryan ko do vahay da Kaarpo do Teloya a kahap mo pa so vakong ko. Ta yamyan do dang so yamakdeng a ko vilangan.

¹⁴ O mapakapkapya so vahalang a meyngaran si Yadisanta am tey rako o nyalalawan na jyaken. Cyaha, ta ji ngyan so ipasingkad na sya ni Ama ta do to a.

¹⁵ Ko ipanci jimo, ta azimanen mo. Ta iya rana am na pacioyyan o ta ipangnanao a ciriciring na ni Ama ta do to.

¹⁶ No keypisa ko pa macirawarawa no kataotao ko am abwata o macikabong jyaken. Am inaoy no ji na peyyana do onowned na o raraten da ni Ama ta do to.

¹⁷ Am si Ama ta do to o yamyan do katangked ko a somidong jyaken a manta nyaken so oyowyat ko a meylimwang no ciriciring na do beken a tao do Yotay a kavyay na pa jyaken no kavovo da jyaken a wakwaken.

¹⁸ So ikanoyong na ni Ama ta do to a mahap jyaken a komaro do kanginanawan ko do maciocioya jyaken a tao, mangay no si ahapen na rana yaken do teyngato. Inaoy no to meyyonong o kazwazway ta si Ama ta do to. Amin.

Ney manowji na aryarilaw na sira ni Pawlo

¹⁹ Ipanci mo ji Paycila kani Akwila kani Onaysevo a asa ka vahay do ko kapeyminaminasi nira.

²⁰ Si Ilato rana am yana meyvahay do Kedinto. Am si Teloveymo am yameyngen o kataotao na. So ko nivezedan sya do Midito.

²¹ Imo rana am makeykai ka mai do jya, do yana ipeypamyan rana, ta marekmeh rana. Yopolo a kani Poteng a kani Dino a kani Kelawtiya kano aro a akma tey kakteh do cinai o yameyminaminasi nimo.

²² Inaoy no macitovong jimo si Ama ta do to. Inaoy no itoro na o pangangarilawan na jinyo.