2 Timotay 1 - Seysyo No Tao

¹ Yaken rana am si Pawlo ko a lamlamsoy na ni Ama ta do to a nipamnekan na ni Yeso Kizisto a omlivolivon no ciriciring na. Yaken rana am yako ipeylimwang o mina ciring na jyaten ni Kizisto a ipakahap ta so to meyyonong a ikavyay no pahad ta a omraralay nya.

² Imo rana mo Timotay a akma koy anak am ko ipeyteygami imo. Inaoy si itoro na jimo ni Ama ta do to a kani Yeso Kizisto a Panirsirngen ta o pangangarilawan na kano pangangasyan na kano ikapiya no onowned mo.

Sarasaray na kano ipait na si Timotay

³ Yako isaray ji Ama ta do to o namen kapeyyangay a kano ineynapo namen a yaji meylimoteng so nakem a yamraralay nya. Yamangday no ko meynozi do mahep a kado maraw o yako kapakanakem jimo.

⁴ Ta ko manakem o kato mo na meykaooi asyo a pacisyayan ko. So ko toda ji ngamogi so kakeykai ko a makacita jimo. Ta jyabo kaji ko narayan a makacita jimo a.

⁵ Ta ko katenngan o na kajyalasan no onowned mo ji Ama ta do to. O akman rana sang a onowned mo si Ama ta do to am yana nimanmanma ji Loi a akes mo a kani Yonise a ina mo. So ko anoyngan jimo a yakman sang.

⁶ Am ori o yako pancyan nya jimo, makowyat ka meyvazay an. Ta naknakmen mo o oyowyat a nitoro na jimo ni Ama ta do to no kaparapong ko so lima ko jimo a ipeynozi no kakwa pa.

⁷ Ta o Seyzi a na nitoro rana jyaten ni Ama ta do to am beken a ikalma no onowned ta. Ta ikowyat no onowned ta kano iyan no pangangarilawan ta kano apiya pangtoktwan ta.

⁸ Am ori o ji mo asneki a meylimwang ni Yeso a Panirsirngen ta. Ji mo macimasnekan yaken a nipteng da mahap so vazay na ni Kizisto. So ahapan mo so alalaw ta no kapeylimwang ta no Mapasaray a Ciriciring, ta na sidongen imo ni Ama ta do to.

⁹ Iya o nimahap jyaten a mapanop jyaten a omanod jya. Am beken a omagaz do kapya no icicirawat ta, ta yaomagaz do nakenakem na kano pangangarilawan na ni Ama ta do to. Ta no kaji na pa nimangamaogan so karawan am nimanakem na rana o katovoy na si Yeso Kizisto a somidong jyaten.

¹⁰ Yarana nimangononong o akman sang a na sidongan jyaten. Ta yarana nimeyhekas si Yeso Kizisto a yamapatazadang jyaten. Am ori o ji ta nyahei no kawakwak ta, ta amyan rana jyaten so to meyyonong a ikavyay no pahad ta. Ori rana am ipanci na jyaten do Mapasaray a Ciriciring na.

¹¹ Na nipamnekan yaken ni Ama ta do to a amlivolivon a meylimwang no Mapasaray a Ciriciring na a ipangnanao so tao.

¹² Ori o yana niyapwan no alalaw ko. Am cyaha, ta yako katenngan si Yeso a yako ipeyhanhan. So ko anoyngan ji Yeso a makasidong jyaken a mapeyvazay so vazay na mangay do araraw no ikeypirwa na mai.

¹³ Pakanakmen mo o manoyong a nanao a ninanao ko rana jimo a pangozayan mo. Ji mo to nazibwan o nimahap mo a pangangarilawan a kano nakenakem mo ji Yeso Kizisto an. Ta ori o yongkad no macikaop ji Yeso Kizisto.

¹⁴ Am ori o peyhanhanan mo no isidong na jimo no Seyzi a yamyan jyaten a kapzat mo do manoyong a nanao na ni Ama ta do to a nitoro na jimo a ipeylimwang mo.

¹⁵ Mo katenngan rana, ta o tao rana do Yasiya pongso ya am sira mamimin a yajyakza nyaken. Yakman sang si Veykelo a kani Hemokenay a yajyakza nyaken.

¹⁶ Inaoy no ikasi na ni Yeso a Panirsirngen ta si Onaysevo a yasa ka vahay. Ta yamasangib ori a yamai a yamapasaray jyaken. So na ji macimasneki nyaken a nipteng da.

¹⁷ Ta kapakaranes na do Loma am amlivolivon a komala jyaken. Mownay am makala na rana yaken.

¹⁸ Inaoy no ikasi na ni Yeso a Panirsirngen ta no si marateng rana o yai na a mapeykapyapinpin so tao do karawan. Yamo katenngan rana o aro a vazay a nisidongan na jyaken no keyyan ko pa do Ivoso.