2 Timotay 3 - Seysyo No Tao

Pazimanen na ni Pawlo o keyyan no marahet so iyangay a tao no makwa

¹ Naknakmen mo an, ta no si makeykai rana mai si Yeso am amyan so kanginanawan a kano alalaw an.

² Ta o kataotao da o manakem da. O kapangamkam da so nizpi. O kapahama da so nakem da. O kapanraherahet da. O kapasala da do inyapwan da. Ji da narayan o nisidongan da sira no tao. Jyanoyong o nakenakem da ji Ama ta do to.

³ Abo rana o pangarilawan da so tao. Abo o pangangasyan da so icyatatao da. Mananamwad sira. Masosozi sira. Mangangamo sira. Ikaoya da o apya vazay.

⁴ Ipacinginangina da o icyatatao da. Ji da naknakma o apiya ahapan da so vazay da. O ahapen da am mapakazwazway sira. Maharahara pa o sarasaray da so makakaday a vazay da a kani Ama ta do to.

⁵ Ta sira rana am akmey manaralay sira am ji macipayok o vazay da, ta to da nazibwan o oyowyat na ni Ama ta do to. O akman rana sang a tao am ji mo macikasngeni sira an.

⁶ Ta amyan so mahakay a mangnanao no malas a ciring so jyahadpet so nakem a mavavakes a ipeyzavozavoz da so nakenakem da. Am ori o to da anwanoyngi jira, do keyyan na pa jira no raraten da no kakwa pa.

⁷ Tana sira masangib o mavavakes a yamacinanao am da jyatenngi o yamanoyong a nanao na ni Ama ta do to.

⁸ Akman si Yanayse a kani Yangpole a ji ngahap so apya nanao na ni Moyse am akman sang o vazay da no mangnanao no malas a tao. Ta yajyablis o pangtoktwan da. So ikabo na no katatenngan da a manoyong a nanao na ni Ama ta do to.

⁹ So ikanoyong no vazay da abo so angangayan. Ta meytotwaw rana o karatan da do tangain no aro a tao akman si Yanayse a kani Yangpole.

Tana aro o alalaw am ipeyhanhan ta si Yeso

¹⁰ Imo rana mo Timotay am mo na nyahap o nanao ko a kano icicirawat ko a kano ahapan ko so vazay do karawan a kano onowned ko ji Ama ta do to. Mo katenngan yaken a ji macimaza do vazay ko ji Ama ta do to a kano pangangarilawan ko so icyatatao ko.

¹¹ Mo katenngan o ko kato nazibwan no aro a alalaw ko do Antia kado Ikenyan a kado Disetela. Am kanisomidong na jyaken ni Yeso a komaro do akman sang a nipeyrarehtan da jyaken no tao.

¹² Mamimin o macilolo ji Yeso Kizisto a mapeyvazay so nanao ni Ama ta do to a peyrarehten da.

¹³ Ta o meyraraten rana tao a kano mangnanao no malas a tao am meypeyparahet o vazay da. Ta alalasan da o tao am akman sang sira kalittan.

¹⁴ Am o mo nimahap rana yamanoyong a nanao am panekseken mo do onowned mo an. Ta mo katenngan sira o mo nipacinanawan an.

¹⁵ Ta mo manakem no ka kanakan mo pa am katenngan mo rana o Seysyo a yamnanao jimo. So ikatopos mo a meyhanhan ni Yeso Kizisto a mapatazadang jimo do kapyapyan.

¹⁶ O Seysyo rana am mamimin a apo ji Ama ta do to. So ikanoyong na tey mowyat a inanao na so omanoyong jya tao, a iblis na so onowned no malas a tao, a ipaziman na so meyraraten a tao, a inanao na so tao a mangozay do apiya vazay na ni Ama ta do to.

¹⁷ Ta ori o ikateneng ta a ikowyat ta a mapeyvazay so makakaday a vazay na ni Ama ta do to.