2 Tesalonicya 3 - Seysyo No Tao

Ipeynozi nyo yamen

¹ Imanowji na ko ipanci jinyo manga kakteh am ipeyneynozi nyo yamen a kakeykai na no ciriciring na ni Yeso a Panirsirngen ta a meylimwang a kanoyong da jya no tao akman jinyo a omanoyong rana jya.

² Meynozi kamo ji Ama ta do to a kapahawa na jyamen do meyraraten a tao. Ta beken a todamimin o tao a yaomanoyong ji Yeso.

³ Am yabo na kalalasan ni Yeso a Panirsirngen ta. Iya rana am ikakoyapet nyo so nakenakem a kaji na makagogadan jinyo ni Satan.

⁴ Namen ipeyhanhan inyo a sidongen na ni Yeso. Namen katenngan inyo a yajimtad a mapeyvazay so ninanao namen jinyo.

⁵ Inaoy no ipeypalanginan na inyo ni Yeso a kapeypahagnat nyo so nakenakem a makateneng do karilawan na ninyo ni Ama ta do to. So ikanoyong nyo a ominara si Kizisto a tongbo so alalaw na.

Ivavaga do abwata so vazavazay a tao

⁶ Manga kakteh, namen pangozayan o ngaran ni Yeso Kizisto a Panirsirngen ta a manci nya jinyo. Ji nyo nganopa sira o akma tey kakteh do cinai a abwata so vazavazay a yaji ngahap so nanao namen jinyo.

⁷ Jyabo nyo kaji makatenngan jyamen a inarahen a. Ta no keyyan namen pa jinyo do dang am jyabo kanimalma namen a.

⁸ Ji namen nimacyakakan do karwan no tao. Tana maraw a tana mahep am mangday kapeyvazay namen a omyaw no velek namen do kaji namen mamyapyan ninyo a masanga nyamen.

⁹ O ikakman namen sang am beken a ikamo namen inyo a mapatodeh jyamen, am kapakanakem namen so kapeycitacita nyo jyamen a inarahen.

¹⁰ No keyyan namen pa jinyo do dang asyo am nipaziman namen rana jinyo o kaji nyo mapakanan so abo so vazavazay a tao.

¹¹ O peycirngan namen so akman sang am nimamizing namen o tatasa jinyo a to meyyowyaw a abo so vazavazay a kapanazovaz so icyatatao da.

¹² O akman rana sang a tao am pangozayan namen o ngaran ni Yeso Kizisto a Panirsirngen ta a mapaziman sira. So ikowyowyat da pa a meyvazay a omyaw no velek da. Ji sira to manazovaz so icyatatao da.

¹³ Manga kakteh, ji nyo macimazai o kapeyvazay nyo so apipiya vazay.

¹⁴ Ala amyan so tao a to nazibo no ciring namen do teygami. Am o akman rana sang a tao am azimanen nyo an. Ji kamo maciwalam jya an a kasnek na.

¹⁵ Am ji nyo abneka a kavosoyan nyo, ta kavavaga nyo jya akman so kakteh nyo do cinai.

Itaitaid na sira ni Pawlo

¹⁶ Inaoy no si mangday na itoro jinyo o ikapiya no onowned nyo ni Yeso Kizisto. Ta iya rana am kapwan no ikapiya ta no onowned. Inaoy no si macitovong jinyo si Yeso Kizisto.

¹⁷ Ko vatvatkan o ngaran ko an. Yaken rana am si Pawlo ko a yameyminaminasi ninyo. Yamamimin o teygami ko a yako padketan so aryarilaw ko jinyo. So na ikanoyong no teygami ya a yapo jyaken.

¹⁸ Inaoy no si itoro na ni Yeso Kizisto a Panirsirngen ta o pangangarilawan na jinyo.