2 Tesalonicya 2 - Seysyo No Tao

Irako na so raraten a italamozong na ni Satan a tao

¹ No si mirwa mai si Yeso Kizisto a Panirsirngen ta no malovot ta amrapong sya manga kakteh am namen kakdain inyo,

² ji kamo tey makeykai a marahet nya so nakenakem no mamizing nyo o ipanci da no mangononong so malas do mina kapakaranes na rana no araraw na ni Yeso Kizisto a Panirsirngen ta. Tana mangamaog sira o tao so ciring a manci no kapo na do Seyzi a tana nipatolin da jyamen no tao a mapeyciring sya, tana ipanci da ciring namen do teygami am,

³ ji nyo to nganoyngi o ciring da an. Ta no omanam rana o araraw am manoyong o kapacioya da ji Ama ta do to no aro a tao a macyanod so nakenakem do irako na so raraten a italamozong na ni Satan a tao a yamapalolo sira a mangay do kararatan, mangay o kangay na do makotokotod a lila no apoy.

⁴ Iya rana am ioya na sira o tao a ji raralay nya. Ta abneken na o kataotao na makarakarang pa kano iraralay da no tao. So yangay na omlisna do raralayan da ni Ama ta do to a mapakataotao do to.

⁵ Manngwa, nyo na jyanakem o akman so sya a mina ciring ko pa jinyo no kapacikaop ko pa jinyo asyo?

⁶ Nyo katenngan o keyyan no amzazat do tao a irako na so raraten a italamozong na ni Satan. Am amyan so araraw no nang a ipeytotwaw na.

⁷ Ta yana papwen o na kapeyvazay no irako na so raraten a italamozong na ni Satan a tao. Am ji pa meyngongyod o vazay na, ta zazazzatan no mowyowyat pa ka nya. Am no si peylisen na rana o lima no yamzazat do vazay eya am,

⁸ ori o ipeytotwaw na rana no tao a italamozong na ni Satan. No si mai si Yeso am ahahan na kazakat na rana kabwata na rana no oyowyat na ipeyzavozavoz na so tao.

⁹ Ta no kapeyigegen na pa no irako na so raraten a tao am oyatan ni Satan a mai a kapeyvazay na so mapangyangyalak a vazay. So icyakma ney mowyat. Am jyanoyong ori,

¹⁰ kalita na do ji manganoyong a tao no meykamadadayan a vazay, ta ji da ngahapa o manoyong a nanao na ni Ama ta do to a manta nira so to meyyonong a ikavyay no pahad da.

¹¹ Am ori o to na macyozai rana jira ni Ama ta do to do malas a nakenakem a omanoyong do malas a nanao.

¹² O ji nganoyong do manoyong a nanao a makza no raraten da am mamimin sira peydednan no peyoyaoyyan na ni Ama ta do to.

Makakdeng kamo a mahap so apiya vazay

¹³ Inyo rana manga kakteh a na ikarilaw ni Ama ta do to am namen masangib inyo a isaray ji Ama ta do to. Ta no kaji na pa amaogan no karawan am nipamnekan na rana inyo ni Ama ta do to a ahapen. So nyavaywan na so onowned nyo no Seyzi a kowyat na jinyo a omanoyong do nanao na ni Ama ta do to.

¹⁴ O Mapasaray a Ciriciring na ni Ama ta do to a nipamizing namen jinyo am ori o yanimrara jinyo a macikasaray do azwazway na ni Yeso Kizisto a Panirsirngen ta.

¹⁵ Ori an manga kakteh an, makakdeng kamo so nakenakem an. O ninanao namen jinyo a ciriciring na ni Ama ta do to am meyyangay ori a kano ciriciring namen do teygami a miminen nyo a ahapen.

¹⁶ Na ikarilaw yaten ni Ama ta do to a kani Yeso Kizisto a Panirsirngen ta. O pangangarilawan na ni Ama ta do to am ori o yapwan no to meyyonong a sarasaray no onowned ta amnanala so nakem na jyaten.

¹⁷ Inaoy no si pasarain na o onowned nyo a kapait na jinyo a jyablis so nakenakem a mapeyvazay so meykamadadayan a apiya vazay a kapanci nyo no apiya ciriciring.