2 Pite 2 - Seysyo No Tao

Malas so ipangnanao a tao

¹ No kakwa do Isedi am amyan so nimalas so ipangnanao a tao. Akman sang jinyo, ta no makwa am amyan so malas so ciring a tao. Sira rana am ipeylimwang da o iparai no pahad nyo ji Ama ta do to, mangay ji Yeso Kizisto a nimawakwak nira o alalasan da. Am o akman rana sang a tao am ji meyyahahay o kapeydedna na jira no oyaoyyan na nira ni Ama ta do to.

² Tana somagpyan sira am amyan so aro a tao a macilolo jira a mapasagpyan so nakenakem da. So ikanoyong no nanao na ni Ama ta do to a pasagsagpyanen da no tao.

³ Sira rana malas so ipangnanao a tao am mangamaog sira so ciriciring a ipeylimwang da ipangap da so apzapzatan no tao a ikadpeh jira. So iyan na rana no kakwa no oyyan na nira ni Ama ta do to. So ikanoyong da rana ji rana makasaway do pasingsingtan na jira ni Ama ta do to.

⁴ O nimeyraraten a tinsi am ji na vonasa o raraten da. Ta nipangay na sira do kararatan. So nilyowan na sira aptengen do kasarisaryan a yamapanala so araraw ni Ama ta do to a mapeykapyapinpin so tao.

⁵ Ji na nipeykabobo o raraten da no tao no kakwa. Ori o nipeykehnepan na sya a ibalinas na so ji mapanadnad si Ama ta do to a tao. Wawao sira Noya asa ka vahay a nivyay ni Ama ta do to, do kaji na nimapasalan do ciriciring na ni Ama ta do to a ipeylimwang do tao.

⁶ Nibalinas na ni Ama ta do to o tao do adwa ka ili a meyngaran so Sotoma kano Hamola. Ori o nipakasan na so apoy a itemtem na sira a ipacita na so ji manganwanoyong a tao.

⁷ Nivyay na o meyngaran so Lote, do kapya no onowned na. Iya rana am ikarahet na no onowned sira o meyraraten a tao.

⁸ Tey meyngen o onowned na a makacita so raraten da do araraw no meyraraten a tao, do kapacikeylyan na jira.

⁹ Am katenngan na ni Ama ta do to a pahawahen sira o jyablis so onowned a makanakem sya a tao do alalaw da. So ipakateneng na ni Ama ta do to do meyraraten a tao a pasingsingtan no marateng o araraw na no peykapyapinpinan na so tao.

¹⁰ Tarek pa sira o to mangozangozay do onowned da a ji mapanadnad so oyowyat ni Ama ta do to. Ta jyabo kaji nakdekdengan pa no pasingsingtan na jira. Pahamahen da o nakem da no malas so ipangnanao a tao a ji mapanadnad so tinsi na ni Ama ta do to.

¹¹ Kakwakwan da no tinsi arakorako pa so oyowyat a ka nira am ji dadkeci sira rehrehten no ciriciring da do tangain na ni Ama ta do to.

¹² Am o malas so ipangnanao a tao am sya akmey omalalam a yaji makateneng do kasnekan da a yamapananala so omwakwak sira a tao. Da ikazyak o yada jyatenngi a vazay. So ikanoyong na mangay jira no peyoyaoyyan na ni Ama ta do to,

¹³ do kalas no vazay da do icyatatao da. O abneken da ney yapya na vazay am azwain da o kataotao da, abo so ji peyveyvazaya do maraw. So nyo ikanoyong a yamacikatamwad jira do da kapacizavoz jinyo. Ta sira rana am da isaray da kapanlita so tao.

¹⁴ Yabo da ji nitanita no mata da. Da pa ji makamyamyan o yamakakaday a yada peyraratenan. Da cirarahen sira o yaji makanet so onowned ji Ama ta do to a tao a mapasagpyan so kataotao da. Sira rana am da inaman o yada pangangagoman. So da ikanoyong a yana balinasen ni Ama ta do to.

¹⁵ Da peymakarwan o apiya rarahan. So da ikanoyong a yamavozaw a yaominara so anak ni Peyley a meyngaran so Palang. Iya rana am ikeykakza na pa o keyyan no nizpi na, ji na ngezsangan o kapeyraraten na.

¹⁶ So nioyyan na nya ni Ama ta do to do raraten na. Ori o mina to na meyzezyaki rana no baka a kaoranan na amwoya nya a omzazat do malas a vazay na.

¹⁷ Sira rana o malas so ipangnanao a tao am akman sira so matdes a atbod a kabwan rana no ranom. So icyakma dey pavyoten no pagpag a cinalab a kabwan no maciralay a cimoy. Mangay o kapangayan na sira ni Ama ta do to do rako a kasarisaryan.

¹⁸ Sira rana am sya mapatwaw so rako a ciring a tomirara so vayo pa niomtad no peyraratenan da tao.

¹⁹ Ipanci da o kapeypapya da no macilolo jira. Am jyakman sang, ta kapasagpyan da so icicirawat da. So ikanoyong no macihza jira tao a kalamsoyan no makakaday, do katalamozong na nira no raraten.

²⁰ No si amyan so tao a makateneng do Panirsirngen ta si Yeso Kizisto a mapatazadang jyaten do teyngato a kanikomaro na rana do makakaday a raraten do karawan, a kaoli na pa so mina raraten na am arakorako pa o kanginanawan na no nang.

²¹ O to ngaro do apyahen na vazay ni Ama ta do to amraralay nya am apyapya rana kaji na nimakamizngan so Ciriciring na ni Ama ta do to.

²² Manoyong o ciring da no tao no kakwa. Ta maniring sira am, “O niota da no ino am mangay da olin a kanen.” Akman sang o kois, ta no teyka rana sira aryosen am meyoli pa sira marios do kahethetkan.