2 Timotay 2 - Seysyo No Tao

Manoyong a mahap so vazay na ni Yeso Kizisto

¹ Imo rana manganako am ahapen mo o na nitoro jimo ni Yeso Kizisto a pangangarilawan na, ta ori o ikowyat no onowned mo.

² Ahapen mo o nanao a nimamizing mo jyaken do tangain da no aro a tao a inanao mo so milamdam mo a makdeng so nakenakem a tao a kananao da so icyatatao da.

³ Makowyat ka so nakenakem a somazap so alalaw mo an, do kapacinanod mo jyaken a mahap so vazay na ni Ama ta do to. Ta akma tey itaysang na ni Yeso Kizisto a ji mapasobna do mimong nira.

⁴ O myan rana do itaysang am no kakzeben na o kaglaw na nya no mimong nya am ji na pazavoza o makakaday a vazay na, ta ikasanga na.

⁵ No macipalalayo o tao a kaji na mangozayan do nipamnekan da a pangozayan no malalayo am abo o azaw na.

⁶ O mowyat a amhakakaw a tao am ori o mabsoy a tao.

⁷ Naknakmen mo o ko nipanci jimo a ko payyaingan sya. Ta si Yeso o makasidong jimo a ipakateneng mo do akman sang a vazay.

⁸ Naknakmen mo si Yeso Kizisto a nimatazak a tao a sivovoong na ni Tawey. Tana da niwakwak am nimirwa a mavyay. Ori o ko ipeylimwang a Mapasaray a Ciriciring.

⁹ Am ori o ko nipeyrarahet a nivaod da no nilalin da vahalang. Am o ciriciring na ni Ama ta do to am jyasengsengi. So ikabo no makazazat jya.

¹⁰ Am ori o ko to liliwi so yamakakaday a da peyrarehtan jyaken, do ko kasidong so nipamnekan na ni Ama ta do to a tao a omanoyong ji Yeso Kizisto. So ikanoyong da makahap so to meyyonong a pangangarilawan na kano azwazway.

¹¹ O ciring eya am tey manoyong: No si pazanoden ta o onowned ta ji Yeso Kizisto a nimawakwak nyaten am akman ta si Yeso Kizisto a avyain na ni Ama ta do to.

¹² Si ji ta hayo so nakenakem am macizanod ta jya tomalamozong no teyngato. Si ji ta nganoyngi am ji na singkaji yaten.

¹³ Tana malas o onowned ta jya am jyablis o ciring na, ta ji na mamyapyan o kaji na mangononongan no ciring na.

Isaray na ni Ama ta do to o mahap so vazay na tao

¹⁴ Pazimanen mo o aro a tao do tangain na ni Ama ta do to, ta ji sira macinekanekad no ciriciring da. Ta abo o peypeypangayan no akman sang. Ta kapeyparahet da nya no omamizing sya tao.

¹⁵ Makowyowyat ka pa do tangain na ni Ama ta do to a mapacita no kaji mo ablisan no nakenakem jya a abo so karatan a mahap so vazay na a mapatak a mangnanao no manoyong a nanao na.

¹⁶ Ji mo pasngena o abo so angangayan a pacinekanekadan. Ta o akman rana sang a ciriciring am mapeyparai so tao ji Ama ta do to.

¹⁷ Ta o ipangnanao da rana am akmey noka jyapya a makatotoin. Yamacyangay jira ang si Siminay a kani Veydito.

¹⁸ Sira rana am da na nikarwan o manoyong a nanao. Ta ipanci da o kaji da na mirwan a mavyay no nimawakwak rana tao a niomanoyong ji Yeso. Ta da ipanci o kanikomavos rana no keypirwa a mavyay no tao. So da ikanoyong a mapeykamakamali so onowned no tao ji Ama ta do to.

¹⁹ Am yajyablis o manoyong a nanao na ni Ama ta do to. Ta maniring do nivatvatkan a Ciriciring am, “Katenngan na ni Yeso o omanoyong jya tao.” Maniring pa am, “O manci no kararalay da ni Ama ta do to am peymakarwan da rana o raraten da.”

²⁰ O rako a vahay no katenngan a tao am aro dang o makakaday a apzapzatan a makonokon dang. Am amyan so makdeng, amyan so jyakdeng.

²¹ O ko pancyan no nang am tanyo akman so makakaday a apzapzatan ang. No ji ta pasngena o raraten do kataotao ta am manoyong kapahanhan na jyaten ni Ama ta do to do makdeng a vazay.

²² Ji mo nginara sira o malavayo a tao a to mangozay do nakenakem da, ta o ahapen mo am ji meyrahet a nakenakem, kakdeng no onowned mo ji Ama ta do to, kapeypakatkat no pangangarilawan mo a kano kapya no onowned mo do icyatatao mo, do yamo ipacizanod do tao a mahap so vazay na ni Ama ta do to a mazngang so onowned.

²³ Ji nyo ngahapa o malas a ciriciring a ipacinekanekad nyo. Ta katenngan mo o akman sang a vazay a mapeyliliman.

²⁴ O lamlamsoy na ni Ama ta do to am ji macililiman, ta apiya o nakenakem na so icyatatao na a kowyat na omnanao sira. Tana ji da ngamiznga am jyahayo o onowned na.

²⁵ No akman sang o inanao na so ji ngahap so nanao a tao am ala ipanta na sira ni Ama ta do to so ipamlis da so nakenakem, kapakateneng da rana do manoyong a nanao na ni Ama ta do to.

²⁶ Tana meypasngen sira do raraten da omamizing so ciring na ni Satan am amyan so kasaraw a ikaro da do littan na jira.